4 Musa 23
23
1Nai nina si Bileam mo taba si Balak, “Pajek mo isèn pitu langgaten baku, janah pepada mo i sèn pitu lembu tonggal dekket pitu biri-biri tonggal.”
2Ibahanken si Balak mo bagè sinidokken si Bileam i tabasa. I babo gennep langgaten ipèlèken kalak i mo sada lembu tonggal dekket sada biri-biri tonggal. 3Nai idokken si Bileam nola mo taba si Balak, “Cender mo tuan i i gembar pèlèen situtungen i. Ninganna i laus aku lebbè sigetjap menengen tah nggèut ma Jahowa pejumpa dekket aku barang tah oda. Kubagahken pè nahan barang kadè idokken Jahowa taba aku.” Nai laus mo pellin si Bileam mi babo sada uruk-uruk, 4janah roh mo Dèbata i si mendahisa. Nina si Bileam mo mbang Dèbata, “Enggo kupajek pitu langgaten janah memèlèken sada lembu tonggal dekket sada biri-biri tonggal i babo gennep langgaten.”
5Nai ibagahken Jahowa mo bai si Bileam kadè sipatut dokenkenna, janah ipasulak mo ia balik mendahi si Balak lako pesakatken tennah Jahowa tabasa. 6Balik mo si Bileam janah idapet dèng ngo si Balak tong cènder i gembar pèlèen situtungenna, rebbak dekket karina pengulu kalak Moab.
7Nai iruapken si Bileam mo alamat èn,
“I Aram nai, delleng kan kebincaren adona,
si Balak, Raja Moab mendiloi aku, nina ngo,
‘Roh mo ko, mengerana mo ko lako baku.
Sumpahi mo bangsa Israel i!’
8Bakunè mo aku menumpahi,
Mula Dèbata oda menumpahi?
Bakunè mo aku menghukum,
mula Jahowa oda menghukum?
9Kuidah ngo kalak i i pucuk delleng nai,
kutatap ngo kalak idi i uruk-uruk nai.
Tengen mo, sada bangsa terpunjung
oda mbengket mi bilangen bangsa sidèban.
10Pinempar si Jakob bagè arbuk oda terbilang;
bangsa Israel oda langlang buèna.
Katerra pè matè mo nemmu aku bagè kalak jujur,
bage ajal kalak i mo nemmuken ajalku.”
11Nai nina si Balak mo taba si Bileam, “Kasa bagi pemaingmu baku? Asa kuembah pè ko mi sèn lako menumpahi musuh-musuhku ngo. Tapi kepèken ipasu-pasu ko nola ngo kalak i.”
12Ialoi si Bileam mo, “Kadè sinidokken Jahowa pellin i ngo kessa ndorok kura- naken.”
Sukuten peduaken
13Nai nina si Balak mo taba si Bileam, “Kita mo berkat rebbakken mi bekkas sidèban, i sidi nai mo ndorok idah kono pellin dèba ibas bangsa Israel nai. Sumpahi mo kalak i i sidi nai.” 14Nai iarahken si Balak mo si Bileam mi jampalen Zofim, i pucuk delleng Pisga. I sidi pè ipajek ma mo pitu langgaten janah memèlèken sada lembu tonggal dekket sada biri-biri tonggal i babo gennep langgaten idi.
15Nina si Bileam mo taba si Balak, “Tading mo ko lebbè i sèn, i gembar pèlèen situtungen tuan i, sinderrang laus aku menjumpai Jahowa i sandi.”
16Idapetken Jahowa mo si Bileam janah memagahken tabasa kadè sikennah dokenkenna, nai ipasulak mo ia balik mendahi si Balak lako pesakatken tennah Jahowa i. 17Nai balik mo si Bileam janah idapet ngo si Balak tong dèng cènder i gembar pèlèen situtungenna, rebbak dekket pengulu-pengulu Moab. Ikusoken si Balak mo kadè sienggo idokken Jahowa, 18nai iruapken si Bileam mo sukuten ènda,
“Alè, Balak, dukak si Zipor, roh mo ko mi sèn,
dengkohken mo kadè sinaing kudokken.
19Oda ngo bagè jelma ukum Dèbata
murah peselsel janah lemmo atèna merluap.
Mula merjandi Dèbata
kennah iteppati!
Mula mengerana Ia
tentu kennah pesautenna!
20Idokken ngo Aku memasu-masu;
janah mula Dèbata memasu-masu
mak ndorok Kusondati.
21Oda lot taridah kejahaten bai si Jakob;
oda lot taridah kesuliten bai Israel.
Jahowa, Dèbata kalak i ngo, mendenganisa.
Meroang ngo kalak i; Ia ngo Raja!
22Dèbata ngo mengarak kalak i mbungkas i Mesir nai,
bagè kerbo meriar ngo Ia mergeraha mengkepkepsa.
23Oda lot tellap tabas-tabas bai si Jakob
oda lot mergoldè tendung bai kalak Israel.
Tersèngèt bangsa i dokenken ndèba ngo,
‘Tengngen mo kelengangen sinibaing Dèbata!’
24Kèkè ngo bangsa i bagè singa inang-inang,
janah cènder bagè singa tonggal.
Oda gempang Ia kum mak dèng ikeriken sinijerngemna,
janah icepcep daroh binatang sinijerngemna.”
25Nai idokken si Balak mo taba si Bileam, “Enggo mi, mula oda nggèut kono menumpahi bangsa Israel; tapi ulang mo giam pasu-pasu kalak i!”
26Ialoi si Bileam mo, “Otang enggo kudokken bai Tuan i magahken karina siniperèntahken Jahowa ngo siku-ulaken?”
Sukuten peteluken
27Nai nina si Balak nola mo, “Kita mo mi bekkas sidèban. Isè bettoh-betohen tah ipadiat Dèbata ngo ko menumpahi Israel baku i bekkas idi.” 28Nai ibabai mo si Bileam mi pucuk Delleng Peor simendempakken gurun pasir. 29Nina si Bileam mo taba si Balak, “Pajek mo pitu langgaten i bekkas èn janah pepada mo i sèn pitu lembu tonggal dekket pitu biri-biri tonggal.” 30Ibahanken si Balak mo bagè sinidokken si Bileam. Ipèlèken mo sada lembu tonggal dekket sada biri-biri tonggal i babo gennep langgaten i.
Currently Selected:
4 Musa 23: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
