2 Makronika 15
15
Kululamiswa ka wukhongeli ngu Asa
1Sekoko Moya wa Txizimu wu to ta ka Azariya, mwana Obhedhi. 2Se a to huma eya ka Asa a txiya khene:
Awe Asa ni nanu motshenu va ka Judha, ni va ka Bhenjamini ni engiseni, Mkoma ani nanu, ngako anu mi di ni nene; ngako mi txi mlava mi na mmana, mi txi m'leka nene a na mi leka. 3Ka mbimo yo lapha va ka Israyeli va hanyile va si na Txizimu txa ditshuri, ni vaphaxeli vo va gondisa ni mlayo. 4Kambe mbimo yi va nga ti ti ni xomulo va hundulukile ka Mkoma Txizimu txa Israyeli, ve mu lava ve mmana. 5Ka mbimo yoneyo ku si na kuthutha ka va va humako hambi ka va va wulelako, vathu va ditiko dile va ti ti hanya ka xomulo ya hombe ngutu. 6Vathu va to wukelana, didhoropa dimwani di txi wukela dimwani didhoropa, nguko Txizimu txi di va vangete xomulo yayingi. 7Kambe anu mi nga thaveni, mi nga godoliseni mawoko anu, nguko mthumo wanu u na va ni hakhelo.
8Ngako Asa adi engisile timhaka tiya ti nga wombwa ngu mprofeti, mwana wa Obhedhi, a to tsana e thavisa sotshe simaho so nyenyenza sa ditiko dotshe da ka Judha ni da Bhenjamini, ni mu ka madhoropa ale a nga ma teka mimangoni ka Efrayime; e lunguiseta txiluvelo txa Mkoma atxi txi nga ti ti masoni ka m'hubhe wa Nyumba ya Mkoma. 9Se a to sengeleta votshe vathu va ka Judha, ni va ka Bhenjamini, ni valuveli va Efrayime, ni va ka Manasi, ni va ka Simiyoni, va ka Israyeli va to ta kwakwe va di tate ngutu, nguko va to wona ti to Mkoma Txizimu txakwe txi ni nene. 10Se ka mtxima wa wuraru, ka dilembe da wugumi da kufuma ka Asa va to sengeletana Jerusalema. 11Ngu ditshiku donedo va to maha m'phaxo ka Mkoma, ngu sihari sile va nga wuya naso, 600 wa tihomu ni 6.000 wa tinvuta. 12Ve wulela ka txitumelelano txo lava Mkoma, Txizimu txa vatate vawe, ngu timbilu tawe totshe ni mihefemulo yawe yotshe, 13ni ti to votshe avale va si laviko Mkoma, Txizimu txa Israyeli a fanete kufa, kukhukhela ka vavadotho kala ka va hombe, wamwamna kala ka wamsikati. 14Va to xambanya ka Mkoma, ngu dipswi do guleka ni da kutsaka va txi veta mipundu ni titshudi. 15Votshe va ka Judha va to tsaka ngu kuxambanya kwawe, nguko va xambayile ngu timbilu tawe totshe, ni ngu kuranda kwawe va mu lavile va mmani; se Mkoma a to va ninga kudikha ngu madhawa otshe.
16Ahawa ko hambi mwamwakwe Mahaka, a to mthavisa kuva asi mahi mfumeli wa txisikati, nguko a di mahete Aseri, txithombe txo nyenyeza ngutu; Asa nene a thavisile txithombe txakwe, eya txi hisa hafuhi ni txinambwana txa Kedroni. 17Makhalo o guleka kha ma thaviswa ditikoni da Israyeli, Asa a to va wo lulama ka masiku akwe otshe. 18Se a to neha siya sotshe si si nga ti ningetwe ngu tate wakwe, ni si ene a nga si ningela nyumbani ka Txizimu: Silivhela ni nzalama. 19Kha ka maneka yimbi kala ka malembe a magumi mararu ni mtxhanu a kufuma ka Asa.
Currently Selected:
2 Makronika 15: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
