2 Musa 6
6
1 #
2 Ms. 3:13-15
Nai nina Jahowa mo taba si Musa, “Bagèndari mo idahenmu, bakunè Kubaing taba raja i. Situhuna kennah Kupaksa ngo ia lako pelausken kalak i, i nagerri èn nai.”
Idiloi Jahowa si Musa
2Mongkam mo Dèbata taba si Musa, nina mo, “Aku ngo Jahowa. 3Kupetarar ngo diringku taba si Abraham, si Isak dekket si Jakob sikira Dèbata Pergegoh Sisotercodi, tapi oda ngo Kupetandaken diringku bai kalak idi mergerar ‘Jahowa’. 4Kubakin ma ngo perpadanenku dekket kalak i. Kujandiken ngo lako memerèken nagerri bekkas kalak idi mendampin tikala i. 5Enggo Kudengkohken penderko kalak Israel siniperhamba kalak Mesir, nai Kuèngèt mo jandingKu idi. 6Asa bagahken mo taba kalak Israel Aku mendokken taba kalak i: Aku ngo Jahowa, Kupaluah mo kènè ibas perhambaen bangsa Mesir nai. Naing Kupacidah ngo kegegohenKu simahantu idi lako paluahken kènè janah mendabuh hukum mbotong kalon dempak bangsa Mesir. 7Kubaing mo kènè gabè bangsangKu janah Aku gabè Dèbata ndènè. Nai ibettoh kènè mo Aku ngo Jahowa Dèbata ndènè, sipaluahken kènè i perhambaen Mesir nai. 8Kuarak mo kènè mi nagerri sienggo Kujandiken merkitè bulaban taba si Abraham, si Isak dekket si Jakob; Kuberèken mo tanoh idi bai ndènè sendiri. Aku ngo Jahowa.” 9Karina tennah Jahowa idi ipesakat si Musa taba bangsa Israel, tapi oda ipaduliken kalak i si Musa, kerna enggo mendellè kalak i kumernaken perhambaen mpiah i.
10Enggo kessa i nina Jahowa nola mo taba si Musa, 11“Lako mo menghadep taba raja Mesir janah dokken mbangsa kennah padiatenna bangsa Israel menadingken nagerrina idi.”
12Tapi ialoi si Musa mo, “Kalak Israel sendiri pè oda uè mendengkohken ranangku. Makinsa nola mo raja Mesir, dikè nola mo uè ia mendengkohken ranangku siso mpantas mengerana èn?”
13Bagi mo ipasulak Jahowa si Musa dekket si Aron lako magahken taba bangsa Israel dekket taba raja Mesir, Jahowa ngo pasulakken kalak i lako menguluken bangsa Israel mbungkas i Mesir nai.
Tarombo si Musa dekket si Aron
14En mo tarombo si Musa dekket si Aron: Si Ruben, anak si Jakob situaen, empat ngo dukakna daholi imo: Si Henokh, si Palu, si Hezron dekket si Karmi. Kalak i mo empung horong marga Ruben. 15Si Simeon bak sinibagesna sada kalak berru Kanaan ennem kalak anakna, imo si Jemuel, si Jamin, si Ohad, si Jakhin, si Zohar dekket si Saul. Kalak idi mo empung horong ibas marga Simeon. 16#4 Ms. 3:17-20, 26:57-58; 1 Kron. 6:16-19 Si Lewi lot ngo tellu dukakna daholi imo: Si Gerson, si Kehat dekket si Merari: Kalak idi mo sime- ngusurken horong marga Lewi. Merumur ngo si Lewi soh 137 tahun. 17Anak si Gerson dua kalak si Libni dekket si Simei. Mèduk ngo pemparen kalak èn. 18Si Kehat empat dukakna daholi imo: Si Amram, si Jizhar, si Hebron dekket si Uziel. Merumur ngo si Kehat soh 133 tahun. 19Si Merari dua ngo dukakna daholi imo: Si Mahli dekket si Musi. Imo horong i marga Lewi soh mi pinempar kalak i gennep.
20Ikabini si Amram mo si Jokhebed, namberruna i, janah anak kalak i mo si Aron dekket si Musa. Dekkah si Amram nggelluh 137 tahun mo. 21Si Jizhar tellu dukakna daholi imo: Si Korah, si Nefeg dekket si Zikhri. 22Si Uziel pè tellu ma ngo anakna imo: Si Misael, si Elsafan dekket si Sitri.
23Kabin mo si Aron taba si Eliseba, berru si Aminadab; turang si Eliseba imo si Nahason. Itubuhken si Eliseba mo si Nadab, si Abihu, si Eleazar dekket si Itamar. 24Si Korah tellu ngo dukakna daholi imo: Si Asir, si Elkana dekket si Abiasaf. Kalak idi mo empung horong pemparen si Korah. 25Si Eleazar anak si Aron kabin taba si Putiel, janah anak kalak èn mo si Pinehas. Idi mo karina gabè èkuten kaum bak pengulu ibas pemparen marga Lewi.
26Si Aron dekket si Musa èn mo idokken Jahowa lako mengarak kalak Israel mbungkas i Mesir nai. 27Kalak i sidua mo menghadep raja Mesir asa ipaluah kalak Israel.
Jahowa pesakatken perèntah taba si Musa dekket si Aron
28Sinderrang mengerana Jahowa taba si Musa i tanoh Mesir, 29Nina mo, “Aku ngo Jahowa. Pesakat mo taba raja Mesir, karinana sienggo Kudokken taba kono.”
30Tapi nina si Musa mo mengaloi, “Ibettoh Kono ngo oda pandè aku mengerana, alè Jahowa. Bakunè mo peruè raja i mendengkohken ranangku?”
Currently Selected:
2 Musa 6: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
