2 Vafumeli 11
11
Ataliya mfumeli wa txisikati wa ka Judha
(2 Makronika 22:10--23:15)
1Mbimo yile koko Ataliya, mwamwa Akaziya, a nga wona to mwanana wakwe a datwe, a to wuka e lovisa lihunzu la mfumeli. 2Aniko Jehosebha, mwana mfumeli Jehoramu, ndiya ya Akaziya, a to teka Jowasi, mwana Akaziya, e mpfhukisa hagari ka vanana va mfumeli, va nga txi va dayela, se a to m'veka nyumbani kumweko ni mxayisi wakwe, a txi msisela Ataliya, ngu kumaha keto, kha va m'daya. 3Se Jehosebha a to msisa Nyumbani ka Mkoma, mtxhanu wa malembe ni dimwedo; na Ataliya a txi fuma ditikoni.
4Se ka dilembe da wutxhanu ni mambidi, Joyadha a to rumela kudhana vathangeli va mazana, ni vathangeli va yimbi, ni vawoneleli, a txi wulela navo Nyumbani ka Mkoma, e va komba mwanana wa mfumeli. 5Se a to va ninga txileleto a txi khene: Awuwa ngu wona mthumo mi dinganako ku wu maha mitxawa yiraru: Mtxawa wumwewo wu na wulela ngu Sabbata, wu wonelela nyumba ya mfumeli; 6wumwani wu na zumba ngu ha ditimbani ka Suri; se wa wuraru wu na va ka ditimba da msana ka dile da vawoneleli; mi na woneleliseto m'ti wuwa, mi txi va rethela kule votshe. 7Se mitxawa yimbidi kwanu, yile yi no huma ngu Sabbata, yi na wonelela Nyumba ya Mkoma, hafuhi ni mfumeli. 8Mi na ranganyeta mfumeli, mmweyo ni mmweyo ni matxhari akwe manzani, se wule a no wulela hagari ka titxhatxha, a fanete kudawa; se anu mi na va ni mfumeli, ngako a txi huma, ni kuwulela.
9Vathangeli va mazana koko, va to maha nga tona tile a ngadi leletisile tona mphaxeli Joyadha, mmweyo ni mmweyo ni vathu vakwe, avale va nga txi wulela ni vale va nga txi huma ngu Sabbata, va to ta ka mphaxeli Joyadha. 10Se mphaxeli Joyadha, a to ningela matxhari ni sitxhavangu ka vathangeli va mazana, asile i ngadi sa mfumeli Dhavhidha, si ngadi Nyumbani ka Mkoma. 11Se vawoneleli va to emeka mmweyo ni mmweyo ni matxhari akwe manzani, kukhukhela ka didhawa da txinene ka nyumba kala ka didhawa da txibhabha, ve vhikela txiluvelo, ni nyumba ya mfumeli. 12Se Joyadha a to humisa Jowasi, mwanana wa mfumeli, e msanzeka m'bhoti, ni dibhuku da milayo, va to mfumisa, ve mtota, va txi bhabhwatela manza, na va txi kha vona: A na hanye mfumeli!
13Se Ataliya a ti pfite diguwa da vawoneleli ni da vathu, a to wulela hagari ka vathu, Nyumbani ka Mkoma. 14A to wona mfumeli wamphya hafuhi ni phande, nga tolovelo ya kona, ni vathangeli va yimbi, ni mipundu, hafuhi ni mfumeli, se votshe vathu va ditikoni va ti ti tsakile, ve veta mipundu; sekoko Ataliya a to vharula syambalo sakwe, a to kwangula a txi khene: Kuningelwa! Kuningelwa!
15Ngu konaho, mphaxeli Joyadha a to gela vathangeli va mazana va nga txi thangela tiyimbi ku khene: M'humiseni hahanze ka titxhatxha ta vawoneleli, se ni wuhi a no lava ku mlwela, m'dayeni ngu ditxhari. Nguko mphaxeli a ti khene: Mi nga m'dayeleni Nyumbani ka Mkoma.
16Se va to mñola, ve tsula nayo m'tini ka mfumeli, ngu nzila ya txike txa mahantxhi, veya m'dayela kona.
Kululamisa ka Joyadha
(2 Makronika 23:16-21)
17Se Joyadha a to maha txitumelelano hagari ka Mkoma, ni mfumeli ni vathu, ati taku va nave vathu va Mkoma. Ni txitumelelano hagari ka mfumeli ni vathu. 18Sekoko votshe vathu va to wulela nyumbani ka Bhahali, ve yi khundumusela, va to fayetela siluvelo sakwe ni sithombe sakwe, ve daya Matani mphaxeli wa Bhahali, hafuhi ni siluvelo. Sekoko mphaxeli Joyadha, a vekile vawoneleli Nyumbani ka Mkoma. 19Se a to teka vathangeli va mazana ni vathangeli va yimbi, ni va vawoneleli, ni votshe vathu va ditiko; va to khukha ngu Nyumbani ka Mkoma, na va txi tsimbila ngu nzila ya txike txa vawoneleli, veya nyumbani ka mfumeli, se ene a to khalahatsha txituluni ka vafumeli. 20Se votshe vathu va ditiko va to tsaka, didhoropa di to humula, msana ka kuva va ti date Ataliya ngu ditxhari, hafuhi ni nyumba ya mfumeli.
21Jowasi i ti ti wa tanga ya mtxhanu wa malembe ni mambidi, mbimo yile va nga mmaha mfumeli.
Currently Selected:
2 Vafumeli 11: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
