2 Makronika 9
9
Kuendelwa ka Solomoni ngu mfumeli wa txisikati wa Sabha
(1 Vafumeli 10:1-13)
1 # Wona ni ka: Mat. 12:42; Luk. 11:31. Mbimo yile mfumeli wa txisikati wa Sabha a nga pfa nduma ya Solomoni, a tile Jerusalema e ta m'hika ngu siwotiso so karata. A to ta ni dibutho da hombe, ni makameli ma di rwate sidyanadyana, ni nzalama yayingi ngutu, ni marigwi a lisima; se e ta geletela Solomoni totshe ti a ngadi nato mbiluni kwakwe. 2Se Solomoni a to mtxhamusela totshe timhaka takwe; mfumeli kha sisa ni txa tximwetxo asi m'geli. 3Mbimo yile mfumeli wa txisikati wa Sabha a nga pfa wuzivi wa Solomoni, e wona ni nyumba yile a nga ti yi akile, 4ni sakudya sa ha mezani kwakwe, ni mazumbelo a tikhumbi takwe, ni mathumelo a vathu vakwe, ni syambalo sawe, ni vatheleli va magombe akwe, ni syambalo sawe, ni mu a nga txi kwela ngu kona a txiya Nyumbani ka Mkoma, a to pwata ni txo womba. 5A to khene ka mfumeli:
I ti ditshuri dipswi di ni nga dipfa ditikoni kwangu, ngu mhaka ya mithumo yako ni wuzivi wako. 6Aniko ani ni si makholwi mapswi ako, niza ni txita, se maso angu ma ti wonile; kha va siyeta ku ni gela ka kona; u pindisile ngutu ngu wutxhari ni tithomba ka nduma yile ni nga yipfa. 7Va katekile vavamna va u ku navo, vakatekile vathumi vako avale yotshe mbimo va ku masoni kwako, va pfisisako wutxhari wako! 8A na dhumiswe Mkoma Txizimu txako, awu a tsakako ngu ngawe, kasi e kuveka ha txituluni ka wukoma wa Israyeli, kasi ku u txi fuma ngu ditina da Mkoma Txizimu txako, ngu ku Txizimu txako txa randa Israyeli ka yotshe mbimo; ngu mhaka yeto, a kumahile mfumeli, kasi uva ni kupimisa ni wululamo.
9Se a to ninga mfumeli 120 wa titalenta ta nzalama, ni tixakaxaka tatingi ta makha, ni marigwi a lisima ngutu; kha kuzivi kuta makha amangi ngutu ku nga tiya mfumeli wa txisikati wa Sabha a nga ningisa tona mfumeli Solomoni.
10Kambe tikhumbi ta Hiramu ni tikhumbi ta Solomoni a ti ti nga tisa nzalama ti txi khukhela Ofiri, ti txi tisa ni mapulango amangi ngutu almuge, ni marigwi a lisima. 11Se mapulango eyo ya almuge mfumeli a to hamba ngu ona sikadha sa Nyumbani ka Mkoma ni sa nyumbani ka mfumeli, kumweko ni tiharipa ni misengele ya vaembeleli; kha kuzivi kuta mapulango o ngeto ditikoni da Judha.
12Mfumeli Solomoni a to ninga mfumeli wa txisikati wa Sabha, sotshe sile a nga si kombela ngu ku si navela, kuleka sile a nga maha ngu kuninga apune, madingano ni wuha wa mfumeli Solomoni; se a to tshumela e khukha kuya ditikoni kwakwe, ene ni tikhumbi takwe.
Tithomba ta Solomoni
(1 Vafumeli 10:14-29)
13Se kunemela ka nzalama yile yi nga txi nehwa ka Solomoni dilembe ni dilembe i ti ka 666 wa titalenta ta nzalama. 14Hahanze ka si si nga wiyiswa ngu vanyamabhindu ni vaxavisi, ni ya votshe vafumeli va Arabhiya, ni vathangeli ta ditiko da kona va ti tisa nzalama ni silivhela ka Solomoni.
