4 Musa 21
21
Kemenangen meraloken kalak Kanaan
1 #
4 Ms. 33:40
Arad imo sada kuta kettan selatan nagerri Kanaan. Sinderrang idengkoh raja kuta idi kalak Israel roh memellus arap dalan Atarim, berkat mo ia menjuhap kalak i janah itaban mo barang piga-piga kalak bai kalak i nai. 2Nai ibulabanken kalak Israel mo taba Jahowa bagèen, “Mula iberèken Kono ngo kemenangen mbellen bai nami meraloken bangsa i, kupetumpat kami mo kalak i dekket karina kutana.” 3Iuèi Jahowa mo pengidoen kalak Israel i janah mengurupi kalak i menaluken kalak Kanaan. Nai iripasken kalak Israel mo kalak Kanaan i dekket karina kuta kalak i, nai igerari kalak i mo bekkas idi Horma.
Nipè tembaga
4 #
5 Ms. 2:1
Nai itadingken kalak Israel mo Delleng Hor, merdalan menuju mi Suak Laut Akaba, lako mengkulilingi ladang Edom. Tapi i tengah ndalan mak nèngè sobar bangsa idi, 5#1 Kor. 10:9 janah ngut-nguten taba Dèbata dekket taba si Musa. Nina kalak i mo, “Kasa iarahken kono kami mbungkas i Mesir nai? Mada ngo lako memunuh kami i padang gurun èn? Pangaen poda lot i sèn, bagi laè pè oda lot. Enggo moyang atè nami kipangan pangaen ndèngap ènda.” 6Nai roh mo ibaing Jahowa mbuè nipè merbisa mi tengah-tengah bangsa i. Nterrem ngo bangsa Israel matè itebbi nipè i. 7Nai roh mo bangsa idi menghadep si Musa janah mendokken, “Enggo merdosa kami kumerna ngut-nguten taba Jahowa bak taba ko. Mersodip mo ko taba Jahowa asa ipedaoh nipè-nipè ènda bai nami nai.” Nai isodipken si Musa mo bangsa idi. 8Nai idokken Jahowa mo iteppa si Musa sada nipè ibas tambaga nai janah iampèken i babo sada tihang. Barang isè sinitebbi nipè, njuah mo iakap mula itengen nipè siniteppa ibas tembaga idi nai. 9#2 Raj. 18:4; Joh. 3:14 Nai iteppa si Musa mo nipè ipas tembaga nai janah iampèken i babo sada tihang. Barang isè kalak sinitebbi nipè, ndorok malum mula i tengen mi nipè tembaga idi.
I Delleng Hor nai mi napa Moab
10Berkat nola mo kalak Israel, nai merundung-undung i kuta Obot. 11Enggo kessa itadingken bekkas i, merundung-undung mo kalak i i bekkas kuta Abarim sienggo merumpak i gurun pasir kettan kebincaren ladang Moab. 12Nai mermalam mo kalak i i Napa Zered. 13I sidi nai berkat nola mo kalak i janah mermalam i kèparen laè Arnon, i gurun pasir arur sakat mi ladang kalak Amori. Laè Arnon imo kira baleng ladang kalak Moab dekket ladang kalak Amori. 14Kumerna i mo ibas ‘Bukku Pergerahaen Jahowa’ tersurat: “.... Kuta Waheb, i ladang Sufa dekket napa-napana; Laè Arnon 15dekket tebing-tebing napa arur soh mi kuta Ar dekket kènter mi perbalengen ladang kalak Moab.”
16I sidi nai laus mo kalak idi mi bekkas sinigeraren Beer, lapatenna telaga-telaga. I sidi ngo nung idokken Jahowa taba si Musa, “Dokken mo bangsa i merpulung; naing Kuberèken ngo laè bai kalak i.” 17Sidangna i mo iendèken bangsa Israel nangen èn,
“Alè, telaga-telaga, arirken mo laèmu,
kuhalopken kami mo merdengan endè.
