2 Vafumeli 15
15
Kufuma ka Azariya#15:0 Azariya: a dhanwako kambe ku i Uziya. kona Judha
(2 Makronika 26:1-23)
1Ka dilembe da magumi mambidi a malembe ni mtxhanu ni mambidi, a kufuma ka Jerobhowamu kona Israyeli, Azariya, mwana Amaziya, mfumeli wa ka Judha, a to khata kufuma. 2A khatile kufuma a ti ni digumi da malembe ni mtxhanu ni dimwedo, a to fumela Jerusalema mtxhanu wa magumi a malembe ni malembe mambidi; ditina da mwamwakwe i ti ti Jekoliya, wa Jerusalema. 3Se a to maha tile i ngadi ta tinene masoni ka Mkoma, kufana ni totshe tile a nga mahisa tona tate wakwe Amaziya. 4Nziluvelo dwe si nga mbi khundumuswa, nguko vathu va txi ngadi ve phaxela kona ni kuhisa dibaselo. 5Se Mkoma a to peka mfumeli, eva ni tshekela kala ka ditshiku da kufa kwakwe, na a txi zumba ka nyumba ya didhawa; ngu kumaha keto, Jothamu mwanana wa mfumeli, ngene a nga ti nyumbani ka wukoma, a txi lamula vathu va ditiko.
6Kasi ngu kutala ka mithumo ya Azariya, ni totshe ti a nga maha, ina ti nga va ti sa bhalwa ka dibhuku da Matimu a vafumeli va ka Judha kani? 7#Wona ni ka: Isa. 6:1. Se Azariya a to otela ka vatate vakwe, ve mtshosha hafuhi ni vatate vakwe, Didhoropani ka Dhavhidha; se mwanana wa kona Jothamu, a to fuma ka wukhalo wakwe.
Kufuma ka Zakariya kona Israyeli
8Ka dilembe da magumi mararu ni mtxhanu ni mararu, a kufuma ka Azariya, mfumeli wa ka Judha, ku to fuma Zakariya, mwana Jerobhowamu, a to fumela Israyeli, a di Samariya, mtxhanu wa mitxima ni wumwewo. 9Se a to maha to biha masoni ka Mkoma, nga tile va ngadi mahile vatate vakwe; kha nga hambuka ka sionho sa Jerobhowamu, mwana Nebhate, a nga onhisa Israyeli. 10Se Salumi, mwana Jabhe, a to m'henyela e mlwisa masoni ka vathu, e m'daya, se e fuma ka wukhalo wakwe.
11Kasi ngu wungi wa mithumo ya Zakariya, ngu yona yi nga bhalwa amu ka dibhuku da Matimu a Vafumeli va ka Israyeli.
12Adiya ngu dona dipswi dile Mkoma a ngadi womba ka Jehu, a txi khene: Vanana vako kala ka liveleko la wumune, va na zumba ha txikhaloni txa wukoma txa Israyeli. Se ti to mahekisa toneto.
Kufuma ka Salumi kona Israyeli
13Salumi mwana Jabhe, a khatile kufuma ngu dilembe da magumi mararu ni mtxhanu wa malembe ni mune a kufuma ka Uziya, mfumeli wa ka Judha; se a to fuma mtxima wumwewo.
14Nguko Menayemi, mwana Gadhi, a to kwelela ngu Tiriza eta Samariya, e ta lwisa Salumi, mwana Jabhe, kona Samariya, se a to m'daya, e fuma ka wukhalo wakwe. 15Kasi ngu kutala ka mithumo ya Salumi ni kuhenya kwakwe, ti bhatwe ka dibhuku da Matimu ya vafumeli va ka Israyeli. 16Sekoko Menayemi a to khundumusa didhoropa da Tifisa, ni votshe vale va nga ti tiho ka dona, a mahisileto nguko didhoropa di sa tumela kukhoza masoni kwakwe; a to va lwisa, se e bhandelela ngu hagari votshe vavasikati vale va nga ti ni sirumbu.
Kufuma ka Menayemi kona Israyeli
17Kukhukhela ka dilembe da magumi mararu a malembe ni mtxhanu ni mararu, a kufuma ka Azariya mfumeli wa ka Judha, Menayemi, mwana Gadhi, a to khata kufuma txitimwi ka Israyeli, e fumela Samariya digumi da malembe. 18Se a to maha wubihi masoni ka Mkoma; ka otshe masiku akwe kha nga hambuka ka sionho sa Jerobhowamu mwana Nebhate, a nga onhisa Israyeli. 19Sekoko ku to humelela Puli, mfumeli wa Asiriya e lwisa ditiko; se Menayemi a to ningela ka Puli 1.000 wa titalenta ta silivhela, kasi ku dianza dakwe di txi mtsanisa, ni kutsanisa mfumo manzani kwakwe. 20Se Menayemi a to humisa maleyo ka Israyeli, yi txi huma ngu ka vanyatithomba, i ku mtxhanu wa magumi a tipimo to wuyeletwa, ka m'thu ni m'thu, e ningela ka mfumeli wa Asiriya, se kha zumba kambe kedo ditiko.
