2 Vafumeli 12
12
Kufuma ka Jowasi wa ka Judha
(2 Makronika 24:1-16)
1Ka dilembe da wutxhanu ni mambidi da kufuma ka Jehu, a to khata kufuma Jowasi kona Jerusalema, mune wa magumi a malembe; ditina da mwamwakwe i ti ti Zibhiya, wa Bherisebha. 2Jowasi a to maha to lulama masoni ka Mkoma, ka otshe masiku ale mphaxeli Joyadha i nga ti didhota dakwe. 3Nziluvelo dwe si nga mbi khundumuswa, nguko vathu va txi ngadi ve phaxela kona, ni kuhisa dibaselo.
4 # Wona ni ka: Eks. 30:11-16. Se Jowasi a to gela vaphaxeli ku khene: Male yotshe ya sile so sawuleka si tiswako Nyumbani ka Mkoma, kufana ni male ya sixambanyo, ni male ya m'thu ni m'thu madingano ni mtengo wa siya, ni yotshe male yi tiswako ngu mmweyo ni mmweyo ngu kutilava kwakwe, Nyumbani ka Mkoma, 5yi na amukelwa ngu vaphaxeli ka m'thu ni m'thu, ve lulamisela mule yi nga onheka nyumba.
6Ku to maheka taku, amu ka dilembe da magumi mambidi ni malembe mararu da kufuma ka Jowasi, vaphaxeli va si se lulamisela mule ku nga onhekela ka nyumba. 7Sekoko mfumeli Jowasi a to dhana mphaxeli Joyadha, ni vamwani vaphaxeli a txi ta va gela ku khene: Ngu kutxani mi si lulamisiko amule ko onhekela ka nyumba kani? Kukhukhela ka konkuwa, mi nga zumbeni kambe ni male ya vathu vanu, yi ningeleni kasi ku lulametela a mule nyumba yi nga onhekela.
8Se madhota ma to tumela ku va ma si zumbi kambe ni male ya vathu, hambi kululamisela mule ku nga onhekela ka nyumba.
9Ngu kumaha keto mphaxeli Joyadha a to teka dibhokiso, e dola ditshoko aha ka txi fenengeto, e veka hafuhi ni txiluvelo, ngu didhawa da txinene ka vale va nga txi wulela Nyumbani ka Mkoma; se vaphaxeli vale va nga txi wonelela txike txa ditimba, va ti ti veka konemo male yile yi nga txi tiswa Nyumbani ka Mkoma. 10Ku to maheka koko taku, mbimo yile va nga wona taku ku ni male yayingi amule ka dibhokiso, mabhalani wa mfumeli a ti ti kwelela ni mphaxeli wa hombe, va txi ya balela male yile yi nga txi maneka Nyumbani ka Mkoma, ve theletela mu ka masaka. 11Se maleyo yi ti ti pinda ngu txikaloni, yi ningelwa manzani ka vathangeli va kuakwa ka Nyumba ya Mkoma, se vona va txi hekhela vavati, ni votshe vale va nga txi lulamisela Nyumba ya Mkoma, 12ni vale vo aka ngu marigwi, ni vakeli va maphala a makhato a kuaka, kambe va txi xava mapulango ni marigwi, o lulamisela ngu ona amule ku nga onhekela ka Nyumba ya Mkoma, ni ka totshe ti ti nga txi laveka ka nyumba. 13Hambi keto, ngu male yile yi nga txi tiswa Nyumbani ka Mkoma, kha ka mahwa magombe a silivhela, hambi mafoloko ni mikamba, ni mipundu, mwendo simwani siya so mahwa ngu nzalama mwendo sa silivhela Nyumbani ka Mkoma. 14Nguko yotshe male yi txi ningwa vale va nga txi maha mthumo, ve lulamisela ngu yona Nyumba ya Mkoma. 15Kambe va ti si kombeli m'biko wa mthumo wa male yile, nguko i ti ti vo thembeka amu ka mathumiselo a male, va txi ningela ka vale va nga txi maha mthumo wa kona, nguko va txi maha ngu kuthembeka. 16Aniko male ya mningelo wa kudivalelwa, ni mningelo wa txionho, yi si tiswi Nyumbani ka Mkoma; kambe yi txi lumba vaphaxeli.
17Sekoko Hazayeli mfumeli wa Siriya, a to kwela e ya lwa, e honyola ditiko da Gate; ngu msana a to khata kulwisa Jerusalema. 18Sekoko Jowasi mfumeli wa ka Judha, a to honyola sotshe siya so sawuleka, asile Josafati, ni Jehoramu, ni Akaziya, i ku vatate vakwe, kambe mba fumeli va ka Judha, va nga ti si sawulekisile, ni yotshe nzalama yi nga maneka ka tithomba ta Nyumba ya Mkoma, ni ka nyumba ya mfumeli, e si rumela ka Hazayeli, mfumeli wa Siriya, sekoko a to khukha Jerusalema.
19Kasi kutala ka mithumo ya Jowasi, ni totshe ti a nga maha, ina ti nga va ti sa bhalwa ka dibhuku da Matimu a vafumeli va ka Judha kani?
20Se sithumi sa Jowasi si to khukha si txi m'wukela, va to m'dya nyumbani ka Milo, ka nzila yi yi ngirimelako yi txiya Sila. 21Nguko Jozakari, mwana Simeyate, ni Jozabhadhi, mwana Someri, sithumi sakwe va to m'daya, efa; se va to mtshotsha ni vatate vakwe Didhoropani ka Dhavhidha; se mwanana wa kona Amaziya, a to fuma ka wukhalo wakwe.
Currently Selected:
2 Vafumeli 12: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
