1 Samuwele 26
26
Dhavhidha e leka kambe kudaya Sawule
1 # Wona ni ka: Mas. 54. Se Vazifi va toya ka sawule kona Gibheya va txi kha vona: Ina Dhavhidha kha mbharama mmangoni ka Hakila, wu wu ku txidigeni ka Jesimoni kani? 2Sekoko Sawule a to khukha e relela txiwulani ka Zifi, kumweko ni 3.000 wa vavamna va nga sawulwa hagari ka va ka Israyeli, kuya lava Dhavhidha txiwulani ka Zifi. 3Se Sawule a toya gova mmangoni ka Hakila, wu wu ku txidigeni ka Jesimoni, hafuhi ni nzila; kambe Dhavhidha a to zumba txiwulani, se e wona Sawule a txi ta ngu msana kwakwe kona txiwulani. 4Dhavhidha koko a to rumela tixoli, ti ya ziva to Sawule wata kha ditshuri. 5Se Dhavhidha a to khukha eya ka wukhalo wule Sawule a nga ti govile ka wona; Dhavhidha a to wona wukhalo wu Sawule a nga ti sate ka wona ni Abhineri, mwana Neri, mthangeli wa dibutho dakwe da yimbi; se Sawule a ti otete hagari ka sikotxikani, vathu va ti mranganyetile ngu madhawani.
6Se Dhavhidha a to xamula ka Ayimeleki, Muheti, ni ka Abhixayi, mwana Zeruiya, mwanawe wa Jowabhi, a txi khene: I mani a no relela ni nani hi ya ka Sawule wugoveloni kani? Se Abhixayi a to khene: Ani ni na relela ni nawe!
7Dhavhidha koko ni Abhixayi va to tsula ka vathu ni wusiku, se va to wona Sawule a di otete, a di otete hagari ka wukhalo wa sikotxikani, na mseve wakwe a di wu zimile hahatshi ngu misungoni kwakwe; kambe Abhineri ni vathu va ti otete ngu madhawani kwakwe. 8Sekoko Abhixayi a to khene ka Dhavhidha: Nyamsi Txizimu txi ku ningile mlala wako manzani kwako; konkuwa koko ni leke ni tekela ku mthola ngu mseve, ni mpata ni mafu, kha ni na mbi mthola kumbidi.
9Se Dhavhidha a to khene ka Abhixayi: U nga mmahe txilo; nguko i mani a nga guletako diwoko dakwe ka msawuleki wa Mkoma asi mani mnandu kani? 10Dhavhidha a to engeta a txi khene: Ni xambanya ngu Mkoma wu a hanyako, taku Mkoma a na m'daya, mwendo ti to ditshiku da kufa kwakwe di na hoka, ni ku mwendo a na relela ku yalwa a txi ya lova. 11Mkoma a na ni xayise ku ni si guleti diwoko dangu ni daya wule a nga totwa wa Mkoma, kambe konkuwa, teka mseve wu wu ku misungoni kwakwe ni ngoto ya mati hi tsula.
12Dhavhidha koko, a to teka mseve ni ngoto ya mati misungoni ka Sawule, ve tsula; kha kwa maneka ni mmweyo wo ti wona, hambi wo tipfa, mwendo kuwuka; nguko votshe va ti mani wukohe, nguko Mkoma a ti va otelisile ngu wukohe wa hombe.
13Se Dhavhidha a to pinda eya ka dimwani didhawa, eya ema tshokani ka mmango ngu kule, aha ka ku ngu hagari kwawe kumaneka mpfhuka wo lapha. 14Se Dhavhidha a to kwangula ka vathu ni ka Abhineri, mwana Neri, a txi khene: Khu na mbi xamula Abhineri kani? Sekoko Abhineri a to xamula, a txi khene: Ngawe mani wu kwangulako ka mfumeli kani?
15Sekoko Dhavhidha a to khene ka Abhineri: Ina hi ngawe wamwamna wa ndena kani? Se i mani a kuho Israyeli wo fana ni nawe kani? Ngu kutxani koko, u nga lamba kuwonelela mfumeli, nyamne wako kani? Nguko kutile m'thu wokari ka ta hoxota mfumeli, nyamne wako. 16Hi nga ta tinene eto u nga maha; ni xambanya ngu Mkoma a hanyako, anu mi fanela kufa, anu mi nga mbi wonelela nyamne wanu, wule a nga totwa wa Mkoma; wonani koko, konkuwa taku, aha wu ku kona mseve wa mfumeli ni ngoto ya mati, sile si nga ti misungoni kwakwe.
17Sekoko Sawule a to ziva dipswi da Dhavhidha, a nje khene: Ina hi nga dipswi dako mwanangu Dhavhidha kani? Se Dhavhidha a to khene: Dispwi dangu, awe mfumeli, nyamne wangu! 18A to khene kambe: Ngu kutxani nyamne wangu e tutumisa txithumi txakwe nga tiya kani? Nji txani ni nga onha koko, kani? Ni ku wubihi muni wu kuho kwangu kani? 19Konkuwa koko, na ku kombela awe mfumeli nyamne wangu, ti to u engisa mapswi a txithumi txako: Ngako Mkoma a txi kukurumeta ku ni wukela, a na amukele mningelo wa sakudya; kambe ngako i di vanana va vathu va na ruketelwe masoni ka Mkoma; nguko nyamsi vona va ni tutumisile, kasi ku ni si mani txyavelo txa thomba ya Mkoma, va txi kha vona: Tsula, u ya thumela simwani sizimu. 20Konkuwa koko, wu nga thekele mnoha wangu ha mafuni, masoni ka Mkoma; mfumeli wa Israyeli koko a to huma kuya xota ndata, kufana ni m'thu wule a tutumisako tshukwa mimangoni.
21Sekoko Sawule a to khene: Ni onhile! Wuya, mwanangu Dhavhidha! Nguko kha ni na mbi kumaha to biha, nguko nyamsi u woni lisima la wutomi wangu masoni kwako. Wona taku, ni mahile wuphukuphuku, ni onhile ngutu ta tinene.
22Sekoko Dhavhidha a to xamula, a txi khene: Ndiwo hawa mseve wa mfumeli; a nate mmweyo ka vafana vako e ta teka. 23Kambe Mkoma a na tshumetela ka mmweyo ni mmweyo ngu kululama kwakwe ni kuthembeka kwakwe; nguko nyamsi koko Mkoma a ti ku ningete manzani kwangu, kambe kha lava kuguleta dianza dangu ni wukela wule a nga totwa wa Mkoma. 24Wona taku, nga kule wutomi wako wu nga va wa lisima masoni kwangu, ni wona wutomi wangu wu nave wa lisima masoni ka Mkoma, se ene a na ni txhatxhise ka sotshe sixaniso.
25Sekoko Sawule a to khene ka Dhavhidha: Kateka awe mwanangu Dhavhidha; nguko wu na maha timhaka ta hombe, kambe wu na humelela. Sekoko Dhavhidha a to tsula ngu nzila yakwe, se Sawule nene a to tshumela eya wukhaloni kwakwe.
Currently Selected:
1 Samuwele 26: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
