1 Vafumeli 19
19
Elija mmangoni ka Sinayi
1Se Akabe a to geletela Jezabheli totshe ti a nga ti mahile Elija, ni ti a nga dayisa tona votshe vaprofeti va ka Bhahali, ngu ditxhari. 2Sekoko Jezabheli a to ruma mtumi ka Elija, kuya khene:
Si na ni tsayise ngutu sizimu ngako kala ka mbimo yo nga yona yiya, ni si ku dayi nga ti u nga va dayisa tona.
3Mbimo yile a nga muwona a to khukha e tutuma, kasi kuhulukisa wutomi wakwe, eta Bherisebha ka Judha, e ta siya kona mfana wakwe. 4#Wona ni ka: Joh. 4:3. Se a to tsimbila mnava wa ditshiku, eya khalahatsha hahatshi ka mndonga; se a to navela ni ku ti kombelela kufa a txi khene: Se ta dingana awe Mkoma; teka koko wutomi wangu, nguko kha ni nga wamnene kupinda vatate vangu.
5Se a to otela hahatshi ka mndonga; se ku to woneka ngelozi yi txi ta m'gwesa, yi to kha yona: Wuka u txi dya.
6Se a to wona dipawu aha ka txikhingelo txakwe, di nga ti yokilwe ka makala, ni ngoto ya mati, se a to dya, e sela, e tshumela e otela. 7Se Ngelozi ya Mkoma yi m'gwesa ka wumbidi, na yi txi kha yona: Wuka u txi dya, nguko yi laphile nzila yako.
8A to wuka koko Elija, a txi dya ni kusela, se ngu mtamo wa sakudya sile, a to tsimbila mune wa magumi a wusiku ni mune wa magumi a mitshikari, kala Horebhi, mmangoni ka Txizimu. 9Se koneyo a to wulela amu ka diphala e otela kona wusikuwo; se dipswi da Mkoma di tile kwakwe di txi ta kha dona: Wo maha txani ahawa kani Elija?
10Se ene a to khene: Ni xambanyile kuthumela ngutu Mkoma, Txizimu txa Mabutho a Tiyimbi, nguko vanana va ka Israyeli va lekile txitumelelano txako, va khundumusete siluvelo sako, ve dayela vaprofeti vako ngu ditxhari; se ngani nokha ni nga sala, se va xota kuthavisa wutomi wangu.
11Se Mkoma a to khene ka Elija: Huma hahanze u txi ya maneka mmangoni masoni ka Mkoma. Se Mkoma a txi pinda, kumweko ni moya wa hombe wa mtamo, wu nga txi bhandelela mmango, ni kukhundumusa marigwi masoni ka Mkoma; aniko Mkoma a ti si ngaho ka moya wule; wu di pindile moya wule ku to zinginika mafu; emo kambe asi ngaho Mkoma. 12Se ku di gwitile kuzinginika, ku to tura mndilo; aniko mndilonimo kambe asi ngaho Mkoma; msana ka mndilo ku to pfala dipswi do thutha, da wukheta.
13Se mbimo yile Elija a nga dipfa, a to fenengeta khohe yakwe ngu dijasi dakwe e huma hahanze, a to ema ha txikeni ka diphala; se kutota dipswi kwakwe, di nga ti kha dona: Wo maha txani ahawa kani Elija?
14Se Elija a to khene:
Ni xambanyile kuthumela ngutu Mkoma, Txizimu txa Mabutho a Tiyimbi, nguko vanana va ka Israyeli va lekile txitumelelano txako, va khundumusete siluvelo sako, ve dayela vaprofeti vako ngu ditxhari; se ngani nokha ni nga sala, se va xota kuthavisa wutomi wangu.
15Se Mkoma a to khene ka Elija: Tsula, tshumela ngu nzila yako u ya txiwulani ka Dhamasku, u txi ya tota Hazayeli kuva mfumeli wa Siriya. 16Kambe u na tota Jehu, mwana Ninisi, kuva mfumeli wa Israyeli, ni Elixa, mwana Safati, wa Abheli-Meyola, u na mtota kuva mprofeti, ka wukhalo wako. 17Se ku na maheka ti to awule a no huluka ka ditxhari da Hazayeli, a na dawa ngu Jehu, se awule a no huluka ka ditxhari da Jehu, a na dawa ngu Elixa. 18#Wona ni ka: Var. 11:4. Kambe ni mahile ti to kusala ka Israyeli 7.000, otshe mazolo ma nga mbi khizamela Bhahali, ni sotshe sisofu si si nga mbi mpswopswa.
Kudhanwa ka Elixa
19Elija a to khukha ngu hale, eya manela Elixa mwana Safati, a nga ti dima ngu mipatwa ya digumi ni yimbidi ya tihomu masoni kwakwe, se a ti ni mpatwa wo gwitisa. Elija a to mtshuketela e msanzeka dijasi ha makata kwakwe. 20Sekoko a to leka tihomu, e tutuma e londeta Elija, a nje khene:
Ni leke ni pswopswa tate wangu ni mwamwangu, ni na gwita ni kulondisa.
Se Elija a to khene kwakwe:
Tsula, u tshumela u wuya; nguko ni nga kutsimba ngu kutxani kani?
21Elixa koko a to wuya ngu msana kwakwe, e ta teka mpatwa wa tihomu e daya, se a to bhika nyama ngu dikange, e ninga vathu va txi dya. Sekoko Elixa a to khukha e londeta Elija, kuya m'vhuna mithumo.
Currently Selected:
1 Vafumeli 19: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
