5 Musa 1
1
Solo-solo
1Bukku ènda merisiken kata-kata sinipesakat si Musa bai bangsa Israel sinderrang i gurun pasir i lembeng Jordan kalak i. Kan kebincaren Laè Jordan ngo lembeng i, ndessing mi kuta Suf, i kellang-kellang kuta Paran, dekket kuta-kuta Tofel, Laban, Hazerot bak Di-Zahab. 2(I delleng Sinai nai soh mi Kades Barnea mengelausi ladang delleng Edom, daohna sipuluh sada ari merdalan.) 3I ari sada bulan sebellas tahun peempatpuluhken enggo kessa itadingken kalak i Mesir, ipesakat si Musa mo bai bangsa i karina siniperèntahken Jahowa silako iranaken bai kalak i. 4#4 Ms. 21:21-35 Masa ngo i enggo kessa italuken si Musa si Sihon, raja kalak Amori, simemerèntah i kuta He- sybon, dekket si Og, raja Basan, simemerèntah i kuta Asytarot dekket Edrei. 5Asa kan kebincaren laè Jordan i ladang kalak Moab, i si mo perlebbè kalohon ipeterrang si Musa hukum dekket perèntah Jahowa.
6Nina si Musa mo, “Sinderrang merian i Delleng Sinai kita, nina Jahowa Dèbata ngo, ‘Enggo toko dekkahna kènè i delleng ènda. 7Bagèndari pè rontas kènè mo perundung-undungen ndènè janah berkat mo kènè mi ladang si kan delleng kalak Amori dekket mi karina aur sikulilingna, imo Napa Jordan, nagerri simeruruk-uruk dekket simernapa kendet, aur kan selatan dekket biding Laut Tengah. Berkat mo kènè mengiani tanoh Kanaan dekket uruk-uruk sini Libanon soh mi batang laè Efrat simbelgah i. 8Aku, Jahowa, enggo menjandiken karina tanoh i bai empug ndènè si Abraham, si Isak dekket si Jakob bak pinemparna. Asa laus mo kènè mengiani tanoh i.’ ”
Si Musa pebangkitken perhukum
(2 Ms. 18:13-27)
9Nina si Musa mo taba bangsa i, “Sinderrang merian i Delleng Sinai dèng kita, ningku ngo taba kènè: Mberratsu ngo kuakap tanggung jabab lako menguluken kènè. Oda terulaken pellin sadaku sambing mengu- laken i, kumerna 10enggo ibaing Jahowa Dèbata ndènè tambah buè bilangen ndènè bagè buè bintang i langit. 11Katerra pe itambahi Jahowa, Dèbata empung ndènè mo pukpuk bilangen ndè soh seribu kali lempit, janah memakin kènè gabè bangsa nduma bagè singgo nijandikenNa i. 12Tapi bakunè mo persautna mula pellin sadaku sambing lako memersan tanggung jabab bagi belgahna lako peliasken karina persoalen ndènè? 13Pilih kènè mo i gennep marga nai barang piga-piga kalak anak laki bijak, singgeddang radumen janah merpengantusi, asa kupebangkit kalak i lako menguluken kènè. 14Selloh ngo ijalo kènè pengidoen idi. 15Kumarna i ipas pengulu-pengulu sinipilih ndènè nai, kupebangkit mo barang piga-piga kalak simpantas niasè janah singgeddang radumen lako mengerajai kènè. Dèba nibaing menguluken seribu kalak, dèba menguluken seratus kalak, limapuluh kalak dekket mengu- luken sipuluh kalak. Kupebangkit ma mo pengulu-pengulu sidèbanna lako mengatur marga-marga ndènè.
16Tikala i kudokken ngo bai kalak i bagèen: Perdatèken mo persilisihen-persilisihen simasa i tengah-tengah bangsa ndènè. Bakin kènè mo hukum sènteng, tah pè i perkara dengan ndènè sada bangsa bang pè kalak sidèban simerian i tengah-tengah ndènè. 17Ulang mo berrat subellah keputusen ndènè; kennah dos ngo adilna hukum ndènè bai karina kalak sinihukum ndè, ulang lot kalihna barang isè pè kalakna. Ulang mbiar barang midah isè pè, kumerna bai Dèbata nai ngo rohna keputusen sinibahanken ndènè i. Mula lot sada perkara mahalsu iakap kènè, sohken kènè mo taba aku, asa aku menimbangi dekket memutusken. 18Tikala idi pè kupeddahken ma ngo bai ndènè tersèngèt sagumanna sidèbanna dèng sikennah ulaenken ndènè.”
Ipasulak mata-mata i Kades Barnea nai
(4 Ms. 13:1-33)
19“Nai rembang mi perèntah Jahowa Dèbatanta, sitadingken mo Delleng Sinai janah merdalan memellus gurun pasir mbellang janah ntengngam menuju uruk kalak Amori. Sinderrang sakat kita mi Kades Barnea, 20-21kudokken mo: Bagèndari enggo sakat kènè mi uruk ladang kalak Amori, tanoh siniberèken Jahowa Dèbatanta dekket Dèbata empungta. Tengngen kènè mo, enggo hantar i lebbè ndènè tanoh i. Berkat mo kè lako mengiani bagè sieggo iperèntahken Jahowa. Ulang kènè roga barang mbiar.
