1 Makronika 4
4
Tiveleko ta ka Judha
1Vanana va Judha ngu vava: Perezi, ni Hezironi, ni Karimi, ni Huri, ni Sobhali. 2Se Reyaya, mwana Sobhali, a to veleka Jahati; Jahati a to veleka Awumayi ni Lahadhi; ayiya ngu yona mimwaya ya Vazorati.
3Vanana va tate va Etami ngu vava: Jezireyeli, ni Isima, ni Idhibha; se ditina da ndiyawe i ti ti Hazeleliponi; 4se ni Penuweli, tate wa Gedhori, ni Eseri, tate wa Husa; avava mbanana va Huri, matiwula a Efrata, tate wa Bhetlehema.
5Se Asuri tate wa Tekowa, a ti ni vasikati vambidi: Hela ni Nahara. 6Se Nahara a to veleka Awuzami, ni Heferi, ni Temeni, ni Hahasitari; ngu vava vanana va Nahara. 7Se vanana va Hela ngu vava: Zereti, Isari ni Etinani.
8Se Kozi a to veleka Anubhi ni Zobhebha; ni timwaya ta Ahareli, mwana Harumi.
9Se Jabhesi a to dhundwa ngutu kupinda vanawe; mame wakwe a to mraya ditina daku i Jabhesi, a txi khene: Ni m'velekile ngu xomulo. 10Nguko Jabhesi a to kombela ka Txizimu txa Israyeli, a txi khene: Ni katekise ngutu, u anamisa mihingano yangu, ni dianza dako di va ni nani, ni ku ni vhikela ka sikarato! Se Txizimu txi to mninga ati a nga kombela.
Timwani titxhatxhameto ta timwaya
11Se Kelubhi, mwanawe wa Suwa, a to veleka Meyiri; awule i ku tate wa Estomi. 12Se Estomi a to veleka Bheti-Rafa, ni Paseya, ni Teyina, tate wa Iri-Nahasi; avava mbathu va ka Reka.
13Se vanana va Kenazi ngu vava: Otiniyeli ni Serayi; mwana Otiniyeli i Hatati. 14Se Meyonotayi a to veleka Ofira.
Serayi a to veleka Jowabhi, tate wa va mkovani ka Vavati; nguko i ti ti vavati.
15Se vanana va Kalebhi, mwana Jefoni, ngu vava: Iru, Ela, ni Nahami; se mwana Ela i Kenazi.
16Vanana va Jeyaleleli ngu vava: Zifi, ni Zifa, ni Tiriya, ni Asareyeli.
17Se vanana va Ezra ngu vava: Jeteri, ni Meredhi, ni Eferi, ni Jaloni; a to veleka kambe Miriyamu, ni Samayi, ni Isibha, tate wa Estemowa. 18Se msikati wakwe wa Mujudha, a to veleka Jeredhi, tate wa Gedhori, ni Hebheri, tate wa Soko, ni Jekutiyeli, tate wa Zanowa; avava i ti vanana va Bhitiya, mwana Faro, wule a nga ti tekilwe ngu Meredhi.
19Se vanana va msikati wa Hodhiya, ndiya Nahami ngu vava: Keyila, mugarmita, ni Estemowa, mmahakati.
20Se vanana va Simiyoni i Aminoni, ni Rina, ni Bheni-Hanani, ni Tiloni; vanana va Isi i Zoweti ni Bheni-Zoweti.
Tiveleko ta ka Sela
21Vanana va Sela, mwana Judha, ngu vava: Eri, tate wa Leka, ni Ladha, tate wa Maresa, Sela i ti wa mimwaya ya nyumba ya vathumi vo luka linyu, kona Bheti-Asibheya. 22Kumweko ni Jokimi, ni vathu va Kozebha, ni va Jowasi, ni va Sarafi (vale va nga fuma txitimwi ka va ka Mowabhi), ni va Jasubhi-Lehemi; kambe timhaka tiya nda kale. 23Avava i ti ti vawumbi, va nga ti zumba tithembweni; va ti zumba koneyo kumweko ni mfumeli, va txi mthumela.
Tiveleko ta ka Simiyoni
24Vanana va Simiyoni ngu vava: Nemuweli, ni Jamini, ni Jaribhe, ni Zera, ni Sawule, 25wule mwanakwe i nga ti Salumi, se mwana Salumi i Mibhisamu, mwana Mibhisamu i Misima. 26Se mwanana wa Mixima i Hamuweli, awule a nga veleka Zakuri, se mwana Zakuri i Simeyi. 27Se Simeyi a ti ni digumi da vanana ni mtxhanu ni mmweyo va mazambi, ni mtxhanu wa vanana ni mmweyo vamahorana; aniko vanakwe kha va veleka vanana votala; ni wotshe mwaya wakwe kha wa anda ngutu kufana ni mimwaya ya vanana va ka Judha.
28 # Wona ni ka: Jox. 19:2-8. Se va to zumba Bherisebha, ni Moladha, ni Hazari-Suwale, 29ni Bhila, ni Ezemi, ni Toladhi, 30ni Bhetuweli, ni Horima, ni Zikilagi, 31ni Bheti-Markabhoti, ni Hazari-Susimi, ni Bheti-Bhiri, ni Saharayimi; aawa i ti madhoropa awe, kala ka mbimo ya kufuma ka Dhavidha. 32Se sidhoropana sawe ngu siya: Etami, ni Ayimi, ni Rimomi, ni Tokeni, ni Asami; mtxhanu wa madhoropa, 33ni sotshe sidhoropana sa kona, si nga ti ranganyetile madhoropa awa, kala Bhahali. Aawa ngu ona mazumbo awe ni txhatxhameto ya kona.
34Kambe Mesobhabhi, ni Janileki, ni Josa, mwana Amaziya, 35ni Joweli, ni Jewu, mwana Josibhiya, mwana Seraya, mwana Asiyeli, 36ni Eliyowenayi, ni Jahakobha, ni Jesowayi, ni Asayi, ni Adhiyeli, ni Jesimiyeli, ni Bhenaya, 37ni Ziza, mwana Sifi, mwana Aloni, mwana Jedhaya, mwana Simiri, mwana Semaya; 38ava va nga bhalwa ngu matina awe, i ti ti vathangeli va mimwaya yawe; se mimwaya ya vatate vawe yi to anda ngutu. 39Se va to hoka kala ka txike txa Gedhori, ngu wutxani ka mkovani, va txi lava lihawu la tinvuta tawe. 40Se va to ya mana wudyiselo wo nona ni wukhalo wa hombe, wo dikha, wo humula; nguko va ka Kamu va ti zumba koneyo kale ka kona.
41Avava koko, va nga bhalwa ngu matina awe, va to ta ka masiku a Ezekhiya, mfumeli wa Judha, ve ta haxula matenda ni mazumbo a vale va nga ti maneka koneyo, va txi ma fuvisa do gwita, kala ka ditshiku da nyamsi, se vona ve zumba ka wukhalo wawe, nguko koneyo ku ti ni wudyiselo wa tinvuta tawe. 42Vamwani kwawe, ka vanana va Simiyoni, 500 wa vavamna, va to tsula mimangoni ka Seyiri; va txi thangelwa ngu Pelatiya, ni Neyariya, ni Refaya, ni Uziyeli, vanana va Isi. 43Kambe va to daya miboti ya Vaamaleki vale va nga huluka, se ve aka koneyo, kala ka ditshiku da nyamsi.
Currently Selected:
1 Makronika 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
