1 Samuwele 24
24
Dhavhidha e leka kudaya Sawule
1Se ku to maheka ti to mbimo yile Sawule a nga wuya ngu kututumisani ka Vafilista, va to m'gela ku kha vona: Wona taku Dhavhidha a txiwulani ka Eni-Gedhi. 2Sekoko Sawule a to teka 3.000 wa vavamna, avale va nga sawulwa hagari ka dotshe ditiko da Israyeli, se ve tsula ku lavani ka Dhavhidha ni vathu vakwe, kala tishokani ka mimango ya marigwi a timhoti. 3#Wona ni ka: Mas. 57; 142 Se va to hoka sibalani ka tinvuta hafuhi ni nzila, ahale ku nga ti ti ni diphala; se Sawule a to wulela ka dona, kuya ti ruma kona; kambe Dhavhidha ni vathu vakwe va ti ngu madhawani ka diphala. 4Sekoko vathu va Dhavhidha va to m'gela ku kha vona: Adiya ngu dona ditshiku di Mkoma a ngadi womba, a txi khene: Wona taku ni na ningeta mlala wako manzani kwako, u na maha kwakwe kuranda kwako. Se Dhavhidha a to khukha ngu kunyanimela eya wila tshoka ya txyambalo txa Sawule. 5Se ku to maheka koko taku, msana kova a di wite txyambalo txa Sawule, Dhavhidha a to xaniseka mbiluni, ngu kule a nga wila tshoka ya txyambalo txa Sawule; 6se a to khene ka vathu vakwe: Mkoma a na ni xayise ku ni si maheli nyamne wangu mhaka yiya, ka wule a nga totwa wa Mkoma, ngu kuguleta dianza dangu ni mwukela, nguko mbwo totwa wa Mkoma.
7Se ngu mapswi awa, Dhavhidha a to layetela vathu vakwe, asi va tumeleli kuve wukela Sawule; kambe Sawule a to huma ngu diphalani e simama ni nzila yakwe. 8Msana keto, Dhavhidha nene a to huma ngu diphalani, e kwangula ngu msana ka Sawule, a txi khene: Mfumeli, nyamne wangu! Se mbimo yile Sawule a nga tshembereka e wona msana, Dhavhidha a to nama hahatshi e khizama. 9Se Dhavhidha a to khene ka Sawule: Ngu kutxani u engisa mapswi a vathu vale va ku kha vona: Wona taku Dhavhidha a lava ku ku mahela to biha kani? 10Nyamsi u ti woni upune ti to Mkoma a ku ningete manzani kwangu ka diphala diya, vamwani va ni kuzetete ti to ni kudaya; kambe ni ku divalete, nguko ni ti khani: Kha ni na mbi nawuluta diwoko dangu ni wukela nyamne wangu, nguko mbo totwa wa Mkoma. 11Wona koko, tata wangu, wona diye tshoka ya txyambalo txako manzani kwangu; nguko ani ni to wila tshoka ya txyambalo, kambe kha na kudaya. Wona koko, u tiziva ti to kha ku na wulala ni wubihi manzani kwangu, ni ti to ani kha na kuonhela; kambe awe wu lavetela kuthavisa wutomi wangu. 12Mkoma a na lamule hagari kwangu ni nawe, ni ku ni photela kwako; kambe dianza dangu kha di na mbi kuwukela. 13Kufana ni kuwomba ka vakale va nga kha vona: Wubihi wu huma ngu ka vabihi; kambe dianza dangu kha di na mbi kuwukela. 14A humela mani mfumeli wa va ka Israyeli kani? A tutumisa mani kani? U tutumisa yimbwa yo fa kani? Mwendo i ndata kani? 15Kambe Mkoma a na va mlamuli, a na lamula hagari kwangu ni nawe, a na ni wona, e xolisisa mhaka yangu, se a na ni hulukisa manzani kwako.
16Se ku to maheka ti to a di hetile Dhavhidha kuwombawomba ni Sawule otshe mapswi awa, Sawule a to khene: Ina dipswi dako diya mwanangu Dhavhidha kani? Sekoko Sawule a to guleta dipswi e dila. 17Se a to khene ka Dhavhidha: Awe u lulamile ngutu kupinda ani; nguko awe wu ni tshumetete ngu wunene, kambe ani ni ku tshumetete ngu wubihi. 18Nyamsi awe wu ni kombile wumbilu wu wu ku nawo ni nani; nguko Mkoma a ti ni ningete manzani kwako, kambe awe khu ya ni daya. 19Nguko i mani wo a di mani mlala wakwe a nga mleka e tsula ngu kuthutha kani? Ngu toneto, Mkoma a na ku tshumetele ngu wunene, ngu mhaka ya ti u nga ni mahela nyamsi. 20Konkuwa koko, na tiziva ti to kha ditshuri u na fuma, ni ku mfumo wa va ka Israyeli wu na tsana manzani kwako. 21Xambanya konkuwa kwangu ngu Mkoma tito, khu na mbi fuvisa liveleko langu msana kwangu, hambi kufuvisa ditina dangu nyumbani ka tate wangu. 22Sekoko Dhavhidha a to xambanya ka Sawule. Se Sawule e khukha e tsula m'tini kwakwe, kambe Dhavhidha ni vathu vakwe va to kwelela veya mikhokholani.
Currently Selected:
1 Samuwele 24: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
