3 Musa 10
10
Dosa si Nadab dekket si Abihu
1Tikan sidari ibuat si Nadab dekket si Abihu, dukak-dukak si Aron mo, bekkas apina gennep janah isini dekket rara. Nai ibaing kalak i mo dahupa mi api i janah ipèlèken bai Jahowa. Tapi oda ngo halal api i kumerna oda ngo isuruh Jahowa kalak i memèlèken idi. 2Nai roh mo ibakin Jahowa api lako menutung kalak i soh matè i Undung-undung Jahowa. 3Nai idokken si Musa mo mbang si Aron, “Idi ngo sinihendakken Jahowa tikan idokken, ‘Karina simengkebasi Aku kennah menghormati kebadiaenKu. Kupetarar ngo kehejienKu bai karina bangsangKu.’ ” Tapi nono sambing ngo si Aron.
4Enggo kessa i idilo si Musa mo si Misael dekket si Elsafan, dukak-dukak si Uziel, puhun si Aron. Nina mo taba kalak i, “Roh mo kènè mi sen, buat kènè mo bangkè impal ndènè i Undung-undung Jahowa nai janah pebujur kènè i ruar perundung-undungen.” 5Roh mo kalak i janah merembah bangkè-bangkè simerpakèen idi dèng mi ruar perundung-undungen, bagè siniperèntahken si Musa.
6Nai idokken si Musa mo taba si Aron dekket bai dukak-dukakna sidèban, imo si Eleazar dekket si Itamar, “Ulang belli bukmu merbulut, janah ulang ribaki pakèenmu magahken bonek bak mersindanggel kènè. Mula bagidi ibakin kènè, matè mo kènè, janah ilagai Jahowa ngo karina bangsa Israel. Tapi ukum kalak Israel sidèbanna i ndorok ngo merhendem kumerna sidua kalak sienggo matè kumerna api siroh bai Jahowa i nai. 7Ulang tadingken kè Undung-undung Jahowa asa ulang matè kènè, kumerna enggo ipebangkit kènè merkitè minak kerja lako mengkebasi Jahowa.” Ibaingken kalak i mo bagè sinidokken si Musa i.
Hatoren lako bai Imam-imam
8Idokken Jahowa mo taba si Aron, 9“Enggo kessa pul mènum laè anggur barang ènumen mperngis kono dekket dukak-dukakmu oda ndorok mbengket mi bagasen Undung-undungKu. Mula ilausi kènè hatoren idi matè mo kènè. Kennah iuèi karina pinemparmu ngo perèntah idi. 10Kennah ndorok ibedaken kene kadè sinihujuken bai Dèbata dekket siso sinihujuken, simelamun dekket siso melamun. 11Karina patiin siKuberèken bai ndènè merkitè si Musa kennah ndorok iajarken kènè bai bangsa Israel.”
12 #
3 Ms. 6:14-18
Idokken si Musa mo taba si Aron dekket bai anakna sidua kalak i, si Eleazar dekket si Itamar, “Buat mo pagè silebbihna ibas pangaen sinipèlèken bai Jahowa. Bahan mo roti siso meragi ibas nditak berras idi nai, nai pangan mo idi i gembar langgaten i, kerna mbadia kalohoen ngo pèlèen idi. 13Kennah ipangan ngo roti idi i bekkas simbadia, kumerna ibas pangaen sinipèlèken bai Jahowa i nai, mahan sulang ndènè dekket dukak-dukak dènè ngo i. Bagi ngo perèntah Jahowa taba aku. 14#3 Ms. 7:30-34 Tapi kènè dekket dukak-dukak ndènè daholi bak daberru ndorok ngo kipangan dada pèlèen hujuen dekket kaè pèlèen simerkedekon. Idi mo sulang imam-imam ibas pèlèen perdamèen bangsa Israel nai. Ndorok ngo ipangan kènè idi i sembarang bekkas siso melamun. 15Kaè pèlèen sinikellini dekket dada pèlèen hujuen i kennah rebbak iembah dekket pessohna mahan pèlèen situtungen sikira pèlèen merkedekoen bai Jahowa. Sendihina i mo gabè milik ndènè dekket dukak-dukak ndènè soh mi sidekkah-dekkahna, bagè sinihatorken Jahowa.”
16Nai ikusoi si Musa mo tersèngèt kambing mahan pèlèen pengampunen dosa. Ibagahken mo bana enggo itutung kambing idi. Kerna i gabè melaga mo si Musa taba si Eleazar dekket si Itamar, janah nina mo taba kalak i, 17#3 Ms. 6:24-26 “Kasa mo oda i bekkas simbadia ipangan kènè pèlèen pengampunen dosa i? Mbadia kalohon ngo pèlèen idi; iberèken Jahowa ngo idi bai ndènè, asa iampuni dosa bangsa Israel. 18Oda ngo embahen daroh kambing i mi Undung-undung Jahowa, asa nemmuken kennah pangaen ndènè kin ngo pèlèen i sidi bagè sienggo kuperèntahken i.”
19Ialoi si Aron mo, “Situhuna sidari èn enggo mo pesakatken pèlèen pengampunen dosa bangsa Israel dekket pèlèen situtungen bai Jahowa. Tukasi pè bagi, enggo ngo sempa baku olpek èn. Mella kupangan kin ma pèlèen pangampunen dosa i ari èn, sennang ma ngo ndia atè Jahowa?” 20Puas ngo iakap si Musa mendengkoh pengaloina i.
Currently Selected:
3 Musa 10: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
