2 Samuwele 16
16
Dhavhidha ni Zibha
1 # Wona ni ka: 2 Sam. 9:9-10. Se mibmo yi Dhavhidha a nga pindanyana tshoka ya mimango, a to tshangana ni Zibha, mfana wa Mefibhosete a di ni timbongola timbidi ti dirwate 200 wa mapawu, ni 100 wa sizangwa sa mauvha, ni 100 wa sizangwa sa mihando ya mbimo ya kuhisa, ni digarafawu da vhinya. 2Se mfumeli a txi khene ka Zibha: U lava txani ni siya kani? Zibha a to khene: Timbongola tiya ti na gadhwa ngu va nyumba yako awe mfumeli; mapawu ni mihando ya mbimo ya kuhisa si na va sakudya sa vafana, se vhinya yi na selwa ngu vale va no karala txiwulani.
3 # Wona ni ka: 2 Sam. 19:26-27. Sekoko mfumeli a to khene: Ahani koko, mwanana wa nyamne wako kani? Se Zibha a to khene ka mfumeli: A sate kona Jerusalema, nguko a khene: Nyamsi, nyumba ya va ka Israyeli yi na ni tshumetela mfumo wa tate wangu.
4Sekoko mfumeli a to khene ka Zibha: Wona taku sotshe sile si ku ni Mefibhosete nzako. Se Zibha a to khene: Na ti namisa, ni na mane dikato masoni kwako, awe mfumeli, nyamne wangu.
Dhavhidha ni Simeyi
5Se mbimo yile Dhavhidha a nga hoka Bhawurimi, ku to huma wamwamna wa lixaka la va ka Sawule, awule a nga ti dhanwa ku i Simeyi, mwana Gera; se a to ta a txi ruketela. 6A to rinzetela marigwi ka Dhavhidha, ni ka sotshe sithumi sa mfumeli Dhavhidha, hambi kule vathu votshe ni tindena totshe va nga ti ti didhawani kwakwe ka txinene ni ka txibhabha. 7Simeyi a txi ruketela, a ti ti khene: Huma, huma, m'thu wa mnoha, m'thu wa Bheliyali! 8Mkoma a ku ningile hakhelo ya wotshe mnoha wa nyumba ya va ka Sawule, ayi awe u fumako ka wukhalo wa yona; Mkoma a vekile mfumo manzani ka Abhisalome, mwanana wako; konkuwa awe u kuxanisekani, nguko u wamwamna wa mnoha.
9Sekoko Abhixayi, mwana Zeruiya, a to khene ka mfumeli: Ngu kutxani yimbwa yiya ya kufa yi ruketela mfumeli, nyamne wangu, kani? Ni leke ni pinda, ni ya mwila msungo!
10A to khene kambe mfumeli: I txani ni ku natxo ni nanu, anu vanana va Zeruiya kani? Mlekeni e ni ruketela, nguko Mkoma a m'gete ku khene: Ruketela Dhavhidha, nguko i mani a no womba ku khene: U maha txani toneto kani?
11Dhavhidha a to khene kambe ka Abhixayi ni ka sotshe sithumi sakwe: Wona, hambi mwanana wangu wo huma ndani kwangu, a lava ku ni daya, se a na lambisa kutxani ku ni daya mwanana wa ka Bhenjamini kani? Mlekeni e ni ruketela, nguko ngu toneto a nga gelwa ngu Mkoma. 12Mkoma a na wona kuxaniseka kwangu, se e ni ninga kuthutha ngu mhaka ya kuruketela kwakwe ka nyamsi.
13Sekoko Dhavhidha ni vathu vakwe va to ti tsulela ngu nzila yawe; se Simeyi nene a to teka nzila yakwe e tsula ngu didhawa da mmango, a to tsimbila a txi ruketela, a txi rinzetela marigwi, ni kumaha lithulu.
14Se mfumeli ni votshe vathu vale a nga ti navo, va to hoka mnamboni ka Jordhani va di karate, ve humula koneyo.
Abhisalome kona Jerusalema
15Sekoko Abhisalome ni votshe vathu, vavamna va ka Israyeli, va to ta Jerusalema; se Ayitofeli a ti ti kumweko navo. 16Se ku to maheka taku, a di hokile Husayi, muariki, mungana wa Dhavhidha, ka Abhisalome, Husayi a to khene ka Abhisalome: A na hanye mfumeli, a na hanye mfumeli!
17Kambe Abhisalome a to khene ka Husayi: Ina ngu lona lirando lako li u randako mngana wako ngu lona kani? U lambete txani kutsula ni mngana wako kani?
18Se Husayi a to khene ka Abhisalome: Ahim-him, ani ni wa wule a nga sawulwa ngu Mkoma ni votshe vathu vava, ni votshe va ka Israyeli, ni na zumba nayo. 19Se hahanze keyo, i mani ni di no mthumela kani? Ina hi nga mwanana wakwe kani? Nga kule ni nga thuma masoni ka tate wako, ni na thumisa toneto masoni kwako.
20Sekoko Abhisalome a to khene ka Ayitofeli: Wombani txokari madingano ni ti hi fanelako ku timaha.
21Se Ayitofeli a to khene ka Abhisalome: Tsula u ya wulela ka vasikati va tate wako, vale a nga va siya kuve xayisa nyumba, kasiku votshe va ka Israyeli ve ziva taku u henyisile tate wako. Se manza a votshe vale va ku ni nawe ma na tsana.
22 # Wona ni ka: 2 Sam. 12:11-12. Sekoko va to gwimba ditenda txitimwi ka nyumba, se Abhisalome a to ya wulela ka vasikati va tate wakwe masoni ka votshe va ka Israyeli.
23Ka masiku ale, mapswi ale ma nga ti wombwa ngu Ayitofeli ma ti fana ni mapswi a Txizimu: Hambi Dhavhidha ni Abhisalome va ti ti themba ka otshe mapswi a Ayitofeli.
Currently Selected:
2 Samuwele 16: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