21Kasi ngu kutala ka mithumo ya Menayemi ni totshe ti a nga maha, ina ti nga va ti sa bhalwa ka dibhuku da Matimu ya vafumeli va ka Israyeli kani? 22Se Menayemi a to otela ka vatate vakwe, se mwanana wa kona Pekaya a to fuma ka wukhalo wakwe.
Kufuma ka Pekaya kona Israyeli
23Ka dilembe da mtxhanu wa magumi a kufuma ka Azariya, mfumeli wa ka Judha, Pekaya, mwana Menayemi, a to khata kufuma txitimwi ka Israyeli na a di Samariya, malembe mambidi. 24Se a to maha wubihi masoni ka Mkoma; kha nga dhuka e hambuka ka sionho sa Jerobhowamu, mwana Nebhate, a nga onhisa Israyeli. 25Se Peka, mwana Ramaliya, mthangeli wa yimbi, a to mlwisa e m'daya, kona Samariya, hamthandani ka nyumba ya mfumeli, kumweko ni Argobhe ni Ariye; va ti ti nayo mtxhanu wa vavamna, i ku vamwevo va vanana va ka Gileyadhi; na a ti m'date a to fuma ka wukhalo wakwe.
26Kasi ngu kutala ka mithumo ya Pekaya ni totshe tile a nga maha, ti bhatwe amu ka dibhuku da Matimu a Vafumeli va ka Israyeli.
Kufuma ka Peka kona Israyeli
27Ka dilembe da mtxhanu wa magumi ni malembe mambidi a kufuma ka Azariya, mfumeli wa ka Judha, Peka, mwana Remaliya, a to khata kufuma txitimwi ka Israyeli, na a di Samariya, magumi mambidi a malembe. 28Se a to maha wubihi masoni ka Mkoma; kha nga dhuka e hambuka ka sionho sa Jerobhowamu, mwana Nebhate, a nga onhisa Israyeli.
29Ka masiku a Peka, mfumeli wa ka Israyeli, a tile Tigilati-Pileseri, mfumeli wa Asiriya, e ta honyola madhoropa ya Ijomi, ni Abheli-Bheti-Mahaka, ni Janowa, ni Kedhesi, ni Hazori, ni Gileyadhi, ni Galileya, ni dotshe ditiko da Naftali, a va yisa Asiriya.
30Se Hoseya, mwana Ela, a to wukela Peka, mwana Remaliya, e mlwisa, a txi m'daya, se e fuma ka wukhalo wakwe, ka dilembe da magumi mambidi da kufuma ka Jothamu, mwana Uziya.
31Kasi ngu kutala ka mithumo ya Peka, ni totshe ti a nga maha, ti bhatwe mu ka dibhuku da Matimu a Vafumeli va ka Israyeli.
Kufuma ka Jothamu wa Judha
(2 Makronika 27:1-9)
32Ka dilembe da wumbidi da kufuma ka Peka mwana Remaliya, mfumeli wa ka Israyeli, a to khata kufuma Jothamu, mwana Uziya, mfumeli wa ka Judha. 33I di wa tanga ya magumi mambidi a malembe ni mtxhanu, mbimo yile a nga khata kufuma; se a to fumela Jerusalema digumi da malembe ni mtxhanu ni dimwedo; ditina da mwamwakwe i ti ti Jerusa, mwana Zadhoki. 34Se a to maha ti i ngadi ta tinene masoni ka Mkoma, a to maha totshe ku nga tile a nga mahisa tona tate wakwe Uziya. 35Nziluvelo dwe si nga mbi khundumuswa, nguko vathu va txi ngadi ve phaxela kona ni kuhisa dibaselo. Jothamu ngene a nga aka Ditimba do Guleka da Nyumba ya Mkoma.
36Kasi ngu kutala ka mithumo ya Jothamu, ni totshe ti a nga maha, ina ti nga va ti sa bhalwa amu ka dibhuku da Matimu a vafumeli va ka Judha kani? 37Ngu ka ona ale masiku Mkoma a to khata kurumela Rezimi mfumeli wa Siriya, ni Peka mwana Ramaliya, kuya wukela Judha. 38Se Jothamu a to otela ka vatate vakwe, e tshotshwa hafuhi ni vatate vakwe, didhoropani ka tate wakwe Dhavhidha; se mwanana wa kona Akazi, a to fuma ka wukhalo wakwe.
Currently Selected:
2 Vafumeli 15: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
