3 Musa 8
8
Si Musa pebangkitken si Aron dekket dukak-dukakna
(2 Ms. 29:1-37)
1Nina Jahowa mo taba si Musa, 2“Tenggoi mo si Aron dekket dukak-dukakna janah embah mo pakèen imam, minak kerja, sada lembu tonggal bajar dèng mahan pèlèen pengampunen dosa, dua biri-biri tonggal dekket sada kembal roti siso meragi. 3Nai dokken mo karina bangsa Israel merpulung i lebbè pèntu Undung-undungKu.”
4Ibakin si Musa mo bagè sinidokken Jahowa. Tikan enggo kessa merpulung kari- na bangsa i i bekkas i, 5idokken si Musa mo taba kalak i, “Sikuulaken bagèndari perèntah Jahowa ngo i.”
6Nai idokken mo si Aron dekket dukak-dukakna asa roh mi lebbè janah menguras dirina. 7Enggo kessa bagi ipakkèken mo pakèen imam bai si Aron: Anak baju, tali abak, dekket jubah. Bagi ma efod itapelken mi abakna dekket tinali ibas kaèn halus nai. 8Nai ileketken mo tutup tenten bai si Aron, janah mi tutup tenten idi ileketken mo Urim dekket Tumim. 9Nai ibakin ma mo bulang-bulang mi takal si Aron, janah ibas bulang-bulang idi iselletken mo hiasen emmas, lako petandaken ukum si Aron enggo gabè milik Jahowa. Karina idi iulaken si Musa bagè sinidokken Jahowa tabasa.
10Nai ibuat si Musa mo minak kerja i janah idalisken mo mi Undung-undung Jahowa dekket mi karina haliuna. Merkitè bagidi karina mo ihuntuken bai Jahowa. 11Ipispisken mo situk ibas minak idi nai pitu kali mi babo langgaten dekket mi karina haliuna, bagi ma mi babo kancah dekket danganna. Merkitè bagidi karinana mo ipehuntu bai Jahowa. 12Enggo kessa bagi ipebangkit si Musa mo si Aron merkitè mengarirken minak i situk mi babo takalna. 13Nai idokken mo dukak-dukak si Aron roh mi lebbè. Ipakkèken mo bai kalak i anak baju dekket tali abak. Nai ibakin mo bulang-bulang mi takal kalak i bagè sinidokken Jahowa mbangsa.
14Enggo kessa i, ibuat si Musa mo sada lembu tonggal bajar dèng mahan pèlèen pengampunen dosa. Iampèken si Aron dekket dukak-dukakna i mo tangan kalak i mi babo takal pinakan idi. 15Nai isèat si Musa mo pinakan i janah ibuat mo dèba darohna. Idalisken mo merkitè jari-jarina daroh i mi tanduk-tanduk sinisoki-soki langgaten i, asa ihujuken langgaten idi bai Dèbata. Daroh sitadingna dèng iorèken mi dangaen langgaten i. Bagidi mo carana langgaten idi iuras janah ihujuken bai Jahowa. 16Ibas lembu simbaru isèat idi nai, ibuat si Musa mo karina pessoh simemalut bitukana, piah-piah bak pessohna dekket simerandalna kalohon ibas atèna nai. Karinana idi itutung i babo langgaten. 17Tapi ukum jukut lembu i, bebakna, rabanna sitadingna i bagi dekket bituka rajana, jadi karina lembu i itutung i ruar perundung-undungen laènken sienggo ipejaè kin bagè sinidokken Jahowa.
18Nai ibuat si Musa nola mo biri-biri tonggal mahan pèlèen situtungen, nai iampèken si Aron dekket dukak-dukakna mo tangan kalak i mi babo takal biri-biri i. 19Isèat si Musa mo biri-biri i janah ipispisken mo darohna mi empatna lumpak langgaten i. 20-21Nai ilapah-lapah mo pinakan idi janah rabanna dekket nènèhna iborih dekket laè. Itutung mo takal, pessoh dekket sitadingna ibas jukut biri-biri tonggal idi nai mahan pèlèen situtungen i babo langgaten bagè siniperèntahken Jahowa mbangsa. Bau huap pèlèen sipanganen idi pesennangken atè Jahowa.
