2 Musa 40
40
Ipecènder Undung-undung Jahowa janah ikelini bai Jahowa
1Idokken Jahowa mo taba si Musa, 2“Pejengjeng mo Undung-undungKu tupung ari sada bulan sada. 3Pemasuk mo mi bagasen Pèti Perpadanen sienggo sin Sipuluh Patiin janah baing mo kaèn penudungna i lebbèna. 4Gamparken mo mèja dekket haliuna i kebekkasenna. Pemasuk ma mo nèhè lampu janah baing mo lampuna. 5Gamparken mo langgaten emmas bekkas penutungen dahupa i lebbè Pèti Perpadanen i, janah gantungken mo kirè-kirè i pèntu Undung-undung i. 6Gamparken mo langgaten bekkas pèlèen situtungen i lebbè pèntu Undung-undung i. 7Bakin mo kancah bekkas laè i kellang-kellang Undung-undung dekket langgaten i, nai sini mo dekket laè. 8Nai baing mo layar i sikuliling kasèan Undung-undung i, janah sangketken kirè-kirè pèntu pengkeruhen kasèan i.
9Nai kennah pèlèken mo bangKu Undung-undung i dekket karina haliuna, merkitè meminakisa dekket minak kerja, asa karinana idi merkedekoen pellin baKu. 10Pèlèken ma mo langgaten dekket karina haliuna merkitè bagidi ma tong, asa karinana idi, merkedekoen pellin baKu. 11Bagi ma mo tong bakin bang kancah laè bak henjellenna i.
12Enggo kessa bagi, pasulak mo si Aron dekket dukak-dukakna roh mi pèntu Undung-undung janah menguras dirina. 13Pakèken mo pakèen imam bai si Aron, janah minaki mo ia asa ipebangkit ia lako mengkebasi Aku gabè imam. 14Nai dokken mo dukak-dukakna roh njolmit, janah pakèken mo anak baju bai kalak i. 15Nai minaki mo kalak i bagè peminakimu taba bapa kalak i, asa kalak idi pè ndorok mengkebasi Aku gabè imam. Merkitè kerja meminaki idi, mercundut-cundut mo marga kalak idi mencèkèp ulaen imam.”
16Ibaing si Musa mo karina bagè sini- perèntahken Jahowa. 17Asa i ari sada bulan sada i tahun peduaken enggo kessa itadingken kalak Israel tanoh Mesir, ipajek kalak i mo Undung-undung Jahowa. 18Igamparken si Musa mo henjellen-henjellenna, pejeng-jengken rangka-rangkana, mengampèken kayu sumbanna, janah pecènderken tihang-tihangna. 19Nai ipekimbang mo saong Undung-undung i dekket tutup kettan ruar i babona bagè siniperèntahken Jahowa. 20Kessa i ipemasuk mo batu sidua i mi bagessen Pèti Perpadanen i. Nai iampèken si Musa mo tutup Pèti i janah icucukken kayu osong-osongna mi bagessen gellangna. 21Nai ibakin mo Pèti idi mi bagessen Undung-undung i janah menangketken kaèn penangkemmi i lebbèna, bagè siniperèntahken Jahowa tabasa.
22Kessa i ibakin si Musa mo meja mi bagessen Undung-undung i, kettan utara i ruar kaèn i, 23nai igamparken mo roti hantaren i babo mèja i. 24Nèhè lampu igamparken ibagessen Undung-undung, kettan selatan, pedempak dekket meja idi, 25nai ilakati mo lampu-lampu idi ihadeppen Jahowa. 26Langgaten emmas pè ibakin ma mo mi bagessen Undung-undung i lebbè kaèn i, 27nai itutung mo dahupa baungkus bagè siniperèntahken Jahowa bai si Musa. 28Igantungken si Musa mo kirè-kirè pèntu Undung-undung i, 29janah i lebbè pèntu i, ibakin langgaten mahan bekkas pèmèlèen situtungen. Ibabo langgaten idi ipèlèken mo pèlèen situtungen dekket pèlèen han- taren. 30Kancah tembaga i pè igamparken mo i kellang-kellang Undung-undung dekket langgaten i, nai isini mo dekket laè. 31Iborih si Musa, si Aron dekket dukak-dukakna mo tangan dekket nènèh kalak i i sidi, 32gennep mbengket kalak idi mi bagessen Undung-undung Jahowa barang menjolmiti langgaten i. 33I sikuliling Undung-undung dekket langgaten idi ipekimbang si Musa mo layar, nai isangketken ma mo kirè-kirè pèntu pengkeruhen kasèan. Nai pul mo karina ulaen idi.
Isangkemmi hembun Undung-undung Jahowa
(4 Ms. 9:15-23)
34 #
1 Raj. 8:10-11; Jes. 6:4; Hes. 43:4-5; Alm. 15:8 Nai roh mo hembun menangkemmi Undung-undung Jahowa, janah dom cuhaya Jahowa mo Undung-undung i. 35Kumerna i oda terbaing si Musa mbengket mi bagessen Undung-undung i. 36Gennep kèkè hembun i i babo Undung-undung Jahowa i nai, irontas bangsa Israel mo perundung-undungen kalak i lako pindah mi bekkas sidèban. 37Tapi mula oda mèrèt hembun idi, oda laus kalak idi i sidi nai. 38Sidekkah i perdalanen bangsa Israel, tong ngo ibas Undung-undung i Jahowa merumangken hembun mula tikan mahar janah merumangken api mula tikan berngin.
Currently Selected:
2 Musa 40: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
