1 Musa 45
45
Ipetandaken si Josep dirina
1 #
Ul. 7:13
Oda mo terhempek si Josep nè penarihenna i lebbè pugabè-pugabèna i. Kernanai ipasulak mo kalak i menadingken bilik i asa ndorok ipetandaken bai kaka-anggina barang isè tuhuna ia. 2Enggo kessa mo laus karina naposona i i bages i nai, mèter derko-derko mo si Josep tangis, sanga terdengkoh bai kalak Mesir ni ruar bages i, janah soh mo berita i mi istana raja. 3Nina si Josep mo taba kaka-anggina, “Si Josep ngo aku. Nggelluh dèng ma ngo bapa?” Mengidah i buradan kalohon mo kaka-anggina i gabè oda ndorok ialoi kalak i. 4Nai nina si Josep mo taba kalak i, “Markè mo misèn.” Ipejolmit kalak i mo janah idokken nola dèng ma, “Aku ngo si Josep sinidèa ndènè mi Mesir. 5Ulang kènè mbiar barang peselsel kumernaken idèa kènè aku. Situhuna Dèbata ngo menatang-natang aku mi sèn mahan solo-solo ndènè lako paluahken jelma nterrem. 6Pedua tahunken dèng ngo bagèndari lèhè èn, janah lima tahun nai oda mo lot kalak merjuma barang pè merani. 7Dèbata ngo mengarak-ngarak aku mahan solo-solo ndènè lako paluahken kènè merkitè kelengangen èn, janah lako menjamin kinijuah ndènè asa tong merudut pinempar ndènè. 8Jadi, ukum situhuna oda ngo kènè kulih sebabna asa isèn aku bagèndari, tapi Dèbata ngo. Ia ngo pebangkitken aku gabè èkuten pugabè raja Mesir. Ipesoh ngo bangku kuasa mengatur bagesna dekket suberri Mesir.
9 #
Ul. 7:14
Bagèndari, ndor mo kènè balik mendahi bapa, janah dokken kènè tabasa ukum si Josep anakna mendokken bagèen, ‘Enggo ipebangkit Dèbata aku gabè raja i suberri Mesir; roh mo kono alè pa ndor. 10I tanoh Gosyen mo bapa merian, asa ndessing dekket aku pa, bagi dekket dukak-dukakmu bak kempu-kempumu, kambing, lembu dekket karina harta bapa. 11Mula merian i Gosyen ngo bapa, ndorok mo kupehèdu-hèdu ko, pa. Lèhè èn lot ngo lima tahun nai dekkahna, kuusahaken pè asa bapa, kadè-kadè bak pinakan bapa i ulang kurangen barang kadè pè.’ ”
12Nina si Josep dèng ma, “Bagèndari tengen janah petangkas kènè mo, bang kono pè alè Benjamin, tuhu-tuhu ngo aku si Josep. 13Bagahken kènè mo taba bapanta bagi mo belgahna kuasangku i Mesir èn. Janah sukutken kènè ma mo tabasa karinana siniidah ndènè. Nai ndor mo embah kènè bapa mi sèn.”
14Enggo kessa bagi, ikaol mo anggina si Benjamin i, ninganna tangis; si Benjamin pè tangis mo ninganna mengkaol si Josep. 15Kessa i tikanna tangis dèng, ikaol si Josep mo karina kakana i janah isanggohi kalak i karina. Kessa i pè asa mengeranai kalak i dekketsa.
16Tikan terbertik mi istana raja, roh dengan sibeltek si Josep, lolo ngo raja i bak karina naposona pè. 17Nai idokken raja i mo taba si Josep, “Dokken mo dengan sibeltekmu i memboban kalodèna dekket pagè janah balik mi tanoh Kanaan, 18lako mengalengi dukak-dukakna asa lompat misèn. Kuberèken pè bai kalak i tanoh simendèna i Mesir èn, janah ndorok nggelluh ngo kalak i, oda kurangen ipas hasil tanoh i nai. 19Dokken ma mo iembah kalak i, i sèn nai barang piga kerèta asa lot merembah sinibages dekket dukak-dukak kalak i siso terbaingsa dèng merdalan, bagi dekket meraleng bapa kalak i. 20Ulang pella ipikirken kalak i mula lot pè barangna kennah tading, kumarna simerandalna kalohon i Mesir èn ngo gabè milikna.”
21Ibaing dukak-dukak si Jakob mo bagè nidokken raja i, iberèken si Josep mo bai kalak i tah piga-piga kerèta, tosè bagè perèntah raja i, bagi ma dekket bekkel i dalan. 22Iberèken dèng ma ngo bai kalak i gennep tersada mpasang pakèen rembaru, tapi ukum bai si Benjamin iberèken mo riar tellu ratus dekket lima mpasang pakèen rembaru. 23Itengesken ngo bai bapana sipuluh kalodè merembah barang-barang i Mesir nai simendèna kalohon, janah sipuluh kalodè nai merembah pagè, roti dekket pangaen sidèban, mahan panganna i dalan tikan perdalanenna mi Mesir. 24Nai ipeberkat mo kaka-anggina i ninganna idokken bai kalak i, “Ulang kènè merselisih i tengah ndalan.”
25Itadingken kalak i mo Mesir lako balik mi Kanaan mendahi si Jakob bapa kalak idi i. 26“Nggelluh dèng ngo keppè si Josep!” nina kalak i tabasa. “Raja ngo ia bagèndari i tanoh Mesir.” Mendengkoh i bagè cara lengang ngo si Jakob, janah oda percaya ia bai kalak i.
27Tapi isukutken kalak i kessa mo karinana nidokken si Josep taba kalak i, janah idah kessa mo kerèta nitengesken si Josep i lako mengalengisa mi Mesir, gabè satdar mo ia ipas perukurenna. 28“Nggelluh dèng ngo keppè anakku si Josep!” nina. “Idi mo kessa kukelemmoken. Kennah laus ngo aku lako menengensa sinderrang madèng matè aku.”
Currently Selected:
1 Musa 45: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