15Solomoni a mahile 200 wa makhalo ngu nzalama yo tshulwa; 600 wa mandagarita a nzalama a to ruma kuva me pimwa, o lumba wukhalo ni wukhalo; 16a to maha kambe 300 wa sivhikelo sa nzalama yo tshulwa, txivhikelo ni txivhikelo txi ti ni mpimo wa 300 wa maxekela a nzalama; eya si veka txitingani ka Libhanoni.
17Mfumeli a to maha txikhalo txa hombe txa wukoma ngu makwasa a tinzofu e tshulela ngu nzalama ya yinene ngutu. 18Txitulwetxo txa wukoma, txi ti ni mtxhanu wa sikando ni tximwetxo, ni txikhigelo tximwetxo txa mikondo txo mahwa ngu nzalama, se madhawa otshe a mambidi ku di ni sikhigelo kala ha ka txikhalo txa kona; ni tingonyamo timbidi ti di kumweko ni sikhigelo. 19Kona txitimwi hale ka sikadha sa mtxhanu ni tximwetxo sa madhawa mambidi, ku di ni digumi da tingonyamo ni timbidi; ku si zivi ka nga mahwa so fana niso ka mfumo ni wawumwewo.
20Sotshe siya sile a nga txi sela ngu sona mfumeli Solomoni i ti ti sa nzalama, ni sotshe sigoto sa txitingani ka Libhanoni i ti sa nzalama ya lisima; ku si nga ni silivhela, ngu masiku a Solomoni, yi si nga ni kudhundeka ni kakumweko. 21Nguko mfumeli a di ni sitataru sa Tarxixi, ni sitataru sa tikhumbi ta Hiramu, kumweko ngu malembe mararu, ku txi wuya sitataru sa Tarxixi si txi tisa nzalama ni silivhela, ni makwasa a tinzofu, ni tikhawu ni mapavawu.
22Sekoko mfumeli Solomoni a to pinda (pala) votshe vafumeli va ha mafuni ngu tithomba ni wuzivi. 23Votshe vafumeli va ha mafuni va txi lava kuwona khohe ya Solomoni, kasi vepfa wuzivi wule Txizimu txi nga ti vekile mbilinu kwakwe. 24Se mmweyo ni mmweyo a txi ta mninga siya sa silivhela ni siya sa nzalama, syambalo, ni matxhari, ni makha, ni mahantxhi, ni mamula; tximwetxo ni tximwetxo ngu dilembe ni dilembe.
25Kambe Solomoni a di ni 4.000 wa mahantxhi o ndinda sikotxikani sa tiyimbi, ni 12.000 wa vagadhi va mahantxhi, e si yisa ka madhoropa a sikotxikani, se simwani si zumba kumweko ni mfumeli Jerusalema. 26#Wona ni ka: Gen. 15:18; 1 Vafu. 4:21. A ti ti fuma votshe vafumeli, kukhukhela mnamboni kala ditikoni da Vafilista, kala magwito ka Egipta. 27Mfumeli a to maha ti to Jerusalema kumaneka silivhela yo tala ku nga marigwi ni mikedhari o tala ngutu nga miphayi ya txitinga yi manekako mapuloni. 28#Wona ni ka: Dhewut. 17:16. Se ku txi tiswa mahantxhi ngu Egipta ni ngu ka matiko otshe me ta ningwa Solomoni.
Kufa ka Solomoni
(1 Vafumeli 11:41-43)
29Se ngu wungi wa mithumo ya Solomoni, ni totshe tile a nga maha, ti ngava ti sa bhalwa amu ka dibhuku da matimu a Nathani mprofeti, ni ka wuprofeti wa Ayiya wa Siloni, ni ka siwoniso sa Idho m'huti, ngu Jerobhowamu mwana Nebhate? 30Solomoni a to fumela Jerusalema ka dotshe ditiko da Israyeli, mune wa magumi a malembe. 31Se Solomoni a otete aha va ku kona vatate vakwe, a to tshotshwa Didhoropani ka tate wakwe Dhavhidha, se mwanana wa kona Robhowamu a to fuma ka wukhalo wakwe.
Currently Selected:
2 Makronika 9: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
