1 Samuwele 25
25
Kufa ka Samuwele
1Samuwele a to fa, se votshe vanana va ka Israyeli ve sengeletana ve mu dila, ve mtshotsha m'tini kwakwe, kona Rama.
Dhavhidha ni Abhigayeli
Se msana keto Dhavhidha a to khukha e relela txiwulani ka Parani. 2Kona Mawomi, ku ti ti ni wamwamna wokari, a nga ti ni tithomba takwe kona Karmeli; se wamwamna wuwa a ti ni mtamo ngutu, a ti ni 3.000 wa tinvuta ni 1.000 wa tiphongo, kambe a ti ti tsemeta tinvuta takwe kona Karmeli. 3Ditina da wamwamna wuwa i ti ti Nabhali, se ditina da msikati wakwe i ti Abhigayeli; wamsikati wuwa i ti m'thu wo ziva ngutu ni kutshura, kambe mwamna wa kona i ti ti m'thu wo karata wa mithumo yo biha; wa nyumba ya ka Kalebhi. 4Se Dhavhidha a to tipfa a di txiwulani, ti to Nabhali wa kaya tinvuta takwe, 5se Dhavhidha a to rumela digumi da vafana, a txi khene kwawe: Kwelelani mi ya Karmeli ka Nabhali, mi ya ni wotisela thenga to o txani. 6Se mi na ya khanu ka m'thu wule wo humelela: Kudikha ku nave ni nawe, ni nyumba yako yi nave ni kudikha, ni sotshe si wu ku naso si nave ni kudikha. 7Konkuwa koko, ni pfite ti to u ni vakayi vako; kambe vadyisi va u ku navo va ti ti kumweko ni nathu; kha ha va karata, kambe kha va tekelwa txilo ka masiku otshe ale va nga maneka Karmeli. 8Wotisa ka vafana vako va na kugela; sekoko vafana vava va na mane dikato masoni kwako, nguko hi tile ngu ditshiku da dinene; Ninga koko, ka sithumi sako ni ka mwanako Dhavhidha asi u no si mana manzani kwako.
9Msana ka kuva va di hokile koko, vafana va Dhavhidha veya womba ka Nabhali otshe mapswi ale ngu ditina da Dhavhidha, va to malala. 10Se Nabhali a to xamula ka sithumi sa Dhavhidha, a txi khene: I mani Dhavhidha, i mani mwana Jese kani? Masikwananu nzingi sithumi si tutumako ka vanyamne va sona. 11Ina ni nga teka dipawu dangu, ni mati angu, ni nyama yi ni nga dayela vakayi vangu, ni ninga vathu vo mba va ziva to va ta ngu hani kani?
12Sekoko vafana va Dhavhidha va to goxometa nzila yawe ve tshumela, ve wuya ve ta mtxhamusela totshe, madingano ni otshe mapswi awa.
13Ngu kumaha keto, Dhavhidha a to khene ka vathu vakwe: Mmwani ni mmwani a na ti sungi ditxhari dakwe. Va to sunga matxhari awe, se Dhavhidha nene a to sunga dakwe; Dhavhidha a to kwelela ni 400 wa vathu, kambe 200 va to sala ni tithundu.
14Kambe mmweyo wa vafana a to zivisa Abhigayeli, msikati wa Nabhali, a txi khene: Wona ta ku Dhavhidha a rumete mitumi yo khukhela txiwulani ku ta pfuxela nyamne wathu; kambe ene a va ruketete. 15Hambi keto, vathu vale va hi mahete ta tinene, kha va khali ku hi karata, kambe kha ha kelelewa ngu txilo ka otshe masiku ale hi nga ti ti navo, mbimo yile hi nga ti txitingani. 16Vona i ti ti diguma dathu wusiku ni mitshikari, ka otshe masiku ale hi nga ti navo hi txi dyisa tinvuta. 17Wona koko, konkuwa, u alakanya ti u no maha, nguko ka totshe tiya da ta dikhombo ka nyamne wathu ni ka nyumba yakwe yotshe, kambe ene m'thu wa tshofu, kha ku na wo a nga womba-womba nayo.
18Sekoko Abhigayeli a to kuluveta e teka 200 wa mapawu, ni misava yimbidi ya vhinyo, ni mtxhanu wa tinvuta to bhikwa, ni mtxhanu wa sirundu sa mafaka o sokotwa, ni 100 wa sizangwa sa mauvha, ni 200 wa sirema sa makuwa, e si sanzeka txitimwi ka timbongola, 19a txi khene ka vafana vakwe: Thangelani masoni kwangu, ni nata ngu msana. Kambe eto kha gela mwamna wakwe Nabhali.
20Se ku to maheka tito, mbimo Abhigayeli a nga gadha mbongola ve tsimbila, e relela a txi tsivelwa ngu mmango, a to wona Dhavhidha ni vathu vakwe va txi mhingeta, se a to tshangana navo. 21Se Dhavhidha a to khene: Ngu ditshuri ni xayisile walo sotshe sile m'thu wuwa a nga ti naso txiwulani, kha kelelelwa ngu txilo ka sotshe si a ku naso, kambe ene a ni tshumetete wubihi ngu wunene. 22Ngu toneto, Txizimu txi na mahe ni kuengeta ka valala va Dhavhidha, ngako ni txo siya wa mfana mmweyo ka sotshe si a ku naso kala ni mixo.
