4 Musa 36
36
Perbagien harta bai berru sijahè
1Laus mo pengulu-pengulu horong kalak Gilead, dukak si Makhir, imo kempu si Manasye, dukak si Josep, mengadep si Musa dekket pengulu-pengulu sidèbanna i. 2#4 Ms. 27:7 Nina kalak i mo, “Jahowa ngo mendokken taba kènè memellaken tanoh i bai kalak Israel merkitè mersijemput sinisurat. Ia ma ngo mendokken kènè memerèken tanoh pusakka bai dengan sibeltek nami si Zelafehad bak bai berruna. 3Tapi perlu èngèten mula sijahè kalak i bai marga sidèban gabè bai marga sidèban idi mo tanoh i. Merkitè bagi makin moru mo tanoh sienggo itentuken gabè mahan lah nami. 4Tupung tahun olihenken, tikan karina harta milik sienggo idèa i olihenken bai sidasa perlebbè, tanoh berru si Zelafehad idi tong mo hot milik sinibalè kalak i, gabè mago mo tanoh marga nami.”
5Nai ipesakat si Musa mo perèntah bai Jahowa nai taba bangsa Israel, “Tuhu ngo kadè sinidokken pinempar si Josep idi, 6kumernaken i idokken Jahowa ndorok ngo sijahè berru si Zelafehad i barang bai isè ngkelleng atèna, asal mo dos bangsana dekketsa. 7Tanoh pusakka gennep kalak Israel gabè tong mo hot bai margana. 8Gennep daberru simenjalo perbagianen tanoh pusakka ibas sada marga bangsa Israel, kennah sijahè bai kalak ibas marga idi nai. Merkitè bagidi karina kalak Israel tong menjalo tanoh tading-tadingen empungna, 9nai oda mo mompat-ompat sidasa tanoh pusakka idi i sada marga nai mi marga sidèban. Karina marga bangsa Israel tong hot mersidasaken tanoh pusakkana gennep.”
10-11Nai rembang mi perèntah Jahowa taba si Musa, limana berru si Zelafehad idi, imo si Mahla, si Tirza, si Hogla, si Milka dekket si Noa, sijahè bai kalak ncelket dèng bai horong bapana. 12Sijahè mo kalak idi bai kalak horong marga Manasye, anak si Josep. Merkitè bagi tong mo hot tanoh pusakka kalak i milik marga bangsa bapa kalak i.
13Idi mo hatoren dekket ketentuen sini- berèken Jahowa bai bangsa Israel merkitè si Musa, tikan merian i Moab bangsa Israel i biding Laè Jordan, ndessing mi kuta Jeriko.
Currently Selected:
4 Musa 36: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
