2 Vafumeli 13
13
Kufuma ka Jehowakazi kona Israyeli
1Ka dilembe da magumi mambidi ni malembe mararu a kufuma ka Jowasi, mwana Akaziya mfumeli wa ka Judha, Jehowakazi, mwana Jehu, a to khata kufuma Israyeli, kona Samariya, se a to fumela digumi da malembe ni mtxhanu ni mambidi. 2A to maha a ti i singako ta tinene masoni ka Mkoma, nguko a londisile sionho sa Jerobhowamu, mwana Nabhote, a nga onhisa Israyeli, kha hambana ale. 3Ngu kumaha keto, kuhenya ka Mkoma ku to tura ka Israyeli, e va ningela manzani ka Hazayeli, mfumeli wa Siriya, ni manzani ka Bheni-Hadhadhe mwana Hazayeli, ka otshe masiku wawe. 4Sekoko Jehowakazi a to dila masoni ka Mkoma, se Mkoma a to mu engisa; nguko a woni kukhinyavezwa ka Israyeli, nguko a txi va khinyaveza mfumeli wa Siriya. 5Se Mkoma a to ninga muhanyisi ka Israyeli, se vanana va ka Israyeli va to huma ngu manzani ka Vasiriya, veya zumba matendani kwawe, nga kukhatani. 6(Hambi keto, kha va hambuka ka sionho sa nyumba ya ka Jerobhowamu, yi yi nga onhisa Israyeli; nguko va to tsimbila ka sona; ni sona sithombe si to simama si di emile Samariya.)
7Kha nga siya vathu votala ka Jehowakazi, hahanze ka mtxhanu wa magumi a vagadhi va mahantxhi, ni digumi da sikotxikani, ni 10.000 wa vavamna va kutsimbila ngu mikondo, ngako mfumeli wa Siriya a ngadi va khundumusile, e va tshinda va txi nga mpupu.
8Kasi ngu kutala ka mithumo ya Jehowakazi, ni ka totshe ti a nga maha, ni mtamo wakwe, ti ngava ti sa bhalwa ka Dibhuku da Matimu a Vafumeli va Israyeli kani? 9Se Jehowakazi a to otela ka vatate vakwe, e tshotshwa Samariya; se mwanana wa kona Jehowakazi a to fuma ka wukhalo wakwe.
Kufuma ka Jehowakazi kona Israyeli
10Ka dilembe da magumi mararu ni mtxhanu wa malembe ni mambidi a Jowasi, mfumeli wa ka Judha, Jehowasi, mwana Jehowakazi, a to khata kufuma txitimwi ka Israyeli, kona Samariya, se a to fuma digumi da malembe ni mtxhanu ni dimwedo. 11Se a to maha kubiha masoni ka Mkoma; kha nga hambuka ka txionho ni txa tximwetxo txa Jerobhowamu, mwana Nebhate, a nga onhisa Israyeli, a to tsimbila ka sona. 12Kasi ngu kutala ka mithumo ya Jehowasi, ni ka totshe ti a nga maha, ni mtamo wakwe, a nga lwa ngu wona ni Amaziya mfumeli wa ka Judha, ti ngava ti sa bhalwa ka Dibhuku da Matimu a Vafumeli va Israyeli kani? 13Se Jehowasi a to otela ka vatate vakwe, se Jerobhowamu a to zumba ka txikhalo txa wukoma; se Jehowasi a to tshotshwa Samariya, kumweko ni vafumeli va ka Israyeli.
Kufa ka Elixa
14 # Wona ni ka: 2 Vafu. 2:12. Se Elixa a lwate ngu wu lwati wule a nga za a txi fa ngu wona; se Jehowasi mfumeli wa Israyeli a to tsula eya mxola, a to dila khoheni kwakwe, a txi khene: Tata wangu, tata wangu, sikotxikani sa Israyeli ni vagadhi va mahantxhi a kona.
15Se Elixa a to m'gela tiya: Teka wulaho ni lingove. Se ene a to teka wulaho ni lingove. 16Se Elixa a to khene ka mfumeli wa ka Israyeli: Veka dianza dako aha ka wulaho; se a to veka dianza dakwe aha ka wulaho. Elixa a to sanzeka manza akwe txitimwi ka manza a mfumeli. 17A to khene kwakwe: Tula difasitela di di nga rendekela wutxani. A to di tula, sekoko Elixa a to khene: Jangeta lingove. Mfumeli a to jangeta, se Elixa a nje khene: Lingove la ku thunkunyula kwako, ngu thunkunyula ka Mkoma masoni ka Vasiriya; nguko u na xula Vasiriya ditikoni ka Afeki, uza u va fuvisa.
18Elixa a to khene kambe ka Jehowasi: Teka tingove. Mfumeli a to teka tingove. Sekoko Elixa a to khene ka mfumeli wa ka Israyeli: Zima ha mafuni, a to zima kuraru ha mafuni a txi ema. 19Se m'thu wa Txizimu a to henya ngutu, a nje khene: U ti ti dingani kuzima ka mtxhanu hambi mtxhanu ni kumweko; ati tiku u ndi na lwisa Vasiriya uza u va heta; sekoko konkuwa u na lwisa Vasiriya kuraru wa kona.
20Ngu msana a to fa Elixa, va txi mtshotsha. Sekoko masotxhwa a va ka Mowabhi ma to wulela ditikoni, kukhatani ka dilembe. 21Ku to maheka ti to va txi tshotsha wamwamna wokari, va to wona sigevenga, se ve rinza wamwamna wule diphalani ka Elixa, se a to ya wa e peka marambu ya Elixa, a to wuka e ema ngu minenge yakwe.
Yimbi ya Israyeli ni Siriya
22Se Hazayeli mfumeli wa Siriya a to khinyaveza Israyeli ka otshe masiku a Jehowakazi. 23Sekoko Mkoma a to va pfela wumbilu, e va xanisekela, a to va rendekela ngu mhaka ya kuranda txitumelelano txakwe ni Abrahama, ni Isaake ni Jakobe; kha lava ku va khundumusa, kambe kha va tsotsha kule ni nene.
24Se Hazayeli, mfumeli wa Siriya a to fa; se mwanana wa kona Bheni-Hadhadhe a to fuma ka wukhalo wakwe. 25Se Jehowasi, mwana Jehowakazi, a to tshumela e honyola kambe madhoropa manzani ka Bheni-Hadhadhe, a ngadi ma tekile ngu kulwa manzani ka tate wakwe Jehowakazi, Jehowasi a to lwa kuraru, e teka kambe madhoropa a ka Israyeli.
Currently Selected:
2 Vafumeli 13: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
