2 Vafumeli 14
14
Kufuma ka Amaziya kona Judha
(2 Makronika 25:1-24)
1Ka dilembe da wumbidi da kufuma ka Jehowasi mwana Jehowakazi, mfumeli wa ka Israyeli, Amaziya mwana Jehowasi, a to khata kufumela ditiko da ka Judha. 2A khatile kufuma a di ni magumi mambidi a malembe ni mtxhanu, se a to fuma magumi mambidi a malembe ni mtxhanu ni mune kona Jerusalema. Ditina da mwamwakwe i ti ti Jehowadha wa Jerusalema. 3Amaziya a mahile to lulama masoni ka Mkoma, hambiko a nga mbi fana ni tate wakwe Dhavhidha; a to maha nga tile a nga mahisa tona tate wakwe Jowasi. 4Aniko siluvelo kha sa khundumuswa, nguko vathu va txi ngadi ve phaxela kona, ni kuhisa dibaselo.
5Mbimo yile wu nga tsaniswa wukoma manzani kwakwe, a to dayela sithumi sakwe sile si nga daya mfumeli, tate wakwe mbimo yile i nga ti mfumeli. 6Hambi keto kha dayela vanana va sidayi sile, nga kule ti nga bhalwa ka dibhuku da Mlayo wa Mosi, eho Mkoma a nga ninga txileleto txo khene: Kha mi na mbi daya vaveleki ngu mhaka ya vanana, kambe kha mi na mbi daya vanana ngu mhaka ya vaveleki; aniko mmweyo ni mmweyo a na dawa ngu txionho txakwe.
7Amaziya a to daya 10.000 wa va ka Edhomi mkovani ka Mnyu, se e honyola didhoropa da Sela yimbini; a to di raya ditina daku i Jokiteli, kala ka ditshiku da nyamsi.
8Sekoko Amaziya a to rumela mitumi ka Jehowasi, mwana Jehowakazi, mwana Jehu, mfumeli wa ka Israyeli, a txi khene: Ngono hi ta wonana khohe ni khohe. 9Sekoko Jehowasi mfumeli wa ka Israyeli, e rumela dipswi ka Amaziya mfumeli wa ka Judha a txi khene:
Mpa wule wu ku Libhanoni wu to rumela dipswi ka mkedhari wu ku Libhanoni daku kha wona: Ningela mwanana wako eva msikati wa mwanana wangu; aniko sihari sa txitinga si nga ti ti Libhanoni, si to pinda si kandetela mkedhari. 10Kha ditshuri, u pekile va ka Edhomi, se mbilu yako yi ti kukumukisile; ti gulete ngu ndumeyo, u zumba m'tini kwako; se u na ti wuletelela txani kubihani, u txi na gwitisa kuwa awe, kumweko ni ditiko da ka Judha kani?
11Aniko Amaziya kha pfisisa; se Jehowasi mfumeli wa ka Israyeli, ni Amaziya, mfumeli wa ka Judha, va to manana ve wonana khohe ni khohe kona Bheti-Semesi, ku manekako ditikoni ka Judha. 12Se Judha a to pekwa masoni ka Israyeli, se mmweyo ni mmweyo a to tutuma e tsula ditendani kwakwe. 13Se Jehowasi mfumeli wa ka Israyeli, a to teka Amaziya, mfumeli wa ka Judha, mwana Jowasi, mwana Akaziya, kona Bheti-Semesi, eta Jerusalema, a to dhoda diguma da Jerusalema, kukhukhela ka ditimba da ka Efrayime, kala ka ditimba da ha dikhonani, 400 wa mikono. 14A to teka yotshe silivhela ni nzalama, ni sotshe siya si nga txi maneka Nyumbani ka Mkoma, ni tithomba ta nyumbani ka mfumeli, kumweko ni tikhumbi, e tshumela eya Samariya.
