4 Musa 8
8
Cara menggamparken lampu
1-2 #
2 Ms. 25:31-40, 37:17-24 Nina Jahowa mo mbang si Musa, “Dokken mo bai si Aron magahken mula tikan mengelakati sipitu lampu ibas nèhè lampu idi ia kennah mendè ngo ibakin asa ndorok ibendangi kettan lebbè nèhè lampu idi.” 3Iulaken si Aron mo sinidokken Jahowa i. Ibakin mo lampu-lampu idi mendempakken mi lebbè nèhè lampu idi. 4Ukum bekkas lampu idi, soh mi babo dekket bunga-bunga perhiasenna ibahan ibas emmas siniteppa nai ngo, mengèkutken codien sinipecidah Jahowa bai si Musa.
Pebangkitken kalak Lewi
5Nina Jahowa mo mbang si Musa, 6“Pejaè mo kalak Lewi bai kalak Israel sidèbanna i nai janah baing mo kerja menguras bai kalak i merkitè cara bagèen: 7pispisi mo kalak i dekket laè kerja menguras janah dokken mo kalak i mengkiskis karina badanna dekket menaptapi oles kalak i. Merkitè bagidi mbersih mo kalak i. 8Nai dokken mo kalak i memuat sada lembu tonggal bajar dèng dekket pèlèen hantaren ibas nditak sinisakkor dekket minak. Nai kono pè kennah buatenmu mo sada lembu tonggal sidèban mahan pèlèen kesasaen dosa. 9Nai pepulung mo karina bangsa Israel janah dokken kalak Lewi cènder i lebbè Undung-undungKu. 10Karina bangsa i kennah mengampèken tanganna mi babo takal kalak Lewi, 11nai kennah ipèlèken si Aron mo kalak Lewi idi sikira pèlèen merkedekoen ipas kalak Israel nai bangKu, asa ndorok iulaken kalak i pemojien taba Aku. 12Nai kennah iampèken kalak Lewi mo tanganna mi babo takal lembu tonggal sidua idi; sada mo i kennah ipèlèken mahan pèlèen kesasaen dosa, janah sisada nai mahan pèlèen situtungen. Merkitè kerja bagidi mo kalak Lewi iuras.
13Kelini mo kalak Lewi baKu janah dokken mo kalak i mengkebasi si Aron dekket dukak-dukakna. 14Merkitè kerja bagidi mo ipejaè kènè kalak Lewi bai kalak Israel sidèbanna nai, asa gabè milikKu. 15Enggo kessa ibaing kono kerja lako menohken kalak Lewi idi, merhak mo kalak idi mengula ibagasen Undung-undungKu. 16Enggo Kubakin kalak i gabè gancih anak buka baju kalak Israel karina; jadi karina mo kalak i ikelini baKu. 17#2 Ms. 13:2 Sinderrang Kubunuh karina anak buka baju i Mesir, enggo Kukelini kin baKu anak buka baju i gennep jabu kalak Israel nai dekket pinakan siperlebbè tubuh pè. 18Bagèndari pè sikira gancih karina anak buka baju kalak Israel, Kuteddo mo kalak Lewi, 19janah Kusohken kalak Lewi idi bai si Aron dekket dukak-dukakna, asa ndorok mengula bai kalak Israel ibagasen Undung-undungKu. Bagi ma asa ipidoken kalak i kesasaen dosa bangsa Israel baKu nai asa ulang sempa mara bai bangsa i mula tupung njolmitsu kalak i roh mi gembar bekkas simbadia i.”
20Kumernana i ipèlèken si Musa, si Aron dekket karina bangsa Israel mo kalak Lewi bai Jahowa, bagè sienggo iperèntahken Jahowa bai si Musa. 21Menguras mo kalak Lewi janah menaptapi pakèen kalak i, nai ipèlèken si Aron mo kalak i sikira pemerèken merkedekon bai Jahowa. Ibaing ma mo kerja menguras kalak i. 22Iulaken kalak Israel ngo karina siniperèntahken Jahowa bai si Musa tersèngèt kalak Lewi. Merkitè bagidi merhak mo kalak Lewi mengula i bagasen Undung-undung Jahowa siniuluken si Aron dekket dukak-dukakna.
23Nai nina Jahowa mo taba si Musa, 24“Karina kalak Lewi simerumur duapuluh lima tahun mi dates kennah iulaken ulaenna ibagasen Undung-undungKu, 25janah enggo kessa merumur limapuluh tahun maluah mo ia ibas ulaen idi nai. 26Enggo kessa i ndorok mo ia mengurupi kalak Lewi sidèbanna i mengula ibas Undung-undungKu, tapi oda nèngè pengula menettap. Bagidi mo cara mengatur ulaen kalak Lewi.”
Currently Selected:
4 Musa 8: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
