2 Makronika 8
8
Yimwani mithumo ni wuaki wa Solomoni
(1 Vafumeli 9:10-28)
1Ku to maheka ti to msana ka magumi mambidi a malembe, Solomoni a di akile tinyumba timbidi, Nyumba ya Mkoma ni nyumba yakwe, 2Solomoni a to aka madhoropa awa a nga ningwa ngu Hiramu; a txi akisa ka ona vanana va ka Israyeli.
3Ngu msana Solomoni a to ya teka madhoropa a Hamati ni Zobha. 4E aka ni didhoropa da Tadhimori, txiwulani, ni madhoropa otshe o xayisela ka ona thomba ani Hamati. 5Ngu mhaka yeto Solomoni a akile Bheta-Horoni wa mmangoni ni Bheta-Horoni wa mkovani, madhoropa a hombe ni tithangu ta wona ni matimba ma ku ni sikhweketo; 6ni Bahalate, ni otshe madhoropa o xayisela ka ona thomba yi Solomoni a ngadi nayo, madhoropa o veka sikotxikani, madhoropa a vagadhi va mahantxhi, ni sotshe sile Solomoni a nga xuva ku si aka Jerusalema, ni Libhanoni, ni ka dotshe ditiko di a nga txi fumela. 7Se ngu ka vathu votshe vale va nga sala va Vaheti, Vaamori, Vaferezi, Vahevhi ni Vajebhusi, i nga ti si nga vanana va Israyeli, 8ka vanana vawe vale va nga sala ditikoni, avale va nga mbi va fuvisa do gwita ngu vanana va ka Israyeli, Solomoni a to va maha tikhumbi to mthumela, kala ni nyamsi. 9Sekoko vanana va ka Israyeli, kha ku nga ni wammweyo a nga mahwa khumbi ngu Solomoni; i ti ti valwi va yimbi, ni vathangeli vakwe, ni vathangeli va tiyimbi, vathangeli va sikotxikani ni vagadhi va mahantxhi akwe. 10Avava i ti ti vathangeli va vathumi txitimwi ka kuaka ku a nga ti nako mfumeli Solomoni, i ti 250 wa vona, va nga ti thangela vathu va va nga txi thuma aha ko aka.
11Mwanana wa Faro a to kwelela ngu didhoropani ka Dhavhidha eya m'tini kwakwe, a nga ti aketwe ngu Solomoni; nguko a txi khene:
Msikati wangu kha na mbi zumba nyumbani ka Dhavhidha mfumeli wa Israyeli, nguko makhalo awa dibhokiso da Mkoma di nga wuletiswa ka ona ma sawulekile.
12Se Solomoni a to ninga mphaxo wa kuhiswa ka Mkoma, txitimwi ka txiluvelo txi va nga akela Mkoma, masoni ka m'hubhe wa dithepele; 13#Wona ni ka: Eks. 23:14-17, 34:22-23; Mit. 28:9; 29:39; Dhewut. 16:16. e ningela mphaxo wa ditshiku ni ditshiku, madingano ni sirumo sa Mosi, ngu milongiso, ni ka mtxima wa wuphya, ni ya mibuso yo mahwa kuraru ngu dilembe ni m'buso wa dipawu do mbi tshumbelwa, ni m'buso wa Mavhiki, ni ka m'buso wa matenda.
14Ngu kulondeta sileleto sa tate wakwe Dhavhidha, a to lulamisa mitxawa ya vaphaxeli ka mithumo ya vona ni mitxawa ya Valevhi ka mithumo ya yona kasi kuva txi dhumisa Txizimu ni kuthuma masoni ka vaphaxeli ditshiku ni ditshiku madingano ni ti ti nga longisiswa tona, e lulamisa ni mitxawa ya va woneleti va matimba, e txi va veka ka ditimba dimwani ni dimwani ngu kulondeta mlayo wa Dhavhidha, m'thu wa Txizimu. 15Vaphaxeli ni Valevhi kha va hambuka ka mlayo wa mfumeli madingano ni dibhindu hambi ka tithomba.
16Se wotshe mthumo wa Solomoni wu ti ti longisetwe kukhukhela ditshiku do khata kuaka Nyumba ya Mkoma kala yi txi guma; se Nyumba ya Mkoma yi to gumisa toneto.
17Solomoni a to ya Eziyomi-Gebheri ni Elate, ku manekako hafuhi ni likasani ka linene ditikoni da Edhomi. 18Hiramu, ngu dianza da tikhumbi takwe a to rumela amu ka sitataru sile ngu dianza da sithumi sakwe, va tsimbitisi va tingalava va va nga txi ziva kha kwati linene, ni sithumi sa Solomoni. Se va to hoka Ofiri, se va to ya teka koneyo 450 wa titalenta ta nzalama, ve ti tisa ka mfumeli Solomoni.
Currently Selected:
2 Makronika 8: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
