1 Musa 47
47
Si Jakob mengadep raja Mesir
1-2Kessa i, iarahken si Josep mo lima kalak denganna sibebeltek mengadep raja. Nina mo, “Enggo roh bapa dekket denganku sibeltek i tanoh Kanaan nai bak kambing dekket biri-biri, lembu bak karina hartana. Bagèndari i tanoh Gosyen ngo kalak i.” Nai ipetandaken mo kalak i mendahi raja i. 3Nai ikusoi raja i mo kalak i, “Kadè ngo ulaen ndènè?”
Ialoi kalak i mo, “Ukum kami, mermakan ngo bagè empung nami. 4Roh kami, dok atè nami naing merian i nagerri èn ngo alè raja nami, kumarna masa ngo lèhè matè kocing i tanoh Kanaan, alah-alah pè mak nèngè lot tubuh mahan gagaten kambing bak biri-biri nami. Padiat mo kami merian i tanoh Gosyen.” 5Nai idokken raja i mo mbang si Josep, “Bagèndari enggo i sèn partua dekket kaka-anggimu. 6Etong mo nagerri Mesir èn bagè nagerrimu. Janah dokken mo taba kalak sipandè bai kalak i nai lako mermakan pinakanku.”
7Ipetandaken si Josep ma ngo bak bapana pè taba raja i. Ipasu-pasu si Jakob mo raja i, 8janah ikusoi raja i mo ia, “Sadikè ngo umur ndènè?”
9Ialoi si Jakob mo, “Ukum aku alè raja nami enggo mo nggelluh seratus tellupuluh tahun janah dak ngo mengeranto. Ukum nggelluhku pellin susah ngo janah terdokken joppok mula iperbandingken mi umur empungku sidak tong mengeranto ma.” 10Enggo kessa bagi, mengido balik mo si Jakob janah ibaing mo pasu-pasu persirangen. 11Dak iurupi si Josep ngo bapana bak kadè-kadèna merian i Mesir. Iberèken ngo bai kalak i tanoh simendèna gabè milikna i nagerri i, i gembar kuta Rameses, tosè bagè pendokken raja i. 12Icukupi si Josep ngo pangaen bapana bak kaka-anggina dekket karina kadè-kadè sincelketna pè, soh mi simengudana kalohon pè.
Tikan lèhè
13Lèhè matè kocing ngo kelèhèen i, jadi barang i dikè sambing pè oda lot nèngè pangaen. Karina ginemgem Mesir dekket Kanaan, gabè ndotè mo kumarna melèhè. 14Gennep menokor pagè kalak i, ipepulung si Josep ngo tokor pagè i, janah iboniken mi istana raja. 15Enggo kessa kerri kèpèng per Mesir bak per Kanaan, merrohen mo kalak Mesir mendahi si Josep mendokken, “Berrè mo bainami pangaen. Ulang belli kami matè. Kèpèng nami enggo kerri.”
16Ialoi si Josep mo, “Mula enggo kerri kèpèng ndènè, pinakan ndènè i mo berèken kènè; asa kuberrè pangaen bai ndènè.” 17Nai ipemberrèken kalak i mo pinakan bai si Josep, janah iberèken mo pangaen bai kalak i. I tahunna i mo iberrè si Josep pangaen bai kalak i, janah pinakan ngo gararna ibaing kalak i.
18Tahunna siroh nola roh dèng ma mo kalak i mendahisa mendokken, “Ntangkas mo kubagahken kami taba raja i, ukum kèpèng nami enggo mo kerri janah pinakan nami pè enggo mo gabè milik raja i ma. Kadè nami nèngè poda lot mahan berèenken nami bai raja i, laènken daging nami sendiri dekket tanoh nami i. 19Ulang belli kami matè. Ulang ma belli juma nami i gabè terulang. Tokor mo kami dekket tanoh nami i, pagè mo baing gararna. Kami bak tanoh nami gabè milik raja i mo. Berrè mo bai nami pagè lako mengudun nggelluh nami, bagi ma dekket bennih mahan ardangenken i juma nami.”
20Nai itokor si Josep mo karinana tanoh Mesir bai raja i. Suberri kalak Mesir terpaksa merdea tanohna, kumerna ntengam kalohon ngo pengenna lèhè i; asa gabè karina mo tanoh i suberri Mesir gabè milik raja. 21Karina jelma ginemgem i Mesir gabè hamba mo ibaing si Josep. 22Pellin tanoh imam-imam mo kessa oda itokor. Ai oda pella merdèa tanoh kalak i, kumarna lot ngo gajinna iberrè raja, mahan nggelluh kalak i. 23Idokken si Josep mo taba ginemgem i, “Tengen kènè mo enggo kutokor tanoh dekket batang diri ndènè lako bai raja i. En mo bennih sindorok iardangken kènè mi juma ndènè i. 24Dapet kessa peranien, kennah berèenken ndènè ngo seperlima hasilna bai raja i. Lebbihna imo baing kènè mahan bennih dekket pangaen ndènè sisimpangaen.”
25Ialoi kalak i mo, “Enggo iurupi kènè kami alè raja nami, kerna i lias atè mo kudokken kami. Uè mo kami gabè hamba raja i.” 26Nai gabè ibaing si Josep mo i gabè hatoren i nagerri Mesir, imo seperlima hasil peranien gabè milik raja. Soh bagèndari ngo merdalan hatoren i. Pellin tanoh imam-imam mo kessa siso gabè milik raja.
Pengidoen si Jakob perpodi
27Bagi mo dalanna kalak Israel menettap i Mesir i ladang Gosyen. Gabè kaya jong ngo kalak i janah merrak-merrik i sidi. 28Nggelluh dèng ngo si Jakob sipuluh pitu tahun nai i Mesir, gabè merumur mo ia soh seratus empatpuluh pitu tahun. 29#1 Ms. 49:29-32, 50:6 Enggo kessa njolmit iakap tikkina lako matè idilo mo anakna si Josep, idokken mo mbangsa, “Doroken mo tanganmu mi terruh kellang-kellang pangkal pahangku janah sumpahken mo mak ndorok ikubur ko aku i tanoh Mesir èn. 30Kennah i bekkas empungku ngo aku kuburken; embah mo bangkèngku i nagerri èn nai janah kuburken mo mi perkuburen kalak i.”
Nai ialoi si Josep mo, “Kubaing pè bagè nidokkenmi alè pa.”
31Nina si Jakob dèng ma, “Sumpahken mo magahken ibaing kono ngo bagè sikudokken i.” Isumpahken si Josep mo, nai mendokken lias atè mo si Jakob i babo pedemenna i.
Currently Selected:
1 Musa 47: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
