1 Vafumeli 18

Elija ni vaprofeti va ka Bhahali

1Se ku to maheka to msana ka masiku amangi, kutile dipswi da Mkoma ka Elija ngu dilembe da wuraru, di txi kha dona:

Tsula u txi ya ti kombekisa ka Akabe, nguko ni na nisa mati txitimwi ka mafu.

2Se Elija a to ya ti kombekisa ka Akabe; se ku di ni nzala yo thisa Samariya. 3Se Akabe a to dhana Obhadhiya, mthangeli. (Se Obhadhiya a ti ni txithavo ngutu ka Mkoma, 4nguko ku mahekile tito, mbimo yile Jezabheli a nga ti dayela vaprofeti va Mkoma, Obhadhiya a to teka 100 wa vaprofeti, se e sisa mtxhanu wa magumi kheno, ni vamwani va mtxhanu wa magumi kheya, amu ka diphala, e va dyisa ngu mapawu ni mati). 5Se Akabe a to khene ka Obhadhiya:

Tsimbila u lava sisima ni minambo ka ditiko diya, mwendo hi nga mana lihawu, kuva hi txi na dyisa mahantxhi ni mamula, ku va hi si kelelelwi ngu sifuyo.

6Se va to abanelana mafu, amu va fanelako kupinda ngu kona; Akabe a to tsula didhawa ngu nzila yokari, se Obhadhiya nene a to tsula ngu yimwani nzila.

7Na a di ha nzila Obhadhiya, a to manelwa ngu Elija; ngu ku m'ziva, a to nama masoni kwakwe, a txi khene: Ina ngawe nyamne wangu Elija kani?

8Se ene a nje khene: Ngani wuwa; tsula u ya gela nyamne wako ku khawe: Ndiyo waho hawa Elija.

9Sekoko nene a to khene: Ni to onha txani, kuza u ningela txithumi txako manzani ka Akabe kasi ku e ni daya kani? 10Ni xambanya ngu Mkoma, Txizimu txako, a hanyako, kha ka nga vaho ditiko mwendo mfumo, emo nyamne wangu, a nga mba rumela vo tsimbila ve kulava; se vona va txi kha vona: A walo hawa, sekoko a txi xambanyisa mifumo ni matiko ku mwendo kha va kumana. 11Sekoko awe i nda khawe: Tsula u txi ya khawe ka nyamne wako: Elija ndiyo hawa. 12Se ti ndi na maheka to, ni txi na khukha hawa kwako, Moya wa Mkoma wu txi kuteka, mwendo wu txi kuyisa hani, se ani ni txi tisa thenga ka Akabe, asi ku mani awe a na ni daya; ngukonaho, ani txithumi txako, ni thava Mkoma kukhukhela ka wufana wangu. 13Ina va ngava va sa m'gela nyamne wangu ati ni nga maha, mbimo yile Jezabheli a nga dayela vaprofeti va Mkoma, akule ni nga sisa 100 wa vaprofeti va Mkoma, ngu mtxhanu wa magumi, ni mtxhanu wa magumi ka maphala okari, na ni txi va ninga mapawu ni mati kani? 14Se konkuwa awe u khawe: Tsula u txi ya khawe ka nyamne wako: Elija ndiyo hawa; ene a na ni daya.

15Se Elija a to khene:

Ni xambanya ngu Mkoma wa Mabutho a Tiyimbi a hanyako, awu ni ku masoni kwakwe, ti to ni naya ti kombekisa kwakwe nyamsi.

16Sekoko Obhadhiya a to tsulisa txiziviso ka Akabe; se Akabe a to tsula kuya wonana ni Elija. 17Se ku to maheka ti to mbimo yile Akabe a nga wona Elija, a to khene kha Akabe: Ngawe mkhulumeteli wa Israyeli kani?

18Se ene a nje khene: Ani kha ni zivi ku nga khulumetela Israyeli, aniko ngawe ni nyumba ya tate wako, ngu ku mi nga leka milayo ya Mkoma mi londisa va ka Bhahali. 19Ngu toneto, gela votshe vathu va ka Israyeli ve tshangana ni nani mmangoni ka Karmeli, kumweko ni 450 wa vaprofeti va Bhahali, ni 400 wa vaprofeti va Aseri, va dyiswako ngu mfumeli wa txisikati Jezabheli.

20Sekoko Akabe a to rumela mitumi ka votshe vanana va ka Israyeli, e sengeletana ni vaprofeti ka mmango wa Karmeli. 21Sekoko, Elija a to tshuketa hafuhi ka votshe vathu a txi khene: Mi na khwita hagari ka mipimiso yimbidi kala yihi mbimo kani? Ngako Mkoma i di Txizimu mlondiseleni; ni loku i di Bhahali, mlondiseleni. Hambi keto, vathu kha va mxamula txilo. 22Sekoko Elija a to khene ka vathu: Ngani nokha mprofeti wa Mkoma ni nga sala, kuve vaprofeti va Bhahali i 400 wa vavamna. 23Hi ningeteni marole mambidi, va na sawule dirole dimwedo, va txi di abanisela ngu sihango, ve di sanzeka txitimwi ka tikhuni, aniko va nga dhivele mndilo, se ani ni na longisela dimwani dirole, ni txi di sanzeka txitimwi ka tikhuni, kambe kha ni na mbi dhivela mndilo. 24Sekoko khongelani ka ditina da txizimu txanu, se ani ni na khongela ka ditina da Mkoma; se ku na maheka ti taku txizimu txi txi no xamula ngu mndilo, etxo txi nave txona Txizimu. Se votshe vathu va to xamula va txi kha vona: Ndinene dipswi diya.