23Mbimo yile koko, Abhigayeli a nga wona Dhavhidha, a to kuluveta e txhika ngu ha ka mbongola, e nanisa khohe yakwe masoni ka Dhavhidha, e khizama. 24Se a to ti rinza mikondoni kwakwe, a txi khene: O! Nyamne wangu, mnandu wuwa wu nave kwangu; Leka txithumi txako txa txisikati txi womba-womba ni nawe, u engisa mapswi a txithumi txako txa txisikati. 25Nyamne wangu, u nga thuke u karateka ngu mhaka ya wamwamna wuwa wo biha, i ku Nabhali, wa mbilu yo nemela, nga tile ditina dakwe di wombako. Ditina dakwe i Nabhali, ni wuphukuphuku wu ni nene, kambe ani txithumi txako kha na va wona vafana va nyamne wangu, avale u nga va rumela. 26Konkuwa koko, nyamne wangu, ni xambanya ngu Mkoma a hanyako, ni muhefemulo wako, Mkoma a kuvhalete kutheketa mnoha ni ku ti photela ngu dianza dako; kambe konkuwa, valala vako ni vale va lavako wubihi wo wukela nyamne wangu, va na fane ni Nabhali, 27se konkuwa a txiya txiningo txi txihumi txako txa txisikati txi tisako ka nyamne wangu; u na ninga vafana vale va londetako mikondo ya nyamne wangu. 28Divalela koko, txithumi txako txa txisikati ka mnandu wuwa, nguko ngu ditshuri Mkoma a na tsanisa nyumba ya nyamne wangu, nguko nyamne wangu a lwa tiyimbi ta Mkoma, kambe kha ku khali kumaneka wubihi kwako ka otshe masiku ako. 29Se ngako m'thu wokari a txo khukha e kututumisa, a txi lava ku kudaya, sekoko wutomi wako wu na sungwa ka nyanda ya vale va hanyako ka Mkoma, Txizimu txako; kambe wutomi wa valala vako wu na rinzwa kule, ku nga dirigwi do rinzwa ngu txibhalakaza. 30Se mbimo yi Mkoma a no mahela nyamne wangu madingano ni wotshe wunene wule a nga wu womba ngu ngawe, ni ngako a txi kuveka ku va mthangeli txitimwi ka Israyeli, 31sekoko nyamne wangu, kha na mbi khungavanyeka hambi kukarateka mbiluni ngu mnoha wa kwa mbi na mnandu wu nga thaketa, hambi ni ka kudotho ku ti hanyisa upune awe nyamne wangu; se ngako Mkoma a txo mahela wunene nyamne wangu, sekoko u na alakanya txithumi txako.
32Sekoko Dhavhidha a to khene ka Abhigayeli: Ku na bongwe Mkoma Txizimu txa Israyeli, awule a nga kurumela wuta tshangana ni nani nyamsi. 33Ku na bongwe ni wusungukati wako, bongwa nawe, wu nga ni vhalela nyamsi kutheketa mnoha, ni ku ti hanyisa ngu dianza dangu. 34Nguko ngu ditshuri, ni xambanya ngu Mkoma, Txizimu txa Israyeli, wule a nga ni vhalela ku ku mahela wubihi tito, i ti ku awe u sa kuluveta, u ni hingeta, ku sa sala txilo ka Nabhali, kala ni mixo, hambi mfana mmweyo.
35Sekoko Dhavhidha a to amukela ngu dianza dakwe sile a nga ta naso, a txi khene kwakwe: Tsula ngu kudikha m'tini kwako; wona taku ni pfite dipswi dako, na kona ni engisile txikombelo txako.
36Mbimo yile Abhigayeli a nga wuya ka Nabhali, a to mana taku m'tini kwakwe ku ni m'buso wa hombe, wo fana ni m'buso wa mfumeli; se mbilu ya Nabhali yi ti ti tsakile ngutu, a di levile ngutu, aha koza asi m'gela txilo kala ni mixo. 37Ku to maheka koko taku, ni mixo, a di zangulukile vhinya Nabhali, msikati wakwe a to mtxhamusela mapswi ale; se mbilu yakwe yi to guma mtamo, a txi nga dirigwi. 38Se ku to maheka taku, ku di pindile hafuhi ka digumi da masiku, Mkoma a to peka Nabhali efa.
39Se mbimo yile Dhavhidha a nga pfa ti to Nabhali a fite, a to khene: Ku na bongwe Mkoma a nga vhikela dianza da txithumi txakwe kumaha wubihi ka Nabhali, a tsivete txithumi txakwe ka wubihi, kambe Mkoma a mahile ti to wubihi wa Nabhali wu tshumelela txitimwi ka msungo wakwe. Se Dhavhidha a to ruma vathu ka Abhigayeli kuya mteka ti to e maha msikati wakwe. 40Mbimo yile koko sithumi sa Dhavhidha si nga hoka ka Abhigayeli, kona Karmeli, si to m'gela ku kha sona: Dhavhidha a hi rumile kwako, ku ta kuteka u ya maha msikati wakwe.
41Sekoko ene a to khukha, e nama ngu khohe hahatshi, a txi khene: Wona, txithumi txako txa txisikati txi na maha txithumi txo sambisa mikondo ya sithumi sa nyamne wangu.
42Kambe Abhigayeli a to kuluveta e khukha, e gadha mbongola yakwe, e londetwa ngu mtxhanu wa mahorana akwe; se ene a to londeta mitumi ya Dhavhidha eya maha msikati wakwe.
43Se Dhavhidha a ti tekile kambe Ayinowami wa Jezireyeli, ngu wumbidi wawe va to maha vasikati vakwe. 44Nguko Sawule a ti ti ningete mwanakwe Mikali, msikati wa Dhavhidha, ka Paliti, mwana Layisi, wule i nga ti ti wa Galimi.
Currently Selected:
1 Samuwele 25: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
