1 Musa 46
46
Si Jakob dekket dukak-dukakna laus mi Mesir
1Ikebbasi si Kakob mo karina barang-barangna nai berkat mo ia. Soh kessa mi Bersyeba memèlè mo ia taba Dèbata sinisembah bapana si Isak. 2Ibas alatenna tikan i sada berngin idokken Dèbata mo tabasa, “Alè Jakob, Jakob!”
“Kadè alè Jahowa,” nina mengaloi.
3“Aku ngo Dèbata, imo Dèbata sinisembah bapamu,” nina. “Ulang kono mbiar laus mi Mesir. Kubaing pè pinemparmu gabè bangsa mbellen i sidi. 4Kudengani pè ko lako laus mi Mesir, janah mengarak pinemparmu balik mi ladang èn. Mula dapet ajalmu i gembarmu ngo si Josep.”
5Nai berkat mo si Jakob i Bersyeba nai. Iampèken dukak-dukakna mo ia bagi dekket sinibagesna bak dukakna gennep mi babo kerèta nitengesken raja Mesir. 6#Ul. 7:15 Iembah kalak i ma mo pinakanna dekket karina harta nicametna i tanoh Kanaan, nai laus mo kalak i mi Mesir. Iarak si Jakob ngo karina pinemparna imo 7karina pemparenna daholi dekket daberru.
8Simpangaen si Jakob si berkat mi Mesir imo: 9si Ruben, anak situaen; dukak-dukakna: si Henokh, si Palu, si Hezron dekket si Karmi. 10Si Simeon; dukak-dukakna; si Jemuel, si Jamin, si Ohad, si Jakhin, si Zohar dekket si Saul, imo tubuh sinibagesna sada kalak berru Kanaan. 11Si Lewi; dukak-dukakna si Gerson, si Kehat dekket si Merari. 12Si Juda; dukak-dukakna: si Syela, si Peres dekket si Zerah, bak dukakna sidèban imo si Er dekket si Onan matè ngo i tanoh Kanaan. Dukak-dukak si Peres imo: si Hezron dekket si Hamul. 13Si Isasar; dukak-dukakna: si Tola, si Pua, si Job dekket si Simron. 14Si Zebulon; dukak-dukakna: si Sered, si Elon, dekket si Jahleel. 15Karinana i nitubuhken si Lea dekket si Jakob i Mesopotamia, bagi ma dekket berruna mergerar si Dina. Karina pemparen si Jakob tubuh sinibages si Lea tellupuluh tellu kalak buèna.
16Si Gad; dukak-dukakna: si Zifyon, si Hagi, si Syuni, si Ezbon, si Eri, si Arodi dekket si Areli. 17Si Asyer; dukak-dukakna: si Jimna, si Jiswa, si Jiswi dekket si Beria bak si Serah turang kalak i. Dukak si Beria imo si Heber dekket si Malkiel. 18Kalak èn sipuluh ennem kalak imo pemparen si Jakob tubuh si Zilpa, imo daberru rading si Lea iberèken si Laban berruna.
19Ukum si Rahel, sinibages si Jakob, dua ngo anakna, imo si Josep dekket si Benjamin. 20#1 Ms. 41:50-52 Dua ngo anak si Josep i Mesir, imo si Manasye dekket si Efraim sinitubuhken sinibagesna si Asnat, berru si Potifera, imam i Heliopolis. 21Si Benjamin; dukak-dukakna: si Bela, si Bekher, si Asybel, si Gera, si Naaman, si Ehe, si Ros, si Mupim, dekket si Hupim dekket si Ared. 22Si sipuluh empat imo pemparen si Jakob arap sinibagesna si Rahel.
23Nai si Dan; dukakna si Husim. 24Nai si Naftali; dukak-dukakna: si Jahzeel, si Guni, si Jezer dekket si Syilem. 25Sipitu kalak imo pemparen si Jakob arap si Bilha rading niberèken si Laban bai si Rahel berruna i.
26Pulung mo karina pemparen si Jakob laus mi Mesir ennempuluh ennem kalak, laènken purmaèn-purmaènna. 27#Ul. 7:14 Dukak si Josep si tubuh i Mesir, dua kalak ngo, asa karina pemparen si Jakob soh mi Mesir pulung mo pitupuluh kalak.
Simpangaen si Jakob i Mesir
28Ipasulak si Jakob mo si Juda lebbè lako mendiloi si Josep asa isimbaki ia mi Gosyen. 29Merkerèta mo si Josep lako menimbaki bapana mi si. Jumpa kessa mo kalak i, ikaol si Josep mo bapana i janah ndekkah kalohon ngo ia tangis. 30Nina si Jakob mo mbang si Josep, “Enggo sennang atèngku matè bagèndari, kumarna enggo kuidah kono, janah kubettoh nggelluh dèng ngo kono keppè.”
31Nai idokken si Josep mo taba kaka-anggina dekket kadè-kadèna sidèban i, “Kennah laus ngo aku magahken taba raja i, enggo roh kènè kadè-kadèngku karina simerian i tanoh Kanaan nai. 32Kubagahken ma mo, ukum kènè permakan biri-biri dekket lembu ngo, janah enggo iembah kènè pinakan bak harta ndènè. 33Mula idiloi raja kènè janah ikusoi ulaen ndènè, 34bagahken kènè mo, mermakan ngo kènè mulai anak-anak nai, tosè bagè empung ndènè i. Merkitè bagidi gabè idokken mo kènè merian i tanoh Gosyen.” Idokken si Josep pè bagi, kumarna merlèa ngo pengakap kalak Mesir mula mersaor dekket permakan.
Currently Selected:
1 Musa 46: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
