4 Musa 10
10
Trompèt ibas pirak nai
1Nai nina Jahowa mo mbang si Musa, 2“Bahan mo dua trompèt ipas pirak tingtingen nai lako mendiloi jelma nterrem mertumpu barang mendokken kalak i lako berkat. 3Mula duana isempul ndekkah, merlapaten mo i karina bangsa i kennah mertumpu mi gembarmu i lebbè pèntu Undung-undungKu. 4Tapi mula pellin sada sambing ngo kessa isempul, merlapaten pellin simpantasniasè ngo kennah mertumpu mi gembarmu. 5Mula merpostep-mpostep ngo sora sarunè i isempul, imo tandana kennah berkat marga-marga simerian kettan kebincaren. 6Mula isempul nola ma merpostep-mpostep peduakaliken berkat mo marga-marga si kettan Selatan. Jadi mula sora merpostep-mpostep merlapaten kennah berkat mo bangsa i, 7tapi mula ndekkah mersora merlapaten kennah mertumpu bangsa i. 8Kennah Imam dukak-dukak si Aron ngo menempul trompèt idi. Idi mo hatoren sikennah uèen ndènè soh sidekkah-dekkahna.
9Janah mula mergeraha kènè i nagerri ndènè lako mempertahanken diri ndènè mengalo musuh simengkubu kènè, sempul mo trompèt idi. Nai Aku, Jahowa Dèbata ndènè, mo mengurupi dekket paluahken kènè ibas musuh-musuh ndènè nai. 10Bagi ma tupung ari kènè mersampang atè, imo tupung pèsta-pèsta Peltak Bulan dekket pèsta-pèsta ndènè sidèbanna i, kennah isempul ngo trompèt i sinderrang memèlèken pèlèen situtungen dekket pèlèen perdamèen kènè taba Aku. Nai Kuurupi mo kènè. Aku Jahowa ngo Dèbata ndènè.”
Berkat kalak Israel
11I tahun peduaken enggo kessa itadingken bangsa Israel tanoh Mesir, i ari duapuluh bulan dua, kumèkè mo hembun i babo Undung-undung Jahowa nai. 12Nai merotor mo kalak Israel berkat menadingken gurun pasir Sinai, janah mentadi mo hembun idi soh kessa kalak idi mi gurun pasir Paran.
13Idi dèng mo perlebbè kalohon berkat kalak idi merkitè perèntah Jahowa tarap si Musa. 14Siperlebbè berkat imo soridadu siculèndung i terruh bandèra kesadaen Juda, mersada-sada nuhnuhen: Si Nahason anak si Aminadab menguluken nuhnuhen marga Juda, 15Si Netaneel anak si Zuar menguluken nuhnuhen marga Isasar, 16janah si Eliab anak si Helon menguluken nuhnuhen marga Zebulon.
17Nai irontas mo Undung-undung Jahowa, janah berkat mo horong si Gerson dekket Merari simerembah Undung-undung idi.
18Nai berkat nola ma mo nuhnuhen siculèndung i terruh bandèra kesadaen marga Ruben, mersada-sada nuhnuhen: Si Elizur anak si Syedeur menguluken nuhnuhen: Marga Ruben, 19Selumiel anak si Zurisyadai menguluken nuhnuhen marga Simeon, 20janah si Elyasaf anak si Rehuel menguluken nuhnuhen marga Gad.
21Enggo kessa i berkat mo kalak Kehat simerembah barang-barang simbadia. Mula soh kessa kalak i mi bekkas permalamen sirimbaru, enggo mo ipajek nola Undung-undung Jahowa i sidi.
22Nai mengèkut nola ma mo soridadu siculenggem i terruh bandèra kesadaen Efraim, mersada-sada nuhnuhen: Si Elisama anak si Amihud mo menguluken nuhnuhen marga Efraim, 23si Gamaliel anak si Pedazur mo menguluken nuhnuhen marga Manasye, 24janah si Abidan anak si Gideoni mo me- nguluken nuhnuhen marga Benjamin.
25Perpodi berkat mo rombongen soridadu siculenggem i terruh bandèra kesadaen marga Dan. Kalak idi mo pertaram i podi karina pulungen idi. Merdalan mo kalak idi mersada-sada nuhnuhen: Si Ahiezer anak si Amisyadai menguluken nuhnuhen marga Dan. 26Si Pagiel anak si Okhran menguluken nuhnuhen marga Asyer, 27janah si Ahira anak si Enan menguluken nuhnuhen marga Naptali. 28Idi mo persusun nuhnuhen kalak Israel, mersada-sada nuhnuhen gennep berkat kalak idi lako mbungkas.
29Idokken si Musa mo taba silihna, si Hobab anak si Rehuel kalak Midian, “Naing berkat mo kami mi bekkas sinidokken Jahowa naing berènkenna bai nami. Enggo iperbagah-bagah Jahowa simerandal bai kalak Israel. Asa èkutken kènè mo, mèndè pè kubakin kami bai ndènè.”
30Ialoi si Hobab mo, “Lias atè mo, tapi dok atèngku naing balik ngo aku mi kutangku.”
31“Ulang mo tadingken kami,” nina si Musa, “kènè ngo ndorok menuduhken dalan bai nami, kumerna kènè ngo bettoh-bettohen barang kan dikè kita ndorok mermalam i gurun pasir. 32Mula dekket kènè, karina simerandal sinibakin Jahowa taba kami, bagidi ma pè kubakin kami taba kènè.”
Berkat bangsa Israel
33Enggo kessa itadingken bangsa Israel delleng Sinai, delleng kebekkasen Jahowa, merdalan ngo kalak i tellu ari dekkahna. Pèti Perpadanen Jahowa dak ijolo ngo ibaing kalak i lako menulusi bekkas perundung-undungen bai kalak i. 34Mula berkat kalak i i bekkas perundung-undungen nai, dak i babo kalak i ngo tong hembun Jahowa tikan mahar.
35 #
Ps. 68:2
Gennep naing iembah kalak i Pèti Perpadanen i, idokken si Musa mo, “Kèkè mo ko alè Jahowa, pesompar-baèrken mo musuhMu asa mperrus kalak simengkecegoken Kono.” 36Janah gennep soh kessa Pèti Perpadanen idi i bekkas pentadien, nina si Musa mo, “Balik mo ko alè Jahowa, mendahi bangsa Israel simerribu-ribu i.”
Currently Selected:
4 Musa 10: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
