1 Musa 44
44
Bennè perènumen
1Enggo kessa bagi iperèntahken si Josep mo taba naposona, “Isi kè mo baka kalak i dekket pagè, sadikè terembahsa, janah masukken mo riar kalak i gennep mi bakana i babo pagè i. 2Pemasuk ma mo perènumen pirakku i mi baka anggina siampun-ampun i, rebbak dekket riar.” Nai ibaing naposo i mo bagè perèntah i. 3Sibarembenkenna njengkas kalohon dèng, mersirang mo si Josep dekket kaka-anggina i, berkat mo kalak i bak kalodèna. 4Madèng ndaoh kalak i i kutana nai, idokken si Josep mo taba èkuten naposona, “Kettu jalangi kalak i. Mula enggo dapet, dokken taba kalak i, ‘Kasa nggodo ibakin kènè bales simendè? 5Kasa itangko kènè perènumen pirak tuanku?
Ai i ngo perènumen janah bekkas menengen gerrek-gerekken. Enggo mbelgah kalohon kejahaten ndènè i.’ ”
6Soh kessa mo naposo i mendahi dengan sibeltek si Josep, idokken mo tosè bagè sienggo iperèntahken si Josep i. 7Ialoi kalak i mo ia, “Kadè ngo maksud ndènè alè Tuan? Mersumpah mo kami oda lot kubaing kami bagidi. 8Ibettoh kènè sendiri ngo alè Tuan, riar sijumpa kami ibas baka nami i babo pagè i, enggo mo kuulakken kami bai ndènè. Jadi oda lot kami menangko pirak barang emmas pè i bages gubèrnur i nai. 9Asa alè tuan, mula terdapet barang i tah bai siapaina kami, ihukum matè mo ia, janah kami pè mahan hambamu mo alè tuan.”
10Idokken naposo imo, “Jadi barang taba isè terdapet perènumen i, ia mo mahan hambangku; sidèbanna ndorok mo laus.” 11Nai mèter rudu-rudu mo kalak i pesampurken janah memuka bakana. 12Iperèso naposo si Josep mo baka i seppè, mulai baka situaen soh mi siampun-ampun, jupasa mo perènumen i i baka si Benjamin. 13Bonek kalohon mo karina kakana i, ipengeribakken kalak i mo pakènna gennep. Nai iboban nola mo kalodèna, balik mo kalak i mi kuta.
14Soh kessa mo si Juda dekket kaka-anggina i mi bages si Josep i sidi dèng ngo idapet si Josep, nai mersembah merkuraja mo kalak i i hadeppenna. 15Nai idokken si Josep mo katana, “Bakunè ngo pemaing ndènè i? Oda ngo saddar kènè ukum jelma bagè aku èn ndorok ngo kubettoh pengelako ndènè jahat i merkitè kaji ujud?”
16“Bakunè mo pendokken nami alè raja nami?” nina si Juda mengaloi. “Bakunè mo dok nami mendokken oda ngo kami menangko janah pesèntengken diri nami? Ai enggo ngo ipacidah Dèbata kesalahen nami. Bagèndari pè alè raja nami, hambamu mo kami karina, oda pellin bai isè terdapet perènumen i.”
17Idokken si Josep mo, “Oda ngo bagi. Ukum aku oda uè maing bagi. Pellin barang bai isè ia terdapet perènumen i ngo kessa gabè hambangku. Sidèbankenna i ndorok mo balik mendahi bapa ndènè.”
Ikepkep si Juda si Benjamin
18Laus mo si Juda mi lebbè menjolmiti si Josep janah mendokken, “Sintabi mo alè raja nami, paduè mo lebbè aku mengerana dèng dekket raja i. Ulang mo lebbè melaga raja i taba aku; ai raja ngo kènè i Mesir i. 19Enggo ikusoi raja i kami, “Lot dèng ngo bapa ndènè barang dengan sibeltek ndènè sidèban?” 20Kualoi kami ngo, ‘Ukum bapa nami enggo tua-tua janah dèdahen nami tubuh tikan enggo nggeddang umur bapa nami. Ukum kaka dedahen nami i sada inang enggo matè. Asa pellinsa nai ngo kessa nggelluh bagèndari, janah ia mo tampuk pusuh-pusuh bapa.’ 21Idokken raja i ngo asa kuembah kami ia misèn, asa idah raja i ia, 22nai kualoi kami ngo magahken ukum ia oda ndorok singkang bai papanna nai, ai mula singkang ia dekket bapana i bakunè pè matè nai ngo bapa. 23Tapi idokken raja i mo, ‘Oda ndorok nè kè mengadep aku, mula oda dekket iembah kènè dèdahen ndènè i.’
24Tikan mulak kami mendahi bapa nami i, kupesoh kami ngo bana sinidokken raja i. 25Nai ipasulak bapa nola mo kami misèn lako menokor pangaen. 26Kualoi kami mo, ‘Oda terbaing kami laus mi sadoi, kumarna mak ndorok kami mengadep gubèrnur i, kum oda dekket dedahen nami siampun-ampun i. Mula dekket ia, baru pè ndorok kami laus mi sidi.’ 27Nai idokken bapa nami mo, ‘Ibettoh kènè ngo ukum sinibagesku si Rahel, pellin dua ngo kessa anakna. 28Situaen enggo itadingken aku. Bakunè pè enggo pana ijerngen biahat ia, kerna soh bagèndari oda nè kuidah ia. 29Mula iembah kènè ngo anakku siampun-ampun èn bangku nai, janah mula lot masa barang kadè bana, bonek sinibaing ndènè bangku i mo maing aku matè, kumarna enggo tua-tua aku.’ ”
30-31“Kumarna i alè raja nami,” nina si Juda taba si Josep, “Mula balik kami mendahi bapa nami tapi oda dekket dèdahen nami, bakunè pè matè nai mo bapa nami i. Ai mergantung bana nai ngo kessahna, janah enggo ma bagi tua-tuana, asa bonek sikubaing kami bana i mo maing matè ia. 32Janah dèng ma enggo kin kujandiken bai bapa, aku mo jaminen dèdahen nami i. Kudokken ngo taba bapa, mula oda kuembah balik dedahenku i bana, aku tanggung hukumenna sidekkah nggelluhku. 33Jadi kupido mo alè raja nami, aku mo tading i sèn gabè hamba raja i, asal mo paduè ia balik rebbak dekket karina kakana i. 34Bakunè mo ningku balik ukum oda dekket ia? Oda tertengen aku nahan bonek sisempa bai bapa nami i.”
Currently Selected:
1 Musa 44: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
