2 Samuwele 15
15
Txitereka txa Abhisalome
1Se ku to maheka taku, msana keto, Abhisalome a to longisela sikotxikani ni mahantxhi, ni mtxhanu wa magumi a vavamna va va no tutuma masoni kwakwe. 2Abhisalome nene a to wuka ni mixo eya ema ngu didhawa ka nzila ya txike. Se votshe vathu va va yisako timhaka kasi kuya lamulwa ngu mfumeli, Abhisalome a ti kova dhana a txi vagela tiya: U wa didhoropani ka hayi kani? Se a txi khene: Txithumi txako nja lihunzu lokari la ka Israyeli. 3Sekoko Abhisalome a to m'gela ku khene: Wona! Timhaka tako nda tinene, ti lulamile, kambe kha ku na wu a no kuengisa ka didhawa da mfumeli. 4A to khene kambe Abhisalome: I ti ko ani ni ti ko vekilwe kuva mlamuli ditikoni, kasi ku votshe vathu vale va tako kwangu ni timhaka, ni ta va lamula ngu kudikha.
5Ku ti ti maheka kambe taku, mbimo yile m'thu a tshuketako hafuhi e ta khizama masoni kwakwe, Abhisalome a ti ti nawuluta dianza dakwe e mñola, se e mpswopswa. 6Se Abhisalome a ti ti maha toneto ka votshe va ka Israyeli vale va tako ka mfumeli ku ta lamulwa; ngu kumaha keto, Abhisalome a ti ti ndinda timbilu ta vathu va ka Israyeli.
7Msana ka mune wa magumi a malembe, a Abhisalome a to khene ka mfumeli: Ni kombela kuya Hebroni ni ya hetisa txixambanyo txangu txi ni nga txi maha ka Mkoma. 8Nguko mbimo yile ani txithumi txako ni nga ti ti zumba Gesuri, ka Siriya, ni xambanyile, ni txi khani: Ngako Mkoma a txo ni wuyisa kambe Jerusalema, ni na ya thumela Mkoma.
9Sekoko mfumeli a to m'gela ku khene: Tsula ngu kuthutha. Se a to khukha e tsula Hebroni. 10Se Abhisalome a to rumela tixoli ka totshe tihunzu ta ka Israyeli, a txi khene: Mbimo yi mi nopfa kuveta ka minpundu, wombani mi txi khanu: Abhisalome wa fuma Hebroni.
11Se Abhisalome a ti rambile 200 wa vavamna va Jerusalema, kambe va to tsimbila mhulahula, nguko va si zivi txilo ka mhaka yile.
12Mbimo yile Abhisalome a nga ti maha mphaxo wakwe, a to ruma vathu veya dhana Ayitofeli, wa Giloni, didhota da Dhavhidha, didhoropani kwakwe ka Gilo; se txikungo txi to tsana, se vathu va to ta talelana ka Abhisalome.
13Sekoko kutota mtumi ka Dhavhidha, a txi ta khene: Timbilu ta vathu va ka Israyeli ti londetela Abhisalome.
14Se Dhavhidha a to khene ka sithumi sakwe sotshe sile a nga ti ti naso ani Jerusalema: Khukhani hi tutuma, nguko kha hi na mbi huluka masoni ka Abhisalome. Kuluvetani mi tsula, nguko a nga thuka e kuluveta a txi hi mana 15Sekoko sithumi sa mfumeli si to gela mfumeli si txi kha sona: Wona taku, sithumi sako si na maha totshe ti mfumeli, nyamne wathu a ti lavako.
16Se mfumeli a to tsula kumweko ni ngamu yakwe yotshe, ngu minenge, kambe a to siya digumi da vasikati vakwe vavadotho ve xayisa m'ti.
17Se mfumeli a to huma, ni vathu votshe ngu minenge, veya ema ka wukhalo wa kule nyana. 18Sithumi sakwe sotshe si to tsimbila ngu madhawani kwakwe, Vakereti votshe, ni votshe Vapeleti, ni votshe Vageti, ni 600 wa vavamna va nga ti tile ngu Gati, va to tsimbila ngu masoni ka mfumeli. 19Mfumeli a txi khene ka Itayi, Mugeti: Ngu kutxani u tsula ni nathu kani? Tshumela u ya zumba ni wule i ku mfumeli, nguko awe u muluveli, aniko u na tshumelela ka wukhalo wako. 20U bwakile nyamnova, se ina ni nga kuteka nyamsi u tsula ni nathu kani? 21Kambe Itayi a to xamula mfumeli, a txi khene: Hanya Mkoma, ni kuhanya mfumeli, nyamne wangu, ti to kotshe mu mfumeli, nyamne wangu, a noya kona, mwendo kufani, mwendo ngu hanyani, ngu ditshuri txithumi txako txi na va koneho.
