Eksodha 13

Mwanana wo khata a sawuletwe Txizimu

1Sekoko Mkoma a to womba ka Mosi a txi khene:

2 # Wona ni ka: Mit. 3:13; Luk. 2:23. Ni sawulekisele “otshe matiwula, hagari ka vanana va ka Israyeli, matiwula a vathu mwendo a sihari, nguko otshe ngangu.”

M'buso wa Mapawu o mbi tshumbelwa

3Se Mosi a to khene ka vathu:

Di alakanyeni ditshiku diya, adi mi nga huma ngu dona ditikoni ka Egipta, nyumbani ka wukhumbi, nguko Mkoma a mi humisile kona ngu dianza da mtamo; se ngu mhaka yeto, kha mi na mbi dya dipawu do tshumbelwa ka ditshiku donedo. 4Anu ma huma nyamsi ka mtxima wa Abhibhi i ku wo khata, ka ditshiku da kuhuma kwanu ditikoni ka Egipta. 5Ngako Mkoma a di mi hokisile ditikoni ka Vakanana, da Vaheti, da Vaamori, da Vahevhi ni da Vajebhusi, adi a nga xambanya ku di ningela ka vatate vanu, ditiko di dikhulungako masi ni wulombe, ditshiku diya mi na di vekisa, ka wona wuwa mtxima. 6Mi na dya mapawu o mbi tshumbelwa mndani ka mtengo wa mtxhanu wa masiku ni mambidi, se ka ditshiku da wutxhanu ni mambidi ku na vaho m'buso wo dhumisa Mkoma. 7Mndani ka mtxhanu wa masiku ni mambidi mi na dya mapawu o mbi tshumbelwa; mitini kwanu kha ku na mbi maneka txilo txo tshumbelwa; hambi ni kotshe mu ditikoni kwanu. 8Ka donedo ditshiku, mmwani ni mmwani a na womba ka mwanakwe a txi khene: Ngu tiya Mkoma a nga hi mahela ngu mbimo yi hi nga huma ditikoni ka Egipta. 9Txi nava i di txialakanyiso manzani kwanu, ni ha mbanza kwanu, kasiku Mlayo wa Mkoma wu txi zumba sisofuni kwanu; nguko Mkoma a mi humisile ditikoni ka Egipta ngu dianza da mtamo. 10Ngu mhaka yeto mlayo wuwa mi na wu vekisa ka mbimo yi yi nga emiselwa, ka dilembe ni dilembe.

Mwanana wa matiwula

11 # Wona ni ka: Luk. 2:23. Ka mbimo yi Mkoma a no mi hokisa ditikoni ka Vakanana, nga ti a nga xambanya kwanu ni ka vatate vanu, ngako a di mi ningile, 12u na ningela ka Mkoma, votshe vanana va mazambi avale i ku matiwula, ni sifuyo sotshe sa matiwula sa vamatune si mi ku naso, nguko vanana vo khata va lumba Mkoma. 13Kambe otshe matiwula a timbongola, u na txitxisa ngu#13:13 Mwendo: txibhongwana. txinvutana; se ngako u si txitxisi ngu txinvutana, u na wila msungo; aniko otshe matiwula a vathu, va lixaka la ka kwanu, va na ningelwa ka Mkoma.

14Ngako mangwana wa ditshiku vanana vanu va txi mi wotisa va txi kha vona: “Toneto ti womba txani kani?” Mi na xamula mi txi khanu: Mkoma a hi humisile ditikoni ka Egipta, nyumbani ka wukhumbi, ngu dianza da mtamo. 15Nguko, ngako Faro a di bangisile mbilu yakwe, asi hi leki hi txi huma, Mkoma a date otshe matiwula a ditikoni ka Egipta, kukhukhela ka matiwula a vathu kala ka matiwula a sihari. Ngu toneto, hi phaxako ka Mkoma ngu matiwula otshe a txiwamna, aniko ha wukhaloni ka vanana vathu va txiwamna hi phaxa ngu sifuyo. 16Nguko eto ti nava i di txikombiso kwako, i di txialakanyiso ha mbanza kwanu, nguko Mkoma a hi thavisile ditikoni ka Egipta ngu mtamo wakwe wa hombe.

Phande ya direfu, ni phande ya mndilo

17Ngako Faro adi lekile va ka Israyeli va txi huma, Mkoma kha va tsimbitisa ngu nzila yi yi tshawunyetako ditiko da Vafilista, hambiko i ku ya txikhangawula, nguko Txizimu txi pimisile ti to va ka Israyeli ngu kuthava yimbi, va nga thuka va txi tshumela va txi ya ditikoni ka Egipta. 18Konako, Txizimu, txi mahile ti to vathu va txi tenderuka ngu nzila ya txiwula hafuhi ni lineneni lo Bhilivila; kambe vanana va ka Israyeli va humile ngu ditikoni ka Egipta va di xomile. 19#Wona ni ka: Gen. 50:25; Jox. 24:32. Mosi a tekile ni marambu a Josefa nguko ene a ti xambanyisile vanana va ka Israyeli ngu mtalo wawe tito: “Ngu ditshuri Txizimu txi nata mi thavisa; tekani marambu angu mi txi tsula nawo.”

20Ngako va di khukhile Sukote, va ka Israyeli va to ya gova Etami hafuhi ni txiwulani. 21Mkoma Txizimu a ti thangela masoni kwawe, ni mitshikari a ti ti va komba nzila ngu direfu, ni wusiku a ti ti va komba nzila ngu phande ya mndilo, kasi ku va woninga, kasiku va txi tsimbila kwati wusiku ni mitshikari. 22Direfu kha da nga va ni kukhukha masoni ka vathu ni mitshikari, ni phande ya mndilo ni wusiku.

Currently Selected:

Eksodha 13: BEC2016

Highlight

Copy