4 Musa 7
7
Pèlèen kalak simenguluken
1Enggo kessa dung si Musa pejengjengken Undung-undung Jahowa, ipèstaken mo Undung-undung i dekket karina haliuna merkitè idalisi karina dekket minak. Bagi ma mo tong ibakin mi langgaten dekket karina haliuna. 2Nai karina simpantas niasè kalak Israel, imo pengulu-pengulu marga simertanggung jabab ibas ulaen pengkèrahen, 3memèlèken mi hadeppen Jahowa ennem pedati dekket sipuluh dua lembu: Gennep dua kalak pengulu memerèken sada pedati, janah memerèken tersada lembu. Enggo kessa ipèlèken kalak idi i, 4nina Jahowa mo mbang si Musa 5“Jalo mo siniberèken kalak idi asa lot merembah Undung-undungKu; pesakat mo karina idi bai kalak Lewi rembang mi ulaen kalak i.” 6Nai ipesakat si Musa mo pedati-pedati dekket lembu idi bai kalak Lewi. 7Dua pedati dekket empat lembu iberèken bai kalak Gerson, 8empat pedati dekket ualuh lembu bai kalak Merari, rembang mi ulaen siniulaken kalak i siniuluken si Itamar anak Imam Aron. 9Tapi ukum kalak Kehat oda ngo menjalo pedati barang pè lembu bai si Musa nai, kumerna ugas-ugasen simbadia simahan tanggung jabapen kalak i, kennah ipersan kalak i ngo i barana.
10Karina simpantasniasè i mersiembah pèlèenna ngo lako memèstaken kerja mensahken langgaten. Tikanna enggo kessa kebbas kalak i merembah pemerèken kalak i i lebbè langgaten, 11nina Jahowa mo mbang si Musa, “Dokken mo bai kalak i magahken gennep ari sidekkah sisipuluh dua ari èn, sada kalak ibas pengulu idi nai kennah memèlèken pèlèenna mahan kerja mensahken langgaten.”
12-83Gennep mo mersiembah pèlèenna mengèkutken persusunna èn:
| Ari | Marga | Simenguluken |
|---|---|---|
| Perlebbè | Juda | Si Nahason anak si Aminadab |
| Peduaken | Isasar | Si Netaneel anak si Zuar |
| Peteluken | Zebulon | Si Eliab anak si Helon |
| Peempatken | Ruben | Si Elizur anak si Syedeur |
| Pelimaken | Simeon | Si Selumiel anak si Zurisyadai |
| Peenemken | Gad | Si Elyasaf anak si Rehuel |
| Pepituken | Efraim | Si Elisama anak si Amihud |
| Peualuhken | Manasye | Si Gamaliel anak si Pedazur |
| Pesibahken | Benjamin | Si Abidan anak si Gideoni |
| Pesipuluhken | Dan | Si Ahiezer anak si Amisyadai |
| Pesipuluhsadaken | Asyer | Si Pagiel anak si Okhran |
| Pesipuluhduaken | Naftali | Si Ahira anak si Enan |
Dos ngo pèlèen kalak idi karina: Sada pinggan pirak berratna 1,5 kilo dekket sada bokkor pirak berratna 800 gram, mengèkut- ken timbangen simerlaku i Undung-undung Jahowa. Duana bekkas idi idomi mo dekket nditak mersakkor minak mahan pèlèen hantaren. Laènkenna i sada pinggan emmas berratna 110 gram sin dahupa; sada anak lembu tonggal, sada biri-biri tonggal dekket sada anak biri-biri merumur sitahun mahan pèlèen situtungen, bagidi ma sada kambing tonggal mahan pèlèen kesasaen dosa; dua lembu, lima biri-biri tonggal, lima kambing tonggal, dekket lima biri-biri merumur sitahun mahan pèlèen perdamèen.
84-88Karina pèlèen siniembah pengulu sisipuluh dua kalak mahan Kerja mensahken langgaten idi pulung karina:
– Sipuluh dua pinggan pirak dekket sipuluh dua bokkor pirak, berratna karina 27,6 kilo
– Sipuluh dua pinggan emmas berratna karina l,32 kilo, dom merisi dahupa
– Sipuluh dua lembu tonggal, sipuluh dua biri-biri tonggal, dekket sipuluh dua anak biri-biri merumur sada tahun, rebbak dekket pèlèen hantaren sikira penam- bahina mahan pèlèen situtungen
– Sipuluh dua kambing mahan pèlèen kesasaen dosa, duapuluh empat lembu tonggal, ennempuluh biri-biri tonggal, ennempuluh kambing dekket ennempuluh anak biri-biri merumur sitahun mahan pèlèen perdamèen.
89Gennep mbengket si Musa mi bagessen Undung-undung Jahowa lako mengerana dekket Jahowa, idengkoh ngo sora Jahowa mengeranai tabasa i babo tutup Pèti Perpadanen i nai i kellang-kellang gana-gana kerub sidua i.
Currently Selected:
4 Musa 7: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