22Tapi roh ngo kènè mendahi aku janah mendokken, ‘Lotien mo sipasulak barang piga-piga kalak solo-solonta lako merkakap nagerri idi asa ndorok ibagahken kalak i banta arap dalan apai sikennah bellusenta janah bakunè rumang kuta sinaing dahinta idi.’
23Kuuèi ngo pengidoen i, kerna i kupilih mo sipuluh dua kalak, sada kalak i gennep marga nai. 24Ibengketti kalak idi mo ladang sini uruk i soh mi Kendet Eskol, ninganna mengagahisa. 25Nai balik mo kalak i mendahi kita merembah buah sidapet kalak i isidi nai janah ibagahken ukum nagerri sinaing berènken Jahowa Dèbatanta idi nggabur kaloen ngo.
26 #
5 Ms. 9:23; Heb. 3:16 Tapi itonja kènè ngo perèntah Jahowa Dèbata ndènè janah oda uè kènè memengketti nagerri idi. 27Dak ngut-nguten ngo kènè bagèen, ‘Nggogo ngo atè Jahowa banta. Nai ibabai mo kita mbungkas i Mesir nai lako menohken kita mi tangan kalak Amori asa ibunuh kalak idi kita. 28Nai merkadè mo kita mi si? Kalak sienggo sipasulak mi sidi memaing kita buradan merkitè ibagahken kalak idi mergegohen janah mbengisen ngo bangsa sinisidi daripada kita, janah merian ngo kalak i ibas kuta simerpagar songket mi langit. Idah kalak i ngo jelma ntuara i sidi.’
29Tapi ningku mo: Ulang kènè mbiar midah kalak i. 30Jahowa Dèbata ndènè ngo menguluken kènè janah juhap lako bai ndènè bagè sienggo isaksiken kènè i Mesir, 31#Ul. 13:18 bak i gurun pasir. Idah kènè ngo barang bakunè carana Jahowa Dèbata ndènè mengarak kènè ibagasen kinijuah sidekkah i perdalanen idi soh mi bekkas ènda, oda lot kalihna bagè sada kalak pertua menempi dukakna. 32#Heb. 3:19 Tapi tukasi pè kudokken bagi, tong ngo kènè oda tok taba Jahowa Dèbata ndènè, 33si merdalan i lebbè ndènè lako menulusi bekkas ndènè merundung-undung. Ia petuduhken dalan bai ndènè tikan berngin merkitè tihang api, janah tikan mahar merkitè tihang hembun.”
Jahowa menghukum Israel
(4 Ms. 14:20-45)
34 #
Heb. 3:18
“Idengkoh Jahowa mo ungut-ungut ndènè i, nai gabè melaga mo Ia. Isempetaken mo, 35‘Sada kalak poda ibas cundut jahat ènda nai memengketti nagerri nggabur siKujandiken bai empung ndènè i. 36Pellin si Kaleb, dukak si Jefune ngo kessa mbengket mi si, kumerna hot ngo ia setia taba Aku. Kuberrèken mo bai si Kaleb dekket bai pinemparna nagerri sienggo niagahenna i.’ 37Kènè ma ngo pandè ulah memaing melaga Jahowa taba aku, janah idokken, ‘O Musa, kono pè oda ndorok memengketti nagerri idi. 38Tapi pesobar mo ukur pengurupimu si Josua dukak si Nun. Ia ngo menguluken Israel menaban tanoh idi.’
39Nai nina Jahowa mo taba kita karina, ‘Dukak-dukak ndènè sikètèk kalohon dèng lako membijaken simerandal bak nggodo, imo anak-anak sinidokken ndènè sinaing itaban musuh-musuh ndènè, bai kalak i mo naing Kuberèken tanoh i, janah kalak i mo mengianisa. 40Tapi ukum kènè, balik mo kènè mi gurun pasir arap dalan menuju Suak laut Akaba.’
41Nai ialoi kènè mo, ‘Alè Musa, enggo merdosa kami taba Jahowa. Tapi bagèndari nggèut ngo kami berkat mergeraha bagè siniperèntahken Jahowa, Dèbatanta.’ Nai gennep mo i tengah-tengah ndènè nai kebbas lako geraha, ai dok atèna murah ngo ukum menjuhap ladang sini uruk-uruk i.
42Tapi nina Jahowa mo taba aku, ‘Ulang belli kalak i mergeraha, kumerna oda ngo Kudengani kalak i, asa ulang italuken musuhna idi kalak i.’ 43Kubagahken mo taba kènè kadè sinidokken Jahowa, tapi oda isarihken kènè. Ialo kènè ngo perèntah Jahowa, janah ibagasen jukkat ngo kènè laus mi ladang siniuruk i. 44Nai toram mo kalak Amori simengiani bekkas kan uruk i mengalo kènè. Nterrem kalohon ngo bilangen kalak i, bagè peremmut renggicing. Ijalang kalak i mo kènè sakat mi Horma, nai italuken mo kènè i ladang uruk Edom. 45Nai balik mo kènè janah tenggo-tenggo taba Jahowa lako mengido pengurupien, tapi oda nggèut Ia mendengkohken bang mendatèken kènè.”
Tahun-tahun i gurun pasir
46“Nai enggo kessa i merian i Kades mo kita ndekkah kalohon.
Currently Selected:
5 Musa 1: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