18Telaga sinikurak kalak pungkuh-pungkuhna,
dekket kalak pengulu bangsa
ikurak merkitè tongket kepengulunkenna
dekket merkitè tongket tanda kuasana.”
I gurun pasir nai lompat nola mo kalak i mi Matana, 19janah i sidi nai mi Nahaliel, nai mi Bamot, 20nai nola mi napa i ladang kalak Moab, i terruh pucuk Delleng Pisga mendempakken gurun pasir.
Kemenangen meradepken Raja Sihon dekket Raja Og
(5 Ms. 2:26–3:11)
21Nai ipasulak kalak Israel mo pasulakkenna mendahi si Sihon, raja Amori, lako pesakatken tennah ènda, 22“Duè mo kami memellus arap nagerri raja i. Oda pè kami sumirpang bak pinakan nami arap dalan i nai, janah oda mbengket mi juma barang mi pekken anggur ndènè barang mènum laè ibas telaga-telaga nai. Oda pè kami sumirpang i dalan mbelgah idi nai mema kulausi kami karina ladang raja idi.” 23Tapi oda iduè Raja Sihon kalak Israel memellus arap nagerrina. Ipepulung mo soridaduna, nai berkat mi Jahas i gurun pasir janah ijuhap mo kalak Israel i sidi. 24Tapi tikan geraha idi, nterrem ngo soridadu kalak Amori ibunuh kalak Israel. Nai itaban kalak Israel mo ladang kalak idi i Laè Arnon nai sakat mi Laè Jabok, imo perbalengen tanoh ladang kalak Amon, kumerna ntegguh kalohon ngo bentèng perbalengen idi. 25Merkitè bagi mo itaban kalak Israel karina kuta kalak Amori, bagi dekket Hesybon dekket karina kuta-kuta kèdèk i sikulilingna, nai i sidi mo kalak i merian. 26Hesybon imo kuta bekkas Raja Sihon. Pennah ngo ia mergeraha mengalo Raja Moab janah menaban nagerrina daohna soh mi Laè Arnon. 27Kumerna i mo sipandè mernangen memaingken nangenna bagèen,
“Merrohen mo kè mi Hesybon,
mi kuta Raja Sihon.
Ntedoh ngo kami mengidah kuta èn
ipajek janah isasai mengolihi.
28 #
Jer. 48:45-46
Masa ngo sikali i kuta èn nai
soridadu si Sihon menesser bagè api.
Mengelekkup kuta Ar i Moab,
janah menaban uruk-uruk arur Laè Arnon.
29Alè bangsa Moab, merjaya mo ko!
Simenembah Kamos, ripas mo ko!
Ibelli dèbatamu ngo kono gabè sinipuaren,
karina daberru gabè tabanen raja Amori.
30Tapi bagèndari ripas mo pinempar kalak i,
mengèkutken dalan i Hesybon nai mi Dibon,
i Nasyim nai mi Nofah i gembar Medeba.”
31Merkitè bagi merian mo bangsa Israel i ladang kalak Amori. 32Nai nola ipasulak si Musa mo kalak laus menulusi dalan simendèna kalohon lako mengkubu kuta Jaezer. Nai itaban kalak Israel mo kuta idi bak kuta-kuta kèdèk i sikulilingna janah ipelaus mo kalak Amori sitading i sidi.
33Enggo kessa i, sumirpang mo kalak Israel janah merdalan menuju Basan. Kèkè mo Raja Og i Basan nai rebbak dekket soridaduna lako menjuhap kalak Israel i kuta Edrei. 34Idokken Jahowa mo taba si Musa, “Ulang mbiar tabasa. Kuberèken pè kemenangen bamu. Talunkenmu mo ia, karina ginemgemna bak nagerrina. Bakin mo tabasa bagè pemakinmu taba Raja Sihon simemerèntah i Hesybon.” 35Nai italuken janah ibunuh kalak Israel mo Raja Og, dukak-dukakna dekket karina ginemgemna; oda lot nè tading. Nai itaban janah i iani kalak i mo nagerri i.
Currently Selected:
4 Musa 21: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
