4 Musa 9
9
Pèsta Paskah Peduaken
1 #
2 Ms. 12:1-13
I bulan sada tahun peduaken enggo kessa itadingken bangsa Israel tanoh Mesir, mengerana nola mo Jahowa taba si Musa i gurun pasir Sinai. Nina Jahowa mo, 2-3“I ari sipuluh empat bulan èn, memungkah enggo kessa sundut mataniari, kennah irayaken kalak Israel ngo pèsta Paskah mengèkutken hatoren sienggo itetapken.” 4Nai idokken si Musa mo bangsa Israel memèstaken Paskah. 5Irayaken kalak i ngo pèsta Paskah i i gurun pasir Sinai tupung cibon i ari sipuluh empat bulan sada. Karina ngo iulaken kalak i tosè bagè sienggo ipèrèntahken Jahowa bai si Musa.
6Tapi lot ngo barang piga bai kalak i nai samur kumerna enggo menjamah bangkè, gabè oda ndorok dekket memèstaken Paskah arinkenna i. Laus mo kalak i menghadep si Musa dekket si Aron 7janah mendokken, “Samur ngo kami ènda kumerna enggo menjamah bangkè. Tapi kasa kennah iliplip kami gabè mak ndorok dekket memèlèken pèlèen bai Jahowa rebbak dekket kaka-anggi nami?”
8Ialoi si Musa mo, “Pèma kènè mo lebbè kujalo barang bakunè pendokken Jahowa.”
9Ipasulak Jahowa mo si Musa 10mendokken taba bangsa Israel, “Mula lot i tengah-tengah ndènè nai barang ibas pinempar ndènè nai sienggo samur kumerna enggo menjamah bangkè barang pè tupung i perdalanen ndaoh, kennah ma ngo tong ia memèstaken pèsta Paskah bai Jahowa. 11Tapi pèsta idi irayaken kennah sibulan nai i bulan sinaing roh nola, imo i berngin ari sipuluh empat bulan dua. Pèstaken mo ari idi merkitè kipangan biri-biri Paskah merdengan roti siso meragi dekket roroh pagit. 12#2 Ms. 12:46; Joh. 19:36 Ulang lot tading bakin kènè pa- ngaen idi soh mi barembenkenna, janah sada pè ulang lot mpenggel bakin kènè ibas tulan pinakan sinipèlèken taba Aku i nai. Pèstaken kènè mo Paskah idi rembang mi karina hatorenna.
13Balikna nola ma kalak siso samur janah oda ma tupung i perdalanen, tapi lupa memèstaken Paskah, oda nè Kuètong ia bangsangKu, kumerna oda memèlèken pèlèen ia tabaKu i tikki sienggo itentuken. Kennah igongken kalak sibagidi mo dosana.
14Mula lot i tengah-tengah ndènè kalak sidèban naing memèstaken Paskah, kennah irayaken mo tosè bagè mi karina hatoren dekket sienggo itetapken kin. Merdalan ngo pati-patiin idi bai karina jelma, kalak Israel barang pè kalak sidèban.”
Hembun Simercuhaya
(2 Ms. 40:34-38)
15-16I ari tikan ipajek Undung-undung Jahowa, roh mo hembun menangkemi Undung-undung i. Tikan berngin nai soh mi siceggen bagè api ngo idahen hembun i. 17Gennep kumèkè hembun idi, irontas kalak Israel mo perundung-undungen kalak i, nai mèter berkat mo. Janah barang i dikè susur hembun idi, i bekkas idi nola ma mo kalak i merundung-undung. 18Merkitè perèntah Jahowa irontas bangsa Israel mo undung-undung kalak i, janah merkitè perèntah Jahowa ma ngo tong ibahan kalak idi nola mengolihi. Sidekkah i babo Undung-undung Jahowa hembun idi, hot mo kalak idi merian i bekkas i. 19Mula ndekkah ngo hembun idi i babo Undung-undung idi, iuèi kalak i ngo hatoren Jahowa janah oda mèrèt i bekkas idi nai. 20Tapi sipata pellin barang piga-piga ari sambing ngo kessa hembun idi merian i babo Undung-undung idi. Barang bakunè pè nola, perèntah Jahowa ngo menentuken kalak i merian i sada bekkas barang berkat. 21Sipata nggèut ngo hembun i pellin mulai cibonna soh mi siceggen kessa i si merian, janah tikan kumèkè nola hembun i siceggenna berkat mo kalak i. Barang ndigan ari kumèkè hembun i, tah mahar barang berngin, berkat ngo kalak i. 22Sidekkah merian hembun idi i babo Undung-undung Jahowa, tah dua ari dekkahna, barang sibulan, sitahun barang lebbih, sidekkahna i mo kalak idi merian i bekkas idi. Mula kumèkè hembun idi, nai ipè asa berkat kalak idi. 23Merian kalak i i sada bekkas barang berkat mi bekkas sidèban rembang mi perèntah Jahowa siniberèken Jahowa arap si Musa.
Currently Selected:
4 Musa 9: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
