4 Musa 22
22
Idiloi Raja Moab si Bileam
1Berkat nola mo bangsa Israel janah mermalam i kendet Moab, i kèpar laè Jordan, i gembar kuta Jeriko.
2-3Idengkoh raja Moab mergerar si Balak, dukak si Zipor kessa mo bakunè ibaing bangsa Israel taba kalak Amori, janah nterrem ngo bilangen kalak Israel idi, buradan mo ia bak karina ginemgemna. 4Nai nina kalak Moab mo taba pengulu-pengulu kalak Midian, “Oda ndekkah nèngè isalpuni gerombolen i mo nasa silot i sikulilingta tosè bagè lembu menggagat alah-alah i jampalen.” 5#2 Ptr. 2:15-16; Jud. 11 Nai ipasulak raja Balak mo lako mendiloi si Bileam, dukak si Beor, simerian i kuta Petor i gembar Laè Efrat i ladang Amau. Idokken mo kalak i pesakatken tennah bai si Balak nai bagèen, “Bettoh mo, lot ngo roh sada bangsa i Mesir nai; mèrap ngo kalak i tah soh pak dikè dèba janah kebbas lako menjuhap ladang nami. 6Mahantuen ngo kalak i asa kami. Asa roh mo kè! Sumpahi mo kalak i kemulihken aku. Ukum dok atènami ndorok ngo kutaluken kami kalak i. Ai tok ngo ukurku, terolih pasu-pasu ngo barang isè ipasu-pasu ko, janah kenna sempetta kalak sinisumpahenmu.”
7Nai berkat mo pengulu-pengulu kalak Moab dekket kalak Midian i ninganna me- rembah upah bai si Bileam asa uè ia menumpahi kalak Israel. Enggo kessa soh taba si Bileam, ipesakat kalak i mo tabasa tennah Raja Balak. 8Nai nina si Bileam mo taba kalak i, “Merberngin mo kè i sèn. Baremben kubagahken pè bai ndènè barang kadè idokken Jahowa baku.” Nai merberngin mo pengulu kalak Moab i i bekkas si Bileam.
9Nai roh mo Dèbata mendahi si Bileam janah mengkuso, “Isè ngo kalak i simerberngin rebbak ko alè Bileam?”
10Ialoi si Bileam mo, “Pasulakken Raja Balak ngo kalak i i Moab nai lako memagahken 11lot sada bangsa roh i Mesir nai sienggo mèrap tah soh mikè dèba. Idokken Raja Balak ngo asa kusumpahi bangsa i, dok atèna asa ndorok ialo janah iperletti kalak i.”
12Nai nina Dèbata mo taba si Bileam, “Ulang ko laus rebbak dekket kalak i, janah ulang sumpahi bangsa i, kumerna enggo Kupasu-pasu kalak i.”
13Sibarembenkenna nina si Bileam mo taba pasulakken si Balak i, “Balik mo kè, oda iduè Jahowa aku berkat rebbak dekket kènè.” 14Nai laus mo kalak i balik taba raja Balak janah ibagahken tabasa ukum si Bileam oda nggèut roh rebbakken dekket kalak idi.
15Nai ipasulak si Balak nola mo makin mèdukna janah datessen pangkatna daripada siperlebbè idi nai. 16Ipesakat kalak i mo bai si Bileam tennah bagèen bai Raja Balak nai, “Memmes Kupidoken: Roh mo ko, janah ulang mo tulak. 17Kuberèken pè upahmu mbuè kalohon, janah Kuulaken ngo barang kadè sambing idokken kono. Roh mo kono, janah sumpahi mo bangsa i kemulihken Aku.”
18Tapi ialoi si Bileam mo, “Agia nola pè karina pirak dekket emmas silot i bages Raja Balak igararken bangku, oda terlausken aku perèntah Jahowa, Dèbata si kusembah. Agia kitik pè persoalen i oda uè aku mengalosa. 19Tapi selloh mo kènè i sèn lebbèken merberngin, bagè sinibakin pasulakken perlebbè i. Naing kubettoh ngo tah lot dèng sinaing dokenken Jahowa taba aku.”
20Bernginkenna i roh mo Dèbata mendahi si Bileam janah mendokken, “Roh ngo kalak i lako mengidoken asa berkat kono rebbak dekket kalak i. Jadi merkebbas-kebbas mo ko lako berkat. Tapi ulaken mo pellin siniperèntahken taba kono.” 21Sibarembenkenna ipelanoi si Bileam mo kalodèna, nai engket mo ia rebbak pengulu-pengulu kalak Moab i.
