2 Makronika 17
17
Kukhata ka kufuma ka Josafati kona Judha
1Josafati mwana Asa a to fuma ka wukhalo wakwe; e maha ti to mfumo wakwe wu tsana ngutu hagari ka va ka Israyeli. 2A to veka vathu va yimbi ka madhoropa otshe a hombe a Judha, ni va woneleti va ditiko da Judha, ni ka madhoropa a Efrayime awa Asa tate wakwe a nga ti ti matekile. 3Mkoma a di ni Josafati, nguko a ti ti tsimbila ngu tinzila ta tate wakwe Dhavhidha, a kha khozela va ka bhahali. 4A to lava Txizimu txa tate wakwe e tsimbila ka sirumo sa txona, asi londeti mikhuwo ya vathu va ka Israyeli. 5Mkoma a to tsanisa wukoma mawokoni kwakwe, votshe va ka Judha va to ta luva Josafati; a to mana thomba yayingi ngutu ni wudhumo wa hombe ngutu. 6Mbilu yakwe yi to londetela nzila ya Mkoma kambe a thavisile makhalo o guleka ni sithombe so vatwa ani Judha.
7Ka dilembe da wuraru da kufuma kwakwe a to rumela vathangeli takwe Bheni-Kayil, ni Obhadhiya, ni Zakariya, ni Nathaniyele, ni Mikayeli, kasi kuva txi ya gondisa madhoropani ka va ka Judha. 8Va txi seketelana ni Valevhi Semaya, ni Netaniya, ni Zebhadhiya, ni Asayeli, ni Semiromoti, ni Jonatani, ni Adhoniya, ni Tobhiya, ni Tobhe-Adhoniya; kumweko ni vaphaxeli Elisama ni Jeyoramu. 9Ve rendeleka madhoropa otshe a va ka Judha, va txi gondisa vathu ani ditikoni da Judha va di ni dibhuku da Mlayo wa Mkoma.
10Yotshe mifumo ya ditiko a yi yi rendelekako ditiko da Judha yi to tala ngu kuthava Mkoma vona kha va wusa yimbi yo lwa ni Josafati. 11Vamwani Vafilista va ti ti luva Josafati ngu male ya resa; Hambi Marhabi ma to mluva ngu sifuyo sa sidotho i ku siya: 7.700 wa tihamba ni 7.700 wa vamabhongwe. 12Josafati a to ya masoni ngu kukula e aka mikhokhola ya hombe ni madhoropa a tithomba kona Judha. 13A ti ti ni mithumo yayingi madhoropani ka va ka Judha, vathu va yimbi, ni vavamna va mtamo kona Jerusalema; 14mtengo wawe madingano ni tinyumba ta vatate vawe; ka va ka Judha vathangeli va mazana: Mthangeli Adhina a di ni 300.000 wa vavamna va mtamo. 15Msana kwakwe, kulondeta mthangeli Jowanani ni 280.000 wa masotxhwa. 16Msana kwakwe kulondeta Amaziya, mwanana wa Zikiri, awu a nga ti ningeta kuthumela Mkoma; a di ni 200.000 wa vavamna va mtamo; 17ka va ka Bhenjamini, i Eliyadha, wamwamna wa mtamo mthangeli wa 200.000 wa vavamna va di ñote wulaho ni sivhikelo; 18Msana kwakwe kulondetile Jozabheti a di ni 180.000 wa vavamna va di xomile kulwa yimbi. 19Vavamna vava va ti ti thumela mfumeli, hahanze ka vale mfumeli a nga va veka madhoropani a mikhokhola amu ka ditiko dotshe da ka Judha.
Currently Selected:
2 Makronika 17: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
