2 Musa 39
39
Memahan pakkèen imam
(2 Ms. 28:1-14)
1Si Bezaleel dekket si Aholiab memahan pakkèen merkebbas ipas wol meratah nai, meharbu dekket mbara bai imam-imam tikan merkebbas kalak i i Bilik Simbadia. Pakèen imam lako bai si Aron ibahan bagè sinidokken Jahowa taba si Musa.
2Efod ibahan ipas kaèn linen halus nai, wol meratah, meharbu dekket mbara, dekket bennang emmas. 3Iteppa kalak i ma ngo bak bennang emmas, nai itennun dekket kaèn linen halus dekket wol meratah, meharbu deket mbara. 4Kessa i ibahan mo dua tinali i barana pengèkèt efod sinijarumken mi sisina. 5Tali abak tennunen halus ibahan ipas dos haliu nai janah ijarumken ipas èfod i, asa gabè mersada tosè bagè siniperèntahken Jahowa bai si Musa. 6Ikiskis kalak i mo intan delima, nai ileketken ipas bingkè emmas. Merkitè kepandèen iokirken kalak i mo gerar-gerar sisipuluh dua anak si Jakob mi batu-batu intan i. 7Nai ileketken mo intan-intan i mi tinali bara efod sikira tanda pernèngèten mi sisipuluh dua marga Israel, bagè siniperèntahken Jahowa bai si Musa.
Memahan tutup tenten
(2 Ms. 28:15-30)
8Ibahan si Bezaleel dekket si Aholiab mo tutup tenten, haliuna dos dekket haliu mi efod, janah sulamenna pè dos. 9Bentukna sagi ilempit dua, bekkangna dekket geddangna gennep 22 sèntimèter. 10Ipas tutup tenten i ibakin kalak i mo empat mbaris batu intan. I baris perlebbè intan delima, topas dekket baiduri tepak. 11I baris peduaken zamrud, batu nilam dekket intan. 12I baris petelluken batu lazuardi, akik dekket batu kecubung. 13I baris pe-empatken batu pirus, yakut dekket ratna cempaka. Sisipuluh dua intan idi i rakut dekket emmas. 14I gennep intan i iokirken mo gerar sada ipas sisipuluhdua anak si Jakob sikira tanda pernèngèten mi marga-marga Israel. 15Nai ibahan mo dua bura ipas emmas tulèn nai itali bagè tinali. 16Ibahan ma mo dua gellang emmas ileketken ipas duana punca kettan dates tutup tenten idi. 17Nai icucukken mo duana bura emmas i mi bagasen gellang-gellang i, 18janah punca sidua nai, itapelken mi sidua bingkè, asa gabè ndorok tutup tenten i ipedemmu dekket tinali bara si kettan lebbè efod i. 19Nai ibahan ma mo dua nai gellang emmas ileketken mi tutup tenten idi, i punca kan terruh kettan bagessenna si dais mi efod. 20Enggo kessa bagi ibahan mo dua gellang emmas, ileketken kettan lebbè tinali bara sidua i efod, narih mi perdemuen penjarumenna narih mi terruh, i babo tali abak ipas tennunen halus nai. 21Rembang bagè perèntah Jahowa bai si Musa, gellang tutup tenten i, ipedemmu dekket tinali meratah ipas gellang efod, asa dak tong tutup tenten i i babo tali abak janah oda ndorok ntalkas.
Memahan pakèen sidèban bai imam
(2 Ms. 28:31-43)
22Jubah sinipakkè i babo efod, karina ibahan ipas wol meratah nai. 23Ruang kerahongna ipetegguh dekket pita tennunen, asa ulang murah meribak. 24-26I sikuliling bidingna tan terruh ibakin hiasen buah delima ipas kaèn linen halus nai dekket wol meratah, meharbu dekket mbara nai, i kellang-kellangi dekket cimata emmas nai, rembang bagè siniperèntahken Jahowa taba si Musa.
27Ibahan kalak i ma mo anak baju bai si Aron dekket dukak-dukakna, 28bak sorban, sulabal joppok ipas linen nai, 29dekket pementing ipas kaèn linen halus nai, wol meratah, meharbu dekket mbara, ihias dekket sulamen, bagè siniperèntahken Jahowa taba si Musa. 30Ibahan ma mo hiasen ipas emmas tulèn nai, tandana magahken enggo ipilih kalak i bai Jahowa. Ipas hiasen i terokir kata-kata “Ikelini bai Jahowa”. 31Hiasen idi i lekketken ipas sorban kettan lebbè, rembang bagè perèntah Jahowa bai si Musa.
Ipesidung bahanen i
(2 Ms. 35:10-19)
32Ujungna pul mo karina ulaen memahan Undung-undung Jahowa. Enggo ibahanken kalak Israel karina bagè siniperèntahken Jahowa taba si Musa. 33Iembah kalak i mo taba si Musa Undung-undung dekket karina haliuna, kait-kaitna, sumban-sumbanna, tihang-tihangna dekket henjellenna, 34tutupna ipas bebak kambing tonggal nai siniubar mbara, tutupna ipas bebak menipis nai, kaèn penudung. 35Pèti Perpadanen sin dua batu dekket kayu osong-osongna dekket tutupna, 36meja dekket karina haliuna dekket roti hantaren, 37nèhè lampu ipas emmas tulèn nai, lampu-lampuna dekket karina haliuna, minak lampu 38langgaten ipas emmas nai, minak kerja, dahupa baungkus, kirè-kirè pèntu Undung-undung, 39langgaten tembaga dekket kawat binayu ipas tembaga nai, kayu osong-osong dekket karina haliuna, kancah laè bekkas merborih dekket henjellenna, 40layar-layar mi kasèan dekket tihang-tihang dekket henjellenna, kirè-kirè pèntu pengkeruhen, kasèan bak rakut-rakutna, patok-patok Undung-undung; karina haliu sipakkèen ibas Undung-undung, 41dekket pakkèen merkebbas bai imam sinderrang merkebbas kalak idi i Bilik Simbadia dekket pakkèen merhuntuen bai si Aron dekket dukak-dukakna. 42Enggo ibahanken kalak Israel karina bahaen i bagè siniperèntahken Jahowa taba si Musa. 43Iperèso si Musa mo karina janah idah enggo i bakin kalak i rembang bagè siniperèntahken Jahowa, nai ipasu-pasu si Musa mo kalak i.
Currently Selected:
2 Musa 39: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
