1 Makronika 10
10
Kufa ka mfumeli Sawule
(1 Samuwele 31:1-13)
1Se Vafilista va to lwa ni va ka Israyeli; se vavamna va ka Israyeli va to tutuma masoni ka Vafilista, kudawa votala mimangoni ka Gilibhowa. 2Se Vafilista va to simama ve tutumisa Sawule ni vanana vakwe, aniko va to daya Jonatani, ni Abhinadhabhi, ni Malkisuwa, vanana va Sawule. 3Se kulwa ko wukela Sawule ku to ya masoni, vafuli va to mmana, se ene a to thava ngutu masoni ka vafuli. 4Sekoko Sawule a to khene ka mrwali wa matxhari akwe: Thavisa ditxhari dako u ni thola ngu dona, kasi ku vanyamakhutu vava va si ti ve ta ni tseketsela. Kambe mrwali wa matxhari akwe kha tumela, nguko a ti ti thava ngutu; sekoko Sawule a to teka ditxhari e ti thola ngu dona. 5A di ti woni koko, mrwali wa matxhari akwe taku Sawule a fite, nene a to teka ditxhari dakwe e ti daya efa. 6Ngu kumaha keto, Sawule a to fa ni vanana vakwe va vararu; ni votshe va nyumba yakwe va to fa kumweko nayo. 7Se ngako votshe vavamna va ka Israyeli, vale va nga ti mkovani, va tutumile, va di ti woni ti to ni ti to Sawule ni vanana vakwe va datwe, va to leka madhoropa awe ve tutuma: Sekoko Vafilista va to ta ve ta zumba ka ona.
8Se ku to maheka taku, va di tile Vafilista ka ditshiku dimwani ku ta handa ka sirumbi sile, va to mana Sawule ni vanana vakwe va di fite, mimangoni ka Gilibhowa. 9Se va to va handa, ve teka msungo wakwe ni matxhari a kona, ve si rumela ka dotshe ditiko da Vafilista, kasi kuzivisa ka sithombe sawe ni ka vathu. 10Se va to ya veka matxhari awe nyumbani ka txizimu txawe, se msungo wakwe va to ya wu gogotela nyumbani ka Dhagoni. 11Va di ti pfite koko, votshe va didhoropa da Jabhesi-Gileyadhi, totshe tile Vafilista va nga maha ka Sawule, 12votshe vavamna va mtamo va to khukha, ve teka txirumbi txa Sawule ni sa vanana vakwe, ve tsula naso Jabhesi; kambe va to teka marambu a kona ve ma kelela hahatshi ka mkusu, kona Jebhesi, ve ti tona sakudya, mtxhanu wa masiku ni mambidi.
13 # Wona ni ka: Levh. 19:31; 20:6; 1 Sam. 13:8-14; 15:1-24; 28:7-8. Se Sawule a to fa ngu mhaka ya kutshuralela ku a nga tshuralela ngu kona Mkoma, ngu mhaka ya dipswi da Mkoma, adile a nga mbi di vekisa; ni ku kambe a lavile m'huti, e ta mu wotisa, 14aniko kha lava Mkoma, ngu toneto, Mkoma a to m'daya, e teka mfumo wakwe e ningela ka Dhavhidha, mwana Jese.
Currently Selected:
1 Makronika 10: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
