2 Samuwele 17
17
Husayi e khulumetela txikungo txa Ayitofeli
1Ayitofeli a to khene kambe ka Abhisalome: Ni tumelele ni sawula 12.000 wa vavamna, se ni na khukha ni londeta Dhavhidha wusiku wuwa. 2Kambe ni na ya mmana a di karate, a di gumile mtamo; ni m'dhukisa, se votshe vathu vale a ku navo va na tutuma; sekoko na daya mfumeli ekha. 3Sekoko ni na tshumeta votshe vathu ve ta kwako, nguko m'thu wule u mlavako, a fana ni kuwuya ka votshe; ngu kumaha keto, votshe vathu va na maneka kudikhani.
4Se dipswi diya di to maneka i di da dinene masoni ka Abhisalome, ni masoni ka otshe madhota a va ka Israyeli.
5Kambe Abhisalome a to khene: Konkuwa dhanani Husayi, muariki, hi tapfa ti nene a no womba.
6Se a di hokile Husayi ka Abhisalome, Abhisalome a to khene kwakwe: Ayitofeli a wombile tiya; Ina hi na maha madingano ni dipswi dakwe kani? U txi ahim-him, womba tako.
7Sekoko Husayi a to khene ka Abhisalome: Wudhota wu Ayitofeli a nga kugela hi nga wa wunene. 8Husayi a to engeta a txi khene: Awe wa m'ziva kha kwati tate wako ni vathu vakwe, taku mbathu va mtamo, va mahenyelo o fana ni a txingwingwi txo mwalalewa ngu vanana txitingani; nene tate wako, m'thu wa tiyimbi, kha na mbi otela wukhalo wumwewo ni vathu. 9Wona, konkuwa a mbharamile ka diphala dokari, mwendo ka wumwani wukhalo; se ku na maheka tito, ku txi dawa vokari hagari kwawe, ni wuhi wu a no tipfa a na khene: Vathu va Abhisalome va xutwe! 10Sekoko hambi wamwamna wa mtamo, wa mbilu yo nga ya ngonyamo, kha ditshuri a na tsivala; nguko votshe va ka Israyeli va tiziva ti to tate wako a ni mtamo, ni vavamna vale a ku navo va ni mtamo. 11Aniko ani ni womba tito, votshe va ka Israyeli va na ti pate kwako, ngu kukuluveta, kukhukhela Dhani kala Bhersebha, va di tate kufana ni mtxhefa wa lineneni, ni ti to awe upune tsula kulwani. 12Sekoko hi na m'yela ni hayi amu a no maneka kona, se hi nawa txitimwi kwakwe kufana ni mwando u wako txitimwi ka mafu; kha ku na mbi sala ni wammweyo kwakwe hambi ka votshe vathu vale a ku navo. 13Se ngako a txo tutuma eya ka didhoropa dokari, votshe va ka Israyeli va na tisa tingoti ka didhoropa donedo; aniko hi na di ndinda kala txinambwanani, kuza ku si sali txirigwana ni txa tximwetxo ka dona.
14Sekoko Abhisalome ni votshe vavamna va ka Israyeli va to kha vona: Mapswi a Husayi, muariki, ma pfala kupinda a Ayitofeli ( nguko Mkoma a rumisile toneto, kasi kutxhipisa mapswi amanene a Ayitofeli, kuva Mkoma e tisa dikhombo txitimwi ka Abhisalome).
15Se Husayi a to khene ka Zadhoki ni ka Abhiyatari, vaphaxeli: Ayitofeli a wombile tiya ni tiya ka Abhisalome ni ka madhota a va ka Israyeli; aniko ani ni wombile tiya ni tiya. 16Konkuwa koko, rumelani dipswi ka Dhavhidha ngu kukuluveta, mi txi khanu: U nga otele wusiku wuwa, timbalani ka siwula, kambe pinda ngu kukuluveta u ya ka didhawa dimwani, kasiku mfumeli ni votshe vathu vale a ku navo va si loviswi.
17Jonatani ni Ayimahasi koko, va ti ti zumbile kumweko hafuhi ni txisima txa Rogeli, se txithumi txa txisikati txi to ya womba, se vona va to ya gela mfumeli Dhavhidha, nguko ti si laveki kuwonwa va txi wulela didhoropani. 18Aniko mfana wokari a to va wona, se eya gela Abhisalome. Kambe ngu wumbidi wawe va to khukha ngu kukuluveta, veya wulela nyumbani ka mmweyo wa wamwamna, kona Bhawurimi, wule a nga ti ti ni txisima m'tini kwakwe, se va to ngirimela mndani ka txona. 19Se msikati wakwe a to teka txifenengeto, e fenengeta txitimwi ka txisima, kambe e xwayela tindoho txitimwi ka txona, ngu kumaha keto, kha ka ziwa txilo. 20Si di hokile koko sithumi sa Abhisalome ka m'ti wa wule wamsikati, si to kha sona: Va hayi Ayimahasi ni Jonatani kani? Se wamsikati a to khene kwawe: Va txhatukile mnambo! Se va di va lavile, va si vamani, va to tshumela veya Jerusalema. 21Se msana ka kuva va di tsute, Jonatani ni Ayimahasi va to huma ngu txisima ve tsula, veya gela Dhavhidha, va txi kha vona: Khukhani, mi txhatuka mnambo ngu kukuluveta, nguko Ayitofeli a mahile txikungo txo mi wukela.
22Sekoko Dhavhidha ni votshe vathu vale a nga ti navo va to khukha ve txhatuka Jordhani, kala mbimo yi di nga txa ku sa sala ni wammweyo kutxhatuka Jordhani.
23Se Ayitofeli a di woni koko, taku txikungo txakwe kha txa londetwa, a to sungelela mbongola yakwe, e khukha e tsula m'tini kwakwe, ka didhoropa dakwe, eya lulamisela nyumbani kwakwe e ti sunga: se efa, e tshotshwa ka dithitha da tate vakwe.
24Se Dhavhidha a to ta Mahanayime; kambe Abhisalome a to txhatuka Jordhani ni votshe vavamna va ka Israyeli vale a nga ti ti navo. 25Se Abhisalome a to veka Amasa kuva mthangela wa wugovelo ka wukhalo wa Jowabhi. Kambe Amasa i ti ti mwanana wa wamwana wule ditina dakwe i nga ti ti Itra, Muisrayeli, awule a nga ti tekani ni Abhigayeli, mwana Nahasi, mwanawe wa Zeruiya, mame wa Jowabhi. 26Va ka Israyeli koko, ni Abhisalome va to ya gova ditikoni ka Gileyadhi.
27Se ku to maheka taku, mbimo yile Dhavhidha a nga hoka Mahanayime, Sobhi, mwana Nahasi, wa Rabha, wa vanana va ka Amoni, ni Makiri, mwana Amiyeli, wa Lo-Dhebhari, ni Bharizilayi, mugileyadhi, wa Rogelini, 28va to teka mataho, ni mikamba, ni siya so wumbwa, ni fulaho, ni sevhadha, ni mpupu, ni tindoho to yokwa, ni tigongo, ni tinyawa, 29ni wulombe, ni mafura a masi, ni tinvuta, ni magadi a masi a tihomu, ve si tisa ka Dhavhidha ni ka vathu vale a nga ti navo kuva ve ta dya, nguko va ti kha vona: Vathu vava va ni nzala, va karate, va ni ditora, amu txiwulani.
Currently Selected:
2 Samuwele 17: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
