1 Makronika 9
9
Vale va nga wuya ngu wukhumbini
1Se votshe va ka Israyeli va to balwa ngu tiveleko tawe; aniko va bhatwe amu ka dibhuku da vafumeli va ka Israyeli; kambe va ka Judha va to yiswa Bhabhilona, ngu mhaka ya wuhambunyeti wawe. 2#Wona ni ka: Ezr. 2:27; Neh. 7:73; 11:3-4. Se vaaki vo khata, vale va nga ti zumba ka makhalo awe, ni ka madhoropa awe, i ti ti va ka Israyeli, ni vaphaxeli, ni Valevhi, ni Vaneti. 3Kambe vamwani ka vanana va ka Judha, ni ka vanana va Bhenjamini, ni ka vanana va Efrayime ni Manasi, va to ya zumba Jerusalema: 4Utayi, mwana Amiyudhe, mwana Oniri, mwana Iniri, mwana Bhani, wa vanana va ka Perezi, mwana Judha; 5ka va ka Siloni: I Asaya, matiwula, ni vanana vakwe; 6ka vanana va Zera: I Jeweli ni vanawe, i ti 690 wa vona; 7#Wona ni ka: Neh. 11:7. ka vanana va Bhenjamini: I Salu, mwana Mesulami, mwana Hodhavhiya, mwana Hasenuwa; 8ni Ibhineya, mwana Jerowamu, ni Ela, mwana Uzi, mwana Makiri, ni Mesulami, mwana Sefatiya, mwana Reweli, mwana Ibhinija; 9se vanawe madingano ni tiveleko tawe i ti 956 wa vona; votshe vavamna vava, i ti vathangeli va tinyumba ta vatate vawe.
Vaphaxeli vale va nga ti zumba Jerusalema
10Se ka vaphaxeli: I Jedhaya, ni Jeyoyaribhi, ni Jakimi, 11ni Azariya, mwana Hilikiya, mwana Mesulami, mwana Zadhoki, mwana Merayoti, mwana Ayitubhe, mthangeli wa Nyumba ya Txizimu; 12Adhaya, mwana Jerowamu, mwana Pasuri, mwana Malikiya, ni Masayi, mwana Adhiyeli, mwana Jazera, mwana Mesulami, mwana Mesilemite, mwana Imeri; 13kumweko ni vanawe, i ku vathangeli va tinyumba ta vatate vawe, i ti ti 1.760, vavamna va mtamo amu ka mthumo wa Nyumbani ka Txizimu.
Valevhi vale va nga ti zumba Jerusalema
14Se ka Valevhi: I Semaya, mwana Hasubhe, mwana Azirikami, mwana Hasabhiya, wa vanana va Merari; 15Bhakebhakari, ni Heresi, ni Galali, ni Mataniya, mwana Mika, mwana Zikiri, mwana Asafe; 16ni Obhadhiya, mwana Semaya, mwana Galali, mwana Jedhutumi; ni Bherekiya, mwana Asa, mwana Elikana, m'hanyi wa sidhoropanani ka Vanetofati.
Vawoneleli va Dithepele va nga ti zumba Jerusalema
17 # Wona ni ka: Neh. 11:19. Vawoneleli va sike ngu vava: Salumi, ni Akubhe, ni Talimoni, ni Ayimani ni vanawe, se mthangeli wawe i ti Salumi. 18Kala ka mbimo yile, va ti woneleta txike txa mfumeli ngu didhawa da wutxani; avava mba woneleli va wugovelo wa vanana va Levhi.
19Se Salumi, mwana Kore, mwana Ebhiyasafi, mwana Kora, ni vanawe va nyumba ya tate wawe, va ka Kora, va ti ti ni mthumo wo sawuleka, kambe i ti vawoneleli va txike txa ditenda; kambe vatate vawe i ti vathangeli va yimbi ya wugovelo wa Mkoma, ni vawoneleli va txike. 20Se Finiyasi, mwana Eleyazari, i ti ti mthangeli hagari kwawe, wule Mkoma a nga ti ni nene.
21Se Zakariya, mwana Meselemiya, i ti muwoneleli wa txike txa ditenda da msengeletano.