Si Bileam dekket kalodèna
22Tapi tikanna i perdalanen si Bileam, gabè melaga mo Dèbata. Sinderrang ipasang si Bileam kalodèna, idengani dua kalak naposona, cènder mo malaèkat Jahowa i tengah ndalan lako mengambat-ngambatsa. 23Me- ngidah malaèkat jengjeng i si merpeddang sintak, menirpang mo kalodè i i dalan i nai, janah memèngkol mi juma. Ilipat si Bileam mo kalodè i janah i iring balik mi dalan. 24Nai jengjeng nola mo malaèkat Jahowa kettan dalan sempit i kellang-kellang dua pekken anggur simerpagar batu kacimbang belah. 25Idah kalodè i kessa mo malaèkat Jahowa, menisi mo ia, nai mènter terkapit mo nèhè si Bileam mi pagar batu i. Nai ilipat si Bileam nola ma mo kalodè i. 26Nai lompat nola mo malaèkat Jahowa i, janah jengjeng i bekkas makin sempitna gabè oda nè lot dalan lako memellus tarap kambirang barang tarap kamuhun. 27Mengidah malaèkat Jahowa i, ipegempang kalodè i mo bana. Gabè melaga mo si Bileam janah ipalu mo kalodè i dekket tongketna. 28Nai ibakin Jahowa mo ndorok mengerana kalodè i. Nina pinakan i mo mbang si Bileam, “Kadè ngo pana lot kubakin bai Tuan i asa sanga ilipat Tuan i aku soh tellu kali?”
29Ialoi si Bileam mo, “Ipergait-gaitken ko nola ngo aku! Ukum lot kin peddangku, kennah kubunuh ko!”
30Ialoi kalodè i mo, “Otang kalodè tuan i ngo aku janah enggo bagi dekkahna dak ipasang Tuan i? Pennah ma ngo aku mengalo taba Tuan i?”
“Oda,” nina si Bileam.
31Nai ibaing Jahowa mo si Bileam ndorok mengidah malaèkat Jahowa jengjeng i sidi merpeddang sintak. Mènter sujud mo si Bileam mi tanoh lako mersembah. 32Nai mengkuso mo malaèkat Jahowa i, “Kasa ilipat kono kalodèmu i sanga tellu kali? Roh ngo Aku lako mengambati kono, kumerna mengèkutken pikirenKu, oda selloh kono laus. 33Sinderrang idah kalodèmi Aku, menisi ngo ia sanga tellu kali, ukum oda kin enggo mo Kubunuh ko, tapi Kukelini ngo ukum kalodè i.”
34Ialoi si Bileam mo, “Enggo merdosa aku. Oda kubettohna ngo jengjeng keppè Tuan i i tengah ndalan lako mengambat aku. Asa bagèndari pè, mula oda ngo selloh katè tuan i kuterrusken perdalanen ènda, balik pè aku.”
35Tapi nina malaèkat Jahowa i mo, “Ekutken mo kalak i. Tapi barang kadè siKudokken pellin i ngo kessa ndorok dokenkenmu.” Nai iterrusken si Bileam mo perdalanenna rebbak dekket utusen raja Balak i.
Si Balak menimbaki si Bileam
36Idengkoh si Balak kessa mo naing roh mo si Bileam, berkat mo ia menimbaki si Bileam mi kuta Moab, sinibiding Laè Arnon, iperbalengen ladang Moab. 37Nina si Balak mo tabasa, “Kasa oda roh kono tikan kudiloi perlebbè bari? Tah idokdok kono ngo oda tellap aku menggarar upahmu?”
38Ialoi si Bileam mo, “Uè, bagèndari enggo roh aku. Tapi oda lot hakku mendokken barang kadè pè laènken sinidokken Dèbata sinaing ruapenkenku.” 39Nai laus mo si Bileam rebbak dekket si Balak mi kuta Huzot. 40I si mo si Balak memèlèken barang piga-piga lembu dekket biri-biri. Dèba ipas gulè i nai iberèken mo bai si Bileam dekket pengulu-pengulu si rebbak dekketsa.
Si Bileam mengeruapken sukutenna perlebbè
41Sibarembenkenna iarahken si Balak mo si Bileam mengenangkengi uruk Bamot Baal. I sidi nai ndorok mo idah si Bileam dèba ibas bangsa Israel i nai.
Currently Selected:
4 Musa 22: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
