4 Musa 35
35
Kuta lako bai kalak Lewi
1 #
Jos. 21:1-42
Nai mengerana mo Jahowa bai si Musa i kendet Moab, i biding Laè Jordan, i gembar kuta Jeriko, 2“Pesakat mo bai bangsa Israel magahken tanoh pusakka sinaing jaloen kalak i, kennah iberèken kalak i ngo bai kalak Lewi barang piga-piga kuta dekket jampalen sikulilingna asa ndorok kalak i merian i sidi. 3Gabè milik kalak Lewi mo kuta i mahan bekkas kalak i. Jampalen sikulilingna imo mahan bekkas pinakan kalak i. 4Ukum baleng jampalen idi 450 mèter mo hunjur dekket bekkangna, isibar i pagar kuta nai. 5Asa ukum ladang kalak Lewi empat soki ngo rumangna, sibarenna 900 mèter mo gennep bidingna, i tengah-tengah mo kutana. 6Kennah berrèken kènè bai kalak Lewi ennem kuta perculenggemmen sikira bekkas kalak mperrus bai kalak siso sengaja memunuh. Laènkenna i kennah berènken dèng ngo bai kalak Lewi empatpuluh dua nai kuta, 7rasken dekket jampalenna. Jadi pulung mo karina empatpuluh aluh kuta bai kalak Lewi. 8Buè kuta kalak Lewi i gennep ladang marga kalak Israel kennah itentuken mengèkutken buè kuta dekket belgahna aur idi.”
Kuta-kuta percilenggemmen
(5 Ms. 19:1-13; Jos. 20:1-9)
9 #
Jos. 20:1-9
Idokken Jahowa mo si Musa 10pesakatken rana ènda bai bangsa Israel, “Enggo kessa isuberrangi kènè Laè Jordan janah mbengket mi nagerri Kanaan, 11kennah tentuken kènè mo kuta percilenggemmen idi, asa mula lot kalak siso sengaja memunuh kalak sidèban, ndorok mperrus mi bekkas idi. 12I kuta i mo ia ndorok maluah bai, kadè-kadè kalak sinibunuh i nai sinaing muat bèla. Oda ndorok bunuhen kalak sinisangka memunuh jelma, ukum oda dèng iperèso perkarana i perhukumen jelma nterrem. 13Tentuken mo ennem kuta perlenggemmen, 14tellu kan kebincaren laè Jordan janah tellu nai, i tanoh Kanaan. 15Si ennem kuta idi mo gabè kuta perlenggemmen bai ndènè, kalak Israel, dekket bai kalak siroh barang pè sienggo menettap i tengah-tengah ndènè. Barang isè sambing sienggo memunuh kalak tapi oda inakkati, ndorok ngo ia mperrus barang mi apaina kuta idi.
16-18Tapi mula lot sada kalak memakè sinjata bessi barang batu barang kayu lako memunuh kalak sidèban, pemunuh ngo kalak sibagidi; salah ngo ia kernana i janah kennah ihukum matè. 19Kadè-kadè sincelketna bai siterbunuh i nai ndorok ngo mengelaluken hukumen matè i. Mula pejumpa ia dekket sipemunuh i, ndorok mo ia memunuhsa.
20Mula lot sada kalak mernggogo atè midak kalak sidèban, nai mènter ibunuh merkitè membatbatsa barang pè merkitè mengkebekkisa, 21barang pè menènjusa, pemunuh ngo kalak sibagidi; salah ngo ia janah kennah ihukum matè. Kadè-kadè sincelketna bai siterbunuh i nai ndorok ngo mengelaluken hukumen matè i. Mula jumpasa simemunuh i, ndorok ngo ia memunuh.
22Tapi nggèut ma ngo sada kalak oda inak- kati memunuh kalak siso niketcegokenna, tah pè merkitè membatbat kalak i barang pè merkitè mementirken barang kadè tabasa. 23Barang pè nggèut ngo masa bai sada kalak kumarna mak idah, idabuhken sada batu maing gabè matè kalak siso musuhna, janah oda lot sura-surana memakin jèkat bai kalak i. 24Tupung perkara sibagidi runggu bangsa i kennah menimbangi hukum meradepken kalak simemunuh, dekket kalak sinaing memalesken permatè siterbunuh i. 25-28Runggu bangsa i kennah menjaga kalak simemunuh siso sengaja i meradepken kade-kade si kenna bunuh i. Kennah iembah mo kalak i balik mi kuta perlenggemmen, bekkasna mperrus idi. Kennah merian i sidi mo ia lebbè soh mi enggo matè kalakna Imam Huntun sidangna i; enggo kessa pè i asa ndorok ia balik mi kutana. Tapi mula itadingken ngo kuta perlenggemmen bekkasna mperrus idi, nai jumpa janah ibunuh sincelket kalak siterbunuh i, carana muat bèla sibagidi oda ngo memunuh gerarna. 29Merdalan ngo hatoren i bai ndènè soh mi pinempar ndènè, barang idikè sambing kènè merian.
30 #
5 Ms. 17:6, 19:15 Ukum perkara memunuh jelma, kalakna sinituduh kibunuh, ndorok idokken mersalah janah ihukum matè kalakna mula ndorok ibuktiken pengelako i dekket dua kalak saksi barang pè lebbih. Ukum pellin sada kalak ngo kessa saksi oda bias idi lako membuktiken magahken tuhuna sangkaen idi. 31Kalak pemunuh jelma kennah ngo ihukum matè. Oda ndorok itebbus hukumen idi merkitè kèpèng. 32Mula lot sada kalak mperrus mi sada kuta perlenggemmen, ulang padiat ia memerèken kèpèng asa ndorok ia balik mi sapona kum mak dèng matè Imam Huntuen. 33Mula bagi ibakin kènè, pekemerken tanoh siniianen ndènè ngo kè i si. Pekemmerken nagerri ngo memunuh jelma; jadi oda lot dalan sidèban lako pepantingken nagerri idi laènken menggettap kessah simemunuh i. 34Ulang mekemmer baing kènè tanoh siniianen ndènè, kumerna Aku ngo Jahowa, janah merian i tengah-tengah bangsa Israel ngo Aku.”
Currently Selected:
4 Musa 35: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