15Kasi ngu kutala ka mithumo yile a nga yi maha Jehowasi, ni tile a nga thuma, ni mtamo wakwe, ni tile a nga lwisa tona ni Amaziya mfumeli wa ka Judha, ina ti ngava ti sa bhalwa ka dibhuku da Matimu a Vafumeli va ka Israyeli kani? 16Se Jehowasi a to otela ka vatate vakwe, e tshotshwa Samariya, ni vafumeli va ka Israyeli; se mwanana wa kona Jerobhowamu, a to fuma ka wukhalo wakwe.
Kufa ka mfumeli Amaziya
(2 Makronika 25:25-28)
17Se Amaziya, mwana Jowasi, mfumeli wa ka Judha, a to hanya digumi da malembe ni mtxhanu, msana ka kufa ka Jehowasi, mwana Jehowakazi, mfumeli wa ka Israyeli. 18Kasi ngu wungi wa mithumo ya Amaziya, ina yi nga va yi sa bhalwa ka dibhuku da Matimu ya vafumeli va ka Judha kani?
19Se va to maha txikungo txo mu wukela Jerusalema, se e tutuma e tsula Lakisi; se ku to rumelwa vavamna vo mlondisa kona Lakisi; se va m'dayete kona. 20Va to msanzeka txitimwi ka mahantxhi, ve ta mtshotsha Jerusalema, kumweko ni vatate vakwe, didhoropani ka Dhavhidha. 21Se votshe vathu va ka Judha va to teka Azariya, a nga ti ti ni digumi da malembe ni mtxhanu ni dimwedo, va to mfumisa wukhaloni ka tate wakwe Amaziya. 22Azariya a to aka didhoropa da Elate e di tshumetela Judha, msana ka kuva mfumeli a di otete ka vatate vakwe.
Kufuma ka Jerobhowamu wa wumbidi kona Israyeli
23Ka dilembe da digumi ni mtxhanu da kufuma ka Amaziya, mwana Jehowasi, mfumeli wa ka Judha, Jerobhowamu mwana Jehowasi mfumeli wa ka Israyeli, a to khata kufumela Samariya, a to fuma mune wa magumi a malembe ni dilembe dimwedo. 24Se a to maha to biha masoni ka Mkoma; kha nga dhuka e hambuka ka txionho ni txa tximwetxo txa Jerobhowamu, mwana Nebhate, a nga onhisa Israyeli. 25#Wona ni ka: Joh. 1:1. Kambe ene a wusile mihingano ya Israyeli, kukhukhela txidingeni ka didhoropa da Hamati, kala ka Linene la Libalani, madingano ni dipswi da Mkoma, Txizimu txa ka Israyeli, nga kule a nga womba ngu mthumo wa mprofeti Jona, mwana mprofeti Amitayi, awule i nga ti ti wa Gati-Heferi.
26Nguko Mkoma a woni to kuxaniseka ka Israyeli i ti ti ko nemela ngutu, kambe ku si nga ho kuhambana ka wo sungwa ni wo txhatxheka, hambi wo vhunetela Israyeli. 27Kambe Mkoma si se womba txilo ngu kupfhita ditina da Israyeli hahatshi ka nzuma; hambi keto, a va txhatxhile ngu dianza da Jerobhowamu, mwana Jehowasi.
28Kasi ngu wungi wa mithumo ya Jerobhowamu, ka totshe tile a nga maha, ni mtamo wakwe, a tile a nga lwisa tona e wuyisa madhoropa a Dhamasku ni Hamati, ma lumbako Judha, na i di mfumeli wa Israyeli, ina ti nga va ti sa bhalwa amu ka dibhuku da Matimu a Vafumeli va ka Israyeli kani? 29Se Jerobhowamu a to otela ka vatate vakwe, kumweko ni vafumeli va ka Israyeli; se mwanana wa kona Zakariya a to fuma ka wukhalo wakwe.
Currently Selected:
2 Vafumeli 14: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
