2 Musa 7
7
1Nai nina Jahowa mo mbang si Musa, “Kubaing mo ko bagè Dèbata i lebbè raja i janah kakamu si Aron mengerana tabasa sikira nabimu. 2Bagahken taba si Aron karinana sienggo Kuperèntahken bamu. Suruh mo si Aron mendokken taba raja i, ai kennah pediatenna ngo kalak Israel menadingken nagerri Mesir. 3#Ul. 7:36 Tapi Kubaing mo mermpihir ukur raja i. Oda ngo isarihken kono, agia pè Kubakin mbuè mara i Mesir. 4Kumerna i Kuhukum mo kalak Mesir dekket hukumen-hukumen mberrat, nai kuarak mo karina bangsa Israel bangsangKu, mbungkas i nagerri idi nai. 5Asa ibettoh kalak Mesir, Aku ngo Jahowa, sinderrang Kuhukum kalak idi janah mengarak kalak Israel karuar i nagerri kalak i nai. 6Nai ibakin si Musa dekket si Aron mo bagè sinidokken Jahowa i.” 7Merumur mo si Musa 83 tahun, tikan menghadep raja Mesir kalak idi.
Tongket si Aron
8Nina Jahowa mo taba si Musa dekket si Aron, 9“Mula ipengidoken raja i taba kènè lako memakin kelengangen mahan bukti, dokken mo si Aron memuat tongketna dekket mengambongken mi tanoh i lebbè raja i. Mobah mo tongket i gabè nipè.” 10Nai laus mo si Musa dekket si Aron menghadep raja i janah ibakin kalak idi mo bagè sinidokken Dèbata. Iambongken si Aron mo tongketna mi tanoh i lebbè raja dekket pugabèna, nai mèter mobah mo tongket idi gabè nipè. 11Kumerna i idilo raja i mo kalak simerhèlmu dekket kalak sipandè, nai ibaing kalak i ma mo bagidi merkitè hèlmuna maing sibalik mata. 12Iambongken kalak idi mo tongketna mi tanoh, janah mobah ma mo tongket idi gabè nipè. Tapi gabè ibenduti tongket si Aron mo tongket kalak idi. 13Tapi tukasi pè bagi, tong ngo mpihir ukur raja idi, janah oda nggèut memperduliken rana si Musa dekket si Aron, bagè sienggo idokken Jahowa.
Mesir kenna bala
Laè gabè daroh
14Enggo kessa i idokken Jahowa mo taba si Musa, “Mpihir kalon ngo ukur raja i. Oda iduè bangsa Israel laus. 15Kumarna i njengkas mo dahi ia, sinderrang laus ia mi laè Nil. Embah mo tongket singgèut mobah gabè nipè idi janah pèma mo pekirohna i biding laè idi. 16Dokken mo taba raja idi: Jahowa Dèbata kalak Heber, ngo pasulakken aku pesohken bai raja i, asa padiatenmu ummatNa laus mersembah tabasa i padang gurun. Tapi soh bagèndari laju oda nggèut raja i mendengkohken. 17#Alm. 16:4 Kumarna i bagèèn ngo nina Jahowa ‘Merkitè sikubakin nahan, bettohenmu mo Aku ngo Jahowa. Merkitè tongket èn kusampet mo babo laè èn, nai mobah mo laè i gabè daroh. 18Mermatèen mo ikan janah bau macik mo laè èn gabè oda terènum bangsa Mesir nèngè laè i.’ ”
19Nai nina Jahowa mo taba si Musa, “Dokken mo ibuat si Aron tongketna idi janah ipekustang mi babo karina laè, laè bangkiten dekket bendar bendar si lot i Mesir. Kembali daroh mo laèna i, janah i suberri ladang kennah dom daroh, dekket laè silot i kiong dekket goci.”
20Nai ibakin si Musa dekket si Aron mo bagè sinidokken Jahowa. Ipekèkè si Aron mo tongketna i lebbè raja i dekket karina pugabèna, janah isampet mo laè Nil idi, nai mènter mobah mo laè i gabè daroh. 21Mermatèen mo ikan sini laè idi, janah bau macik kalohon mo laè idi, gabè oda nèngè terènum kalak Mesir laè idi. I suberri tanoh Mesir enggo dom daroh. 22Nai roh mo persibalik mata kalak Mesir ibakin ma mo bagi merkitè kinangguruenna gabè tong mo mpihir ukur raja i. Bagè sienggo nidokken Jahowa, oda nggèut raja i mendengkohken rana si Musa dekket si Aron. 23Balik bagi mo ia mi bagesna cituk poda isarihken simasa idi. 24Karina mo kalak Mesir mengkurak telaga i biding laè i lako menulusi laè mahan ènumen, kerna oda nè terènum laè i.
25Enggo mo lebbih pitu ari enggo kessa isumpahi Jahowa laè Nil i.
Currently Selected:
2 Musa 7: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
