1 Musa 43
43
Berkat kaka si Josep mi Mesir rebbak dekket si Benjamin
1-2Makin ntengamna ngo lèhè i tanoh Kanaan, janah kerri kessa mo ipangan simpangaen si Jakob pagè niembahna i Mesir nai, nina si Jakob mo taba dukak-dukakna, “Lakè nola mo mi Mesir menokor pagè mahan panganta.”
3Jadi idokken si Juda mo taba bapana, “Enggo kin memmes ipesèngèt Gubèrnur Mesir i kami mendokken mak ndorok roh kami mi hadeppenna, mula oda kuembah kami dèdahen nami i. 4Mula ipadiat bapa ngo dekket dèdahen nami i, uè ngo kami laus mi sidi menokor pangaen. 5Tapi mula oda ipadiat bapa si Benjamin dekket, oda kami uè laus, kumarna enggo kin idokken gubèrnur i oda ndorok kami roh mengadep ukum mak dekket dèdahen nami i.”
6Nina si Jakob mo, “Kasa isusahi kènè aku merkitè ibagahken kènè bana lot dèng ngo dèdahen ndènè?”
7Ialoi kalak i mo, “Dak iseksek ngo kami tersèngèt karina kita sisimpangaen, ai nina ngo, ‘Nggelluh dèng ngo bapa ndènè? Lot dèng ngo daholi dèdahen ndènè?’ Nai kennah ngo kualoi kami kuso-kusona i. Ai kubettoh kami kin gabè idokken kennah kuarahken kami nola dèdahen nami i?”
8Nai idokken si Juda mo taba bapana i, “Padiat mo si Benjamin janah aku mo mertanggung jabab tersèngèt ia. Kusudu kami pè merdalan asa ulang sanga lot matè rapar banta nai. 9Aku mo menjaminsa, janah bangku nai mo tunggu ia. Mula oda kuembah ia balik merkinijuah, aku mo menanggung hukum sidekkah nggelluh. 10Ukum oda kin bagidi dekkahna dak terendep-endep kita, tentu enggo mo nemmu dua kali nola kami laus roh.”
11Nai idokken bapa kalak i mo, “Mula kennah bagidi nai ngo lakona, embah kènè mo luah ndènè hasil simerandalna i kutanta èn nai bai gubèrnur i: imo nditak, tenggoli, rempah-rempah, buah kerras dekket buah badem. 12Embah kènè mo riar dua kali lempit, ai kennah ulakenken ndènè ngo riar sijumpa ibas baka ndènè tikala i. Tah bakunè lupana kin i. 13Arahken kènè mo dèdahen ndènè i, janah ndor mo kènè balik. 14Katerra pè masèh mo atè gubèrnur i midah kènè ibaing Dèbata perkuasa i, asa iolihken si Benjamin dekket si Simeon taba kènè. Tersèngèt aku, mula kennah mago mo keppè dukak-dukakku karinana, ueh bakunè nibaing.”
15Nai iembah kaka-anggi si Josep mo luahna dekket riar dua kali lempit, nai berkat mo kalak i rebbak dekket si Benjamin mi Mesir. Soh kessa mo kalak i, ihadep kalak i mo si Josep. 16Idah si Josep kessa mo si Benjamin dekket karina kakana i, idokken mo taba naposona, “Arahken mo kalak i mi bagesku. Naing rebbak mangan ngo aku cèger ari èn dekket kalak i, jadi sembellih mo sada pinakan, janah kebbasi kènè mo i.”
17Ibahanken perkebbas i mo bagè nidokkenna i, iarahken ma mo dekket kaka-anggi si Josep i mi bagesna.
18Iarahken kessa mo kalak i mi bages si Josep, buradan mo kalak i ninganna mersura-sura, “Dok atè iarahken pè kita misèn kumernaken riar sijumpa kita ipas bakanta tikan kita misèn tikala i ngo. Ai naing itangkup kalak i mo kita simpusta, nai irampasi mo kalodènta janah iperhamba mo kita.” 19Kernana i, i gembar pèntu bages si Josep idokken kalak i mo taba perkebbas i, 20“Sintabi mo alè tuan, ukum kami enggo ngo pernah roh misèn menokor pangaen. 21-22Tikan balik kami, nai i permalamen, kubuka kami ngo baka nami. Keppè karina riar tokor pagè i jumpa kami nola i babo pagè i. Oda kubettoh kami tah isè maing riar i mi sidi. Bagèndari enggo kuembah kami bai ndènè alè Tuan. Janah dèng ma kuembah kami ngo penokor pagè nola.”
23Idokken perkebbas i mo, “Ulang kènè mbiar. Ulang rembekbekken. Dèbatamu sinisembah partuamu ngo memasukken riar i mi bagasen baka ndènè i. Enggo kin ngo kujalo penggarar pagè idi bamu nai.”
Nai iarahken mo si Simeon mendahi kalak i, 24nai itaruhken mo kalak i mi bages. Iberèken dèng ma ngo bai kalak i laè mahan morih nèhè, bagi ma pangaen kalodè kalak i. 25Kessa bagi irongkari kalak i mo luah sinaing berèenkenna bai si Josep, roh kessa ia cèger ari, kumarna enggo kin ngo ibagahken taba kalak i, naing rebbak mangan kalak i dekketsa. 26Soh kessa mo si Josep mi bages, iberèken kalak i mo luah i bai si Josep ninganna mersembah tabasa. 27Ikusoken si Josep mo tersèngèt kalak i, idokken mo, “Enggo nung isukutken kènè taba aku tersèngèt bapa ndènè sienggo tua-tua i. Bakunè ngo ia bagèndari? Njuah-njuah ngo?”
28Ialoi kalak i mo, “Sentabi mo alè raja nami, ukum bapa nami i njuah-njuah ngo.” Nai mersembah mo kalak i tabasa.
29Idah si Josep kessa mo si Benjamin, anggina i, idokken mo, “En ngo anggi ndènè siampun-ampun i siniranaken ndènè bangku i? Katerra pè ipasu-pasu Dèbata mo ko alè pa.” 30Mbencet ngo ukur si Josep kumarna enggo messeng nteddohna dekket kumarna ngkelleng atèna midah dèdahenna i. Enggo hampir maknè terhempeksa dirina, kumernakenna i sintempu mèter laus mo ia i sidi nai, mi bilikna ninganna tangis. 31Enggo kessa i merduhap mo ia, nai karuar nola mo ia ninganna kipessel ukurna, idokken mo asa ipehantar pangaen. 32Laèn ngo mèja si Josep mangan i, janah kaka-anggina i mèja sidèban. Kalak Mesir nisidi mangan ma i mèja sidèban, ai merlèa ngo pengakap kalak i mula rebbak mangan dekket kalak Heber. 33Ukum kaka-anggi si Josep pedempak mo ibaing dekket mèja si Josep, mengèkutken umurna gennep, mulai i situaen nai soh mi siampun-ampun. Idah kalak i kessa mo cara perkundul i, mersitengenen mo kalak i janah lengang. 34Pangaen kalak i pè ibuat i meja si Josep nai ngo, tapi ukum si Benjamin lima kali lempit ngo pengkebasina daripada kakana i. Nai mangan mènum mo kalak i rebbak dekket si Josep soh pulak.
Currently Selected:
1 Musa 43: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
