1 Makronika 11
11
Dhavhidha mfumeli wa Israyeli ni wa Judha
(2 Samuwele 5:1-10)
1Sekoko votshe va ka Israyeli va to ta sengeletana ka Dhavhidha, kona Hebroni, va txi kha vona: Wona taku hi marambu ako ni nyama yako. 2Hambi ni kale, Sawule i di ngadi mfumeli, ngawe u nga ti ti huma ni kuwulela ni Israyeli; Mkoma, Txizimu txako, a ti khene kwako: Awe u na dyisa vathu vangu va ka Israyeli, ni ti to awe u na va mthangeli txitimwi ka Israyeli.
3Se otshe madhota a ka Israyeli ma to ta ka mfumeli, kona Hebroni, aniko Dhavhidha a to maha navo txitumelelano kona Hebroni, masoni ka Mkoma; se vona va to tota Dhavhidha kuva mfumeli txitimwi ka Israyeli, madingano ni dipswi da Mkoma, ngu kuwomba ka Samuwele.
4 # Wona ni ka: Jox. 15:63; Val. 1:21. Se Dhavhidha a to khukha ni votshe va ka Israyeli ve tsula Jerusalema i ku Jebhusi, nguko haleya ku ti ti ni Vajebhusi, va nga ti zumba ka dona ditiko dile. 5Se vazumbi va Jebhusi va to kha vona ka Dhavhidha: Awe khu na mbi wulela hawa. Kambe Dhavhidha a to teka mkhokhola wa Siyoni, i ku Didhoropa da Dhavhidha. 6Nguko Dhavhidha a to khene: Ni wuhi wule a no khata ene e daya Vajebhusi a na va mthangeli wa hombe wa mabutho. Sekoko Jowabhi, mwana Zeruiya, a to khata ene e kwelela didhoropani, se va to mmaha mthangeli. 7Dhavhidha a to zumba mkhokholani, e wu dhana ku Didhoropa da Dhavhidha. 8Se a to aka didhoropa ka madhawa otshe, kukhukhela Milo kala a txi di ranganyeta; kambe Jowabhi a to longisa mule ku nga sala. 9Dhavhidha a to ya masoni ngu kuengetekelana ni kukula, nguko Mkoma wa Mabutho a Tiyimbi a ti kumweko nayo.
Masotxhwa a nduma a Dhavhidha
(2 Samuwele 23:8-39)
10Avava ngu vona vathangeli va tindena, vale Dhavhidha a nga ti navo, vale va nga m'vhunetela ngutu ka mfumo wakwe, ni votshe va ka Israyeli, kasi ku mmaha mfumeli, madingano ni dipswi da Mkoma, ngu Israyeli.
11Se mtengo wa tindena tile Dhavhidha a nga ti nato, ngu wuwa: Jasobheyami, Muhakimoni, mthangeli wa hombe wa tindena, awule mbimo yi a nga ndiwita mseve wakwe, a nga daya 300 wa vavamna ngu txikhati tximwetxo. 12Se ene a ti londetwa ngu Eleyazari, mwana Dhodho, wa ka Awoyi; ene a ti hagari ka vavamna vararu. 13Awuwa a ti kumweko ni Dhavhidha kona Pasi-Dhamini, mbimo yile Vafilista va nga ti patanile koneho va txi ya kulwani, se didhawa dimwani da thembwe di ti tate ngu sevhadha, aniko vathu va to thava masoni ka Vafilista. 14Va to ya ema hagari ka thembwe yile, va txi lwa, ve daya Vafilista; se Mkoma a to va ninga kuxula ka hombe.
15Se vararu amu ka magumi mararu a vathangeli, va to ngirimela diringwini ka Dhavhidha, phakoni ka Adhulami; se dibutho da Vafilista di ti govile mkovani ka Refayime. 16Sekoko ka mbimo yoneyo Dhavhidha a ti ti mkhokholani, dizumbo da Vafilista di ti ti Bhetlehema. 17Dhavhidha a to womba ngu kunavela, a txi khene: I mani a nga ni ningako mati a txisima txa Bhetlehema, txi txi ku hafuhi ni txike ni sela kani? 18Sekoko vale va vararu, va to dhawula ngu hagari ka wugovelo wa Vafilista, veya reka mati a txisima txa Bhetlehema, txile txi nga ti hafuhi ni txike; ve ta ninga Dhavhidha, aniko Dhavhidha kha ma lava kusela, kambe a to ma theketa masoni ka Mkoma. 19Se a txi khene: Txizimu txangu u nga tumele ti to ni maha to nga tiya! Ina ani ni nga sela mnoha wa vavamna vava ni wutomi wawe kani? Nguko va ni tisete mati awa ngu kuningela wutomi wawe. Se ene kha tumela ku ma sela. Atiya ngu ti ti nga mahwa ngu tindena tile tatiraru.