25Se Elija a ti khene ka vaprofeti va Bhahali: Ti sawuleleni dimwedo da marole mipune, mi txi di lulamisela nguko mi vangi ngutu, se khongelani ka ditina da txizimu txanu, mi nga dhiveleni mndilo.

26Se va to teka dirole dile va nga ningwa, ve di lulamisela; se va to khongela ditinani ka Bhahali, kukhukhela ni mixo kala ni hagari ka mitshikari, va txi kha vona: Awe Bhahali, hi xamule! Aniko kha ka pfala dipswi, hambi ni wo xamula; na va txi ndaka-ndaka txitimwi ka txiluvelo txile txi nga ti mahilwe.

27Ku to maheka ti taku ngu hagari ka mitshikari: Elija a to va poyilela, a txi khene: Kwangulani ngu dipswi do guleka, nguko ene njizimu; ti nga nda maha eto a txo womba-womba, mwendo kuva a di ni to kari a mahako, mwendo kuva a txi pimisela dipfhumba dokari, hambi kudhuka a txi otela, a na vhumuka.

28Se vona va txi kwangula ngu mapswi a hombe, va txi ti nyarela ngu timesa ni matxhari, madingano ni tolovelo yawe, kala ve theketa mnoha vapune. 29Se ku to maheka a ti to ku di pindile hagari ka mitshikari, va to profeta, kala kuza mphaxo wa sakudya wu txi ningelwa; hambiketo kha ka pfala dipswi hambi xamulo, ni kwa mbi khatala ngu txilo.

30Sekoko, Elija a to khene ka votshe vathu:

Tshuketani ngutu hafuhi kwangu. Votshe va to tshuketela hafuhi kwakwe; se a to longisa txiluvelo txa Mkoma, txi nga ti khundumusilwe. 31Se Elija a to teka digumi da marigwi ni mambidi, madingano ni mtengo wa tihunzu ta vanana va Jakobe, se di to ta kwakwe dipswi da Mkoma, di txi ta kha dona: Ditina dako u na va Israyeli. 32Ngu marigwiyo Elija a to aka txiluvelo kasi kukhozela Mkoma; msana keto, a to tula txiselyana txo dingana digumi da malitro ni mambidi a mati. 33Sekoko a to veketela tikhuni, a to abanisela dirole ngu sitxuwu, a txi si sanzeka txitimwi ka tikhuni. 34Se a to khene:

Tatani mune wa tifuko ngu mati, mi txi ma tshakunuta txitimwi ka mningelo, ni txitimwi ka tikhuni. A txi khene: Thelani ka wumbidi; va to thela ka wumbidi. A nje khene kambe: Thelani kambe ka wuraru; se va to thela ka wuraru. 35Ngu kumaha keto, mati ma txo horolokela txiluvelo, kala kuza kutala msele ngu mati.

36Ku to maheka koko a ti to ku txi ningelwa mningelo wa sakudya, mprofeti Elija a to tshuketa, a txi ta khene: Mkoma, Tixizimu txa Abrahama, txa Isaake ni Israyeli, ti kombekisi nyamsi ti to awe u Txizimu amuwa Israyeli, ni ti taku ani ni txithumi txako, niku ni mahile totshe ti u nga leleta ngu dipswi dako. 37Ni xamule Mkoma, ni xamule kasi ku vathu vava ve tiziva ti to awe Mkoma, u Txizimu, ni ti to u mahile timbilu tawe ti wuya kwako.

38Sekoko wu to wa mndilo ngu ka Mkoma, wu tshokomisa mningelo ni tikhuni, marigwi ni lithulu, wu tshumela wu txi danzela ni mati a mule ka msele. 39Aha dibutho di nga ti wona tiya, di towa ngu tikhohe ta dona di txi kha dona: Mkoma ngene dwe i ku Txizimu! Mkoma ngene dwe i ku Txizimu!

40Se Elija a to khene: Ñolelani votshe vaprofeti va Bhahali, ku nga huluke ni wammweyo wawe. Va to va ñolela; se Elija a to va maha ve kwitima txinambwanani ka Kixoni, va txi ya va daya kona.

Kuguma ka txihala

41Sekoko Elija a to khene ka Akabe: Kwelela u txi yadya u sela, nguko ka pfala txiwuti txa mati.

42 # Wona ni ka: Jak. 5:18. Se Akabe a to kwelela e yadya ni kusela; se Elija a to kwela tshokani ka mmango wa Karmeli, a to ya nama hahatshi e sisa khohe yakwe amu ka mazolo. 43Se a to khene ka mfana wakwe:

Kwela konkuwa u wonetela likasani ka linene. Se a to kwelela e wonisisa, a nje khene: Kha ku nga ni txilo. Se ene a to khene: Engeta kambe mtxhanu ni kumbidi. 44Se ku to maheka tito, a di engetile ka wutxhanu ni kumbidi, a to khene: Hi nga wona direfu dile da didotho do dingana ni dianza da m'thu, di humako ngu lineneni. Se ene a to khene: Kwela u txi ya khawe ka Akabe: Lulamisela txikotxikani txako, u kwitima kuva u si mani kunelwa ngu mati.

45Se ku to maheka ti to ku txi phuma nzumani ngu marefu ni moya, se ma txiwa mati a hombe; se Akabe a to kwela mu ka txikotxikani e tsula Jezireyeli. 46Se dianza da Mkoma di ti txitimwi ka Elija, awu a nga sunga txiwunu, eta ngu kututuma masoni ka Akabe, kala ha diphangoni ka Jezireyeli.

Currently Selected:

1 Vafumeli 18: BEC2016

Highlight

Copy

Compare