2 Musa 5
5
Si Musa dekket si Aron menghadep raja Mesir
1Nai laus mo si Musa dekket si Aron menghadep raja Mesir janah nina mo, “Bagèn ngo perèntah Jahowa, Dèbata Israel, ‘Duè mo bangsangKu laus asa isembah kalak i Aku i padang gurun.’ ”
2“Isè ngo Jahowa i?” nina raja i. “Kasa kennah kuparduliken Ia janah paduènku bangsa Israel laus? Oda kutandai Jahowa ndènè i janah oda kupadiat kalak Israel laus.”
3Nai idokken si Musa dekket si Aron mo, “Enggo ipacidah Dèbata kalak Heber dirina taba kami. Asa paduè mo kami laus mi padang gurun daohna tellu ari merdalan lako mèlèken pèlèen bai Jahowa, Dèbata nami. Mula oda kuulaken kami idi ibunuh mo kami merkitè sakit barang geraha.”
4Nai nina raja i mo taba si Musa dekket si Aron, “Kasa ilolahi kènè kalak i, ibas bahanna nai? Pasulak mo hamba-hamba idi mahan bahaen! 5Enggo mbuèsu bilangen kalak i. Keppè kom nola mo kalak i katèndènè bagèndari!”
6Sidarinkenna i iperèntahken raja i mo taba mandur bangsa Mesir dekket mandur bangsa Israel, 7“Ulang nè berrèken kènè nggala pagè bai bangsa idi mahan batu bata. Belli mo kalak idi sendiri mersitulus alahna. 8Tapi dokken mo kalak idi memahan batu bata janah oda ndorok moru buèna bagè sienggona i. Naing ndong-ndong sambing ngo kuidah taki kalak i; kumarna i ngo asa dak ngut-nguten kalak i, asa ipadiat katèna laus memèlèken pèlèen taba Dèbata kalak i. 9Paksa mo kalak i mahan bahaen i, asa lalap kalak i mahan bahaen janah asa ulang sanga nè kalak idi mendengkohken berita luap.”
10Nai berkat mo sinasa mandur bangsa Mesir dekket mandur bangsa Israel mendokken taba bangsa Israel, “Enggo iperèntahken raja i oda berènken nèngè taba kènè nggala pagè. 11Mersitulusi alahna mo kènè barang i dikè nai, tapi èngèt, batu bata sibahaen ndènè oda ndorok moru bagè sienggona.” 12Nai laus mo kalak Israel mengagahi karina tanoh Mesir lako pepulungken nggala pagè. 13Ipaksa mandur ngo kalak i gennep ari, kennah dos buèna batu bata ibahan kalak i, bagè tikan iberrè dèng bai kalak i nggala pagè. 14Itendelli kalak i mo mandur kalak Israel sinipebangkit lako menjamoti ulaen idi. Nina kalak i mo, “Kasa bagèndari oda dos buè batu bata ibahan bangsamu bagè sitikala i?”
15Nai laus mo mandur-mandur Israel menghadep raja mengkelsohken, “Kasa bagi pemakin raja i taba kami? 16Oda lot iberrèken nggala pagè bai nami, tapi ipaksa ngo kami mahani batu bata! Piah-piah itendelli ngo kami bagèndari keppè pugabè-pugabè raja i ngo salah.”
17Ialoi raja i mo, “Jelma mahangkè ngo kènè janah oda nggèut karèjo. Kumernana i ngo asa ipidoken kènè baku asa kupadiat kènè laus lako memèlèken pèlèen bai Jahowa ndènè idi. 18En pè lakè mo laus balik karèjo. Ukum nggala pagè, oda berènken bai ndènè, tapi kennah tong ngo bahanen ndènè batu bata bagè buè sienggona kin.” 19Satdar mo mandur-mandur idi, enggo makin susahna kalak idi, tikan ibagahken kennah bahanen kalak Israel batu bata dos buèna bagè sienggona kin.
20Karuar kessa mo kalak idi i istana nai, pejumpa mo kalak idi dekket si Musa bak si Aron simemèma kalak idi. 21Nina mandur-mandur idi mo, “Ibettoh Jahowa ngo ulah-ulah ndènè. HukumenNa mo kènè. Kènè ngo maing asa nggogo atè raja i dekket pugabèna i kami, sanga naing ibunuh kalak idi kami.”
Kekelsohen si Musa taba Jahowa
22Nai idahi si Musa nola mo Dèbata janah idokken mo, “Ialè Jahowa, kasa bagèen mpersukna bangsa Israel ibakin Ko? Kasa aku ipasulak Kono misèn? 23Kessa nai kuhadap raja i janah mengerana merkitè gerarMu makin i dersa nola ngo bangsa èn janah kadè poda ibakin Kono lako mengurupi kalak i.”
Currently Selected:
2 Musa 5: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