22Nai ibuat si Musa mo biri-biri tonggal si sada nai mahan pèlèen pebangkitken imam. Iampèken si Aron dekket dukak-dukakna mo tangan kalak i mi babo takal biri-biri idi, 23nai isèat si Musa mo pinakan i. Enggo kessa i ibuat mo situk daroh pinakan i, nai idalisken mo mi coping kamuhun si Aron, mi kekambal tangan kamuhun dekket mi kekambal nèhè kamuhunna. 24Nai idokken mo roh njolmit dukak-dukak si Aron, nai idalisken ma mo situk daroh i mi coping kamuhun kalak i, mi kekambal tangan kamuhun, dekket mi kekambal kamuhun nèhè kalak i. Daroh sitadingna ipispisken mi siempat lumpakna langgaten i. 25Ibuat si Musa mo pessoh biri-biri idi, uitna simerpessoh, karina pessoh simemaluti rabanna, simerandalna kalohon ibas atèna nai, piah dekket pessohna bak nèhè kamuhunna. 26Ibas kembal sin roti siso meragi nai sienggo ipèlèken bai Jahowa, ibuat si Musa mo sada roti ngkapal sinibahan merminak bak sada roti menipis. Igamparken mo roti i mi babo pessoh bak kaè kamuhun biri-biri i. 27Karina mo idi ibakin mi tangan si Aron bak dukak-dukakna, nai ipèlèken kalak idi mo i sikira pèlèen merkedekon bai Jahowa. 28Enggo kessa bagi ibuat si Musa mo pa- ngaen idi bai kalak idi nai janah itutung i babo langgaten, rebbak dekket pèlèen situtungen mahan pèlèen pebangkitken imam. Bau huap panganen idi pesennangken atè Jahowa. 29Nai ibuat si Musa mo dada biri-biri i janah ipèlèken sikira pèlèen merkedekon bai Jahowa. Idi mo sulang si Musa ibas biri-biri tonggal sinipèlèken tikan kerja pebangkitken imam. Iulaken si Musa mo karinana idi bagè sienggo iperèntahken Jahowa bana.
30Enggo kessa bagi ibuat si Musa mo dèba ibas minak Kerja i nai dekket dèba ibas daroh silot i babo langgaten, nai ipispisken mo taba si Aron dekket bai dukak-dukakna bak mi pakèen kalak i. Merkitè bagidi mo si Musa menghujuken kalak i bak pakèen kalak i bai Jahowa.
31Nai idokken si Musa mo taba si Aron bak dukak-dukakna, “Roroh mo jukut pinakan idi i lebbè pèntu Undung-undung Jahowa. Rembang mi perèntah Jahowa, kennah ipangan kènè ngo jukut i i sidi dekket roti pèlèen pebangkitken imam silot ibas kembal. 32Gulè dekket roti sitadingna kennah ilekkup kènè ngo i kerri. 33Sidekkah pitu ari oda ndorok tadingenken ndènè Undung-undung Jahowa soh mi pul tikki pebangkitken kènè. 34Idokken Jahowa ngo asa barang kadè sienggo sibahan ari sidari èn siulaken ma mo tong bagi mi podien en. Merkitè upacara i mo dosa-dosa ndènè iampuni. 35Sidekkah pitu ari, mahar ari berngin, kennah tong kènè hot merian i lebbè pèntu Undung-undung lako mengulaken kadè sinidokken Jahowa. Mula oda iulaken kènè idi matè mo kènè. Bagidi ngo iperèntahken Jahowa bangku.” 36Nai iulaken si Aron dekket dukak-dukakna mo karina siniperèntahken Jahowa merkitè si Musa.
Currently Selected:
3 Musa 8: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
