2 Makronika 16
16
Yimbi yo wukela Israyeli
(1 Vafumeli 15:16-22)
1Ngu dilembe da magumi mararu ni mtxhanu ni dimwendo da kufuma ka Asa, Bhahasa mfumeli wa Israyeli; a to wukela Judha ngu kuaka Rama, kasi ku ni wammweyo asi tumeliswi kuhuma, hambi kuwulela hafuhi ni Asa mfumeli wa Judha. 2Sekoko, Asa a to thavisa yotshe silivhela ni nzalama yi nga ti sate ka tithomba ta Nyumbani ka Mkoma, ni mu ka tithomba ta nyumbani ka mfumeli, e si rumela ka Bheni-Hadhadhe, mfumeli wa Siriya, a nga txi zumba Dhamasku, a txi khene: 3Txitumelelano txi hagari kwangu ni nawe, hagari ka tate wangu ni tate wako; wona ti to na rumela txiningo kwako, silivhela ni nzalama; tsula u ya vhilinganyisa txitumelelano txako ni Bhahasa, mfumeli wa va ka Israyeli kasi ku e khukha kwangu.
4Se Bheni-Hadhadhe a pfisisile dipswi da mfumeli Asa, e rumela vathangeli va yimbi ku yalwa ni madhoropa a Israyeli; a to lwisa Ijomi ni Dhani, ni Abhele-Mayimi, ni otshe madhoropa o xayisela ka ona thomba ya va ka Naftali. 5Se ku to maneka to a di ti pfite Bhahasa, a to leka kuaka Rama, e emisa mthumo wakwe wo aka. 6Sekoko mfumeli Asa a to ruma kunuwela kotshe Judha ati to votshe ku si sali ni wammweyo, ve tsula Rama kuya teka marigwi ni mapulango ale a nga txi aka ngu ona Bhahasa; se mfumeli Asa a akile ngu ona Gebha ni Misipa.
Mprofeti Hanani
7Ngu mbimo yoneyo Hanani m'huti a to ta ka Asa mfumeli wa va ka Judha e ta womba a txi khene: U themba mfumeli wa Siriya, khu thembi Mkoma Txizimu txako, ngu toneto mabutho a mfumeli wa Siriya ma hulukile mawokoni kwako. 8Va Etiyopiya ni va Libhiya kha va ku tela va di xomile yimbi ya hombe va di ni sikotxikani ni vagadhi va mahantxhi kani? Aku u nga ti ti thembile Mkoma ene ava ningetile mawokoni kwako. 9Nguko maso a Mkoma mawona kotshe ha mafuni kutsanisa ava i ku vakwe ngu timbilu tawe totshe. U mahile wuphukuphuku ka mhaka yiya nguko kukhukhela konkuwa u na va ni tiyimbi.
10Se Asa a to kwatela m'huti e mu rinza ka txigodho. Ati ti henyile ngutu ngu mhaka eyo. A to xanisa vathu vamwani ka mbimo yoneyo.
Kufa ka Asa
(1 Vafumeli 15:23-24)
11Kasi ngu wungi wa yotshe mithumo ya Asa yi bhatwe dibhukuni da matimu a mfumeli wa va ka Judha ni wa va ka Israyeli. 12Ngu dilembe da magumi mararu ni mtxhanu ni mune da kufuma kwakwe Asa, a to khatwa ngu malwati a minenge, yi di ni silonda so thisa ngutu, hambi keto kha lava Mkoma, kambe a to lava tiñanga. 13Se Asa a fite ngu dilembe da mune wa magumi a kufuma kwakwe, e otela ka vatate vakwe. 14A to tshotshwa ka dithitha di a nga ti mahela Didhoropani ka Dhavhidha, va di mu otelisile ka mbhedo wo tala ngu kubhumula, ni makha si nga longiselwa ngu va va tizivako; ve mu hisela ni mabaselo o tala o bhumula ngutu.
Currently Selected:
2 Makronika 16: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