20Se nene Abhixayi mwanawe wa Jowabhi, i ti mthangeli ka vale va vararu, wule a nga ndiwita mseve wakwe e daya 300 wa vavamna; se e mana nduma hagari ka vale va vararu. 21Ka votshe va vararu, Abhixayi a humelete ngutu kupinda vale va vambidi, ngu kumaha keto, a to maha mthangeli wawe; kambe kha hoka ka vale va vararu vo khata.
22Ni Bhenaya, mwana Joyadha, mwanana wa wamwamna wa ndena, wa hombe ka mthumo wa Kabhizeyeli; a to daya tingonyamo timbidi ta mtamo ta Mowabhi; ngene a nga relela eya daya ngonyamo mndani ka diphala, ngu mbimo ya hunguva. 23A to daya kambe wamwamna mmweyo wa Muegipta, wamwamna wa txiemo txo lapha ngutu, wa mtxhanu wa mikono; se Muegipta a ti ni mseve manzani, wo fana ni ndonga ya mluki; aniko a to relela ni ndonga, eya honyola mseve manzani ka Muegipta e m'daya ngu mseve wakwe apune. 24Atiya ngu ti ti nga mahwa ngu Bhenaya, mwana Joyadha, se a to mana nduma hagari ka vavamna vale va vararu. 25Wona taku ka magumi mararu a vavamna, ene i ti wa nduma ngutu; hambi keto, kha hoka ka vale va vararu; Dhavhidha a to m'veka kuva mthangeli wa vawoneleli vakwe.
26Se tindena ta mabutho a yimbi ngu tiya: Asayeli, mwanawe wa Jowabhi, ni Elanani mwana Dhodho, wa Bhetlehema; 27Samoti, Muharodhi; Helesi, mpeloni; 28Ira, mwana Ikesi, m'tekoyi; Abhiyezeri, muanatoti; 29Sibhekayi, m'husati, Ilayi, wa Ayoyi; 30Maharayi, mnetofati; Heledhi, mwana Bhahana, mnetofati; 31Itayi, mwana Ribhayi, wa Gibheya, wa vanana va ka Bhenjamini; Bhenaya, mpiratoni; 32Hurayi wa txinambwanani ka Gahasi; Abhiyeli muaribha; 33Azimavhete, m'bhaharumi; Eliyabha, wa Sahalibhoni. 34Ka vanana va ka Hasemi, wa Gizoni: Jonatani, mwana Sagi, Muharari; 35Ayamu, mwana Sakari, Muharari; Elifali, mwana Uri; 36Heferi, mmekerati; Ayasi mpeloni; 37Heziro mkarmeli; Naharayi, mwana Ezibhayi; 38Joyeli, mwanawe wa Nathani; Mibhari, mwana Hagiri; 39Zeleki, Muamoni, Naharayi m'bheroti; mrwali wa matxhari a Jowabhi, mwana Zeruiya; 40Ira muitiri, Garebhi, Muitri; 41Uriya Muheti, Zabhadhi, mwana Alayi; 42Adhina, mwana Siza, wa ka Rubheni, mthangeli wa va ka Rubheni; a nga ti thangela magumi mararu a vavamna; 43Hanani, mwana Mahaka; ni Josafati wa ka Mitani; 44Uziya muastarati, Sama ni Jeyeli, vanana va Otami muaroweri; 45Jedhiyayeli mwana Simiri; ni Jowa, mwanawe, mtizi; 46Eliyeli mmahavhi; ni Jeribhayi, ni Josavhiya, mbanana va Elinahani; ni Itima, wa ka Mowabhi. 47Eliyeli, ni Obhedhi ni Jahasiyeli, mmezobhayi.
Currently Selected:
1 Makronika 11: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