22Votshe vava, va to sawulwa kasi kuva vawoneleli va sike, votshe i ti 212; se ngu vona vava va nga vekwa ngu tiveleko tawe, madingano ni sidhoropana sa kona, kambe Dhavhidha, ni Samuwele, m'huti, va to va veka ka mithumo yawe. 23Vona ni vanana vawe va ti ka sike sa Nyumba ya Mkoma, ka nyumba ya ditenda, kumweko ni vawoneleli. 24Vawoneleli va ti ka mune wa madhawa: Ngu da wutxani, ngu mswa-ditambo, ngu wuphemba, ni wulambwe. 25Se vanawe va ti ti sidhoropanani kwawe, ka ditshiku da wutxhanu ni mambidi, ka mbimo ni mbimo, va ti wulela ve thuma navo. 26Nguko ka mthumo wule, ku ti ti ni mune wa vawoneleli vahombe va sike, i nga ti Valevhi, va nga ti ni mthumo wo xayisa tiyumba ni tithomba ta Nyumbani ka Txizimu. 27Se ni wusiku va ti ti randela Nyumba ya Txizimu, nguko va ti ningilwe mthumo wo wonelela ni kutula matimba, masiku otshe.
Vamwani Valevhi
28Se vokari kwawe va ti ti ni mthumo wo xayisa siya sa mikombelo, nguko va ti ti si bala si txi huma, ve si bala si txi wuya. 29Nguko kwawe, vokari va ti ni mthumo wo xayisa simaha, ni sotshe siya so sawuleka, sa mpupu wo tshura, ni sa vhinya, ni sa mtona, ni sa dibaselo, ni sa makha. 30Se vokari ka vanana va vaphaxeli i ti vamahi va makha.
31Hagari ka Valevhi, Matitiya, matiwula a Salumi, mkorayi, a ti ti thangela mthumo wa kuyoka. 32Se vamwani ka vanana va Vakowati, va vanawe, ku ti ni vokari va nga ti vekilwe ka mthumo wo lulamisa mapawu a mphaxo, ka yotshe Masabhata.
33Vamwani ka vava i ti vaembeleli, ni vathangeli va tinyumba ta vatate, hagari ka Valevhi, va txi zumba sinyumbanani, va si nga ni mthumo wumwani; nguko wusiku ni mitshikari va ti maneka ka mthumo wonewo. 34Avava i ti vathangeli va vatate hagari ka Valevhi, vathangeli ngu tiveleko tawe; va ti zumba Jerusalema.
Vakale ni tiveleko ta mfumeli Sawule
(1 Makronika 8:29-38)
35Kambe kona Gibheyoni ku ti zumba Jeyeli, tate wa Gibheyoni (ditina da msikati wakwe i ti Mahaka), 36ni mwanakwe wa matiwula Abhidhoni, ni Zuri, ni Kisi, ni Bhahali, ni Neri, ni Nadhabhi, 37ni Gedhori, ni Ayo, ni Zakariya, ni Mikiloti. 38Se Mikiloti a to veleka Simeya, avava ni vona va to aka kona Jerusalema masoni ka vanawe.
39Neri a to veleka Kisi, se Kisi a to veleka Sawule, se Sawule a to veleka Jonatani, ni Malikisuwa, ni Abhinadhabhi, ni Esibhahali. 40Se mwana Jonatani i ti Meribhi-Bhahali, Meribhi-Bhahali a to veleka Mika. 41Se vanana va Mika ngu vava: Pitoni, ni Meleki, ni Tareya. 42Se Akazi a to veleka Jayera, Jayera a to veleka Alemeti, ni Azimavheti, ni Ziniri; Ziniri a to veleka Mosa. 43Se Mosa a to veleka Bhineya, awule a nga veleka Refaya, wule a nga veleka Eleyasa, a nga veleka Azeli.
44Se Azeli a to veleka mtxhanu wa vanana ni mmweyo, matina awe ngu awa: Azirikamu, ni Bhokiru, ni Ismayeli, ni Seyariya, ni Obhadhiya, ni Hanani; avava mbanana va Azeli.
Currently Selected:
1 Makronika 9: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