22Sekoko Dhavhidha a to khene ka Itayi: Ngono, thangela masoni. Ngu kumaha keto, Itayi, Mugeti, a to thangela masoni kumweko ni votshe vathu vakwe, ni votshe vanana vale a nga ti navo. 23Se mbimo yile vathu votshe va nga txi pinda, ditiko dotshe di to dila ngutu, nene mfumeli a to pinda ngu txinambwanani ka Cedroni, se vathu votshe va to pinda ngu nzila yo ya txiwulani.
24Wona taku Zadhoki nene a ti ti ho koneho kumweko ni votshe Valevhi vale va nga ti rwate dibhokiso da txitumelelano txa Txizimu; se va to veka koneho dibhokiso da Txizimu; se Abhiyatari a to kwelela kala kuza vathu votshe ve guma kuhuma didhoropani. 25Sekoko mfumeli a to khene ka Zadhoki: Tshumeta dibhokiso da Txizimu didhoropani; kambe ni txi na mana mathomo masoni ka Mkoma, a na ni tshumetela eya ni komba dona ni nyumba ya dona. 26Kambe nga ku Mkoma a txo khene: Kha ni ku tsakeli; ngani wuwa, a na mahe kudhunda kwakwe ngu ngani.
27Mfumeli a to engeta a txi khene ka Zadhoki, mphaxeli: Ina hi ngawe m'huti kani? Tshumela ngu kudikha wu ya didhoropani kumweko ni vanana vanu va vambidi, Ayimahasi mwanako, ni Jonatani, mwana Abhiyatari. 28Wonani ta ku ani na zumba tithembweni ta txiwulani kala kuza ni mana thenga yanu.
29Sekoko Zadhoki ni Abhiyatari va to tshumela ve teka dibhokiso da Txizimu diya Jerusalema; se veya zumba koneyo.
30Se Dhavhidha a to kwelela ngu mmango wa miolivha, na a txi dila, a di fenengetile msungo, a to tsimbila asi ya ambala txilo mikondoni; se votshe vathu vale a nga ti nayo va to ti fenengeta misungo yawe ve kwelela va txi dila. 31Sekoko va to zivisa Dhavhidha, va txi kha vona: Ayitofeli nene a hagari ka vale va emako ni Abhisalome. Se Dhavhidha a to khene: Awe Mkoma, hundulusa txikungo txa Ayitofeli.
32Mbimo yile Dhavhidha a nga hoka txitimwi ka mmango kuya khozela Txizimu kona, wona taku Husayi, Muaraki, a tile e ta manana nayo, ni txyambalo txo sawuleka ni mafu ha msungo. 33Se Dhavhidha a to m'gela ku khene: Ngako u txo tshawunyeta ni nani, wu na ni nemetisela. 34Kambe ngako u txo tshumela uya didhoropani u ya gela Abhisalome u txi khawe: Awe mfumeli, ani ni na maha txithumi txako, nga kule ni kale ni nga ti ti txithumi txa tate wako, ni konkuwa ani ni na maha txithumi txako, se wu na mana ku ni vhuna kukaneta wudhota wa Ayitofeli. 35Se mphaxeli Zadhoki ni Abhiyatari va nga ni nawe kani? Se totshe timhaka ti wu no tipfa ka mfumeli a na ya zivisa Zadhoki ni Abhiyatari, vaphaxeli. 36Wona taku, va ni vanana vawe va vambidi: Ayimahasi mwana Zadhoki, ni Jonatani, mwana Abhiyatari; ngu dianza dawe, mi na ni zivisa totshe tile mi no tipfa.
37Husayi mungana wa Dhavhidha, a to tshumela eya didhoropani; aniko Abhisalome a to wulela Jerusalema.
Currently Selected:
2 Samuwele 15: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
