3 Musa 9
9
Si Aron memèlèken pèlèen
1Sidari enggo kessa pul kerja pebangkitken i, i ari peualuhken, idilo si Musa mo si Aron dekket dukak-dukakna bak pengulu-pengulu bangsa Israel. 2Nina si Musa mo taba si Aron, “Buat mo sada lembu tonggal bajar dèng dekket sada biri-biri tonggal, duana oda mertikas. Pèlèken mo duana pinakan i bai Jahowa, lembu tonggal mahan pèlèen pengampunen dosa janah biri-biri tonggal mahan pèlèen situtungen. 3Nai dokken mo bangsa Israel memèlèken sada kambing tonggal mahan pèlèen pengampunen dosa dekket sada anak lembu bak sada anak biri-biri merumur sitahun janah oda lot tikasna mahan pèlèen situtungen. 4Dokken ma mo kalak i memèlèken sada lembu tonggal dekket sada kambing tonggal mahan pèlèen perdamèen. Karinana idi kennah ipèlèken kalak i bai Jahowa rasken dekket pèlèen hantaren siniminaken, kumerna ibas ari sidari èn mo Jahowa roh mendahi kalak i.”
5Karina sinitenahken si Musa iembah kalak i mo mi lebbè Undung-undung, janah karina bangsa i merpulung i sidi lako mersembah taba Jahowa. 6Nai nina si Musa mo, “Idokken Jahowa ngo kènè lako mengulaken èn asa ndorok idah kènè cuhaya pekiroh Jahowa.” 7#Heb. 7:27 Enggo kessa bagi idokken mo taba si Aron, “Laus mo ko mi langgaten janah hantari mo pèlèen pengampunen dosa dekket pèlèen situtungen asa iampuni Jahowa dosamu dekket dosa bangsa i. Bahanken mo idi bagè sinidokken Jahowa.”
8Nai laus mo si Aron mi langgaten janah isèat mo lembu tonggal sinaing pèlènken mahan pengampunen dosana sendiri. 9Idoroken dukak-dukak si Aron mo daroh pinakan i bai si Aron, janah isernepken mo jari-jarina mi daroh i, janah idalisken mi tanduk-tanduk i empat sokina langgaten i. Enggo kessa bagi daroh sitadingna iorèken mo mi henjellen langgaten i. 10Pessoh, piah dekket simerandalna kalohon ibas pinakan idi nai itutung mo i babo langgaten, bagè siniperèntahken Jahowa bai si Musa. 11Tapi ukum jukut dekket bebak pinakan i itutung ngo i ruar perundung-undungen idi.
12Nai isèat si Aron mo pinakan mahan pèlèen situtungenna sendiri. Iberèken dukak-dukak si Aron mo daroh pinakan idi tabasa, nai ipispisken mo mi siempat lumpakna langgaten i. 13Enggo kessa bagi iberèken kalak idi mo tabasa takal dekket sendihi sidèbanna ibas pinakan idi nai, janah itutung mo i babo langgaten idi. 14Nai iborih mo bituka dekket kaè pinakan i janah itutung rebbak dekket pèlèen situtungen i babo langgaten.
15Enggo kessa bagi ipèlèken nola mo kambing mahan pèlèen pengampunen dosa bangsa i. Isèat mo kambing i janah ipèlèken tosè bagè pemèlèkenna pèlèen pengampunen dosana sendiri. 16Nai ibuat nola mo pinakan mahan pèlèen situtungen, janah ipèlèken rembang mi hatoren. 17Enggo kessa i ipèlèken mo pèlèen hantaren; ibuat mo nditak singkupul janah itutung i babo langgaten. Ukum idi tambah pèlèen situtungen si gennep ari ngo idi. 18#3 Ms. 3:1-11 Nai isèat ma mo sada lembu tonggal dekket sada biri-biri tonggal mahan pèlèen perdamèen bangsa i. Iberèken dukak-dukak si Aron mo daroh pinakan idi bana, nai ipispisken mo mi empat lumpakna langgaten idi. 19Jukut simerpessoh ibas lembu dekket kambing idi nai iampèken kalak i mo mi babo tenten pinakan sidua i, 20nai itutung si Aron mo i babo langgaten i. 21Dada dekket kaè kamuhun pinakan idi ipèlèken mo sikira pèlèen hujuen bai Jahowa. Sulang imam ngo i, bagè siniperèntahken si Musa.
22 #
4 Ms. 6:22-26
Enggo kessa ipèlèken karinana pèlèen idi, ipekèrbang si Aron mo tanganna mi babo bangsa Israel memasu-masu kalak i, nai susur mo ia. 23Nai mbengket mo si Musa dekket si Aron mi bagessen Undung-undung Jahowa. Enggo kessa bagi karuar mo kalak i janah ipasu-pasu mo bangsa i. Nai karina mo bangsa Israel mengidah cuhaya pekiroh Jahowa. 24Nai sintempu ipèsusur Jahowa mo api menutung kerri pèlèen situtungen dekket karina jukut si merpessoh i babo langgaten. Idah bangsa Israel kessa mo idi, meroang-oang mo kalak i ninganna sujud mersembah.
Currently Selected:
3 Musa 9: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
