2 Musa 38
38
Memahan langgaten bekkas pèlèen situtungen
(2 Ms. 27:1-8)
1Ibuat si Bezaleel mo kayu sempènur, nai ibahan mo langgaten mahan bekkas pèmèlèen situtungen. Empat soki ngo langgaten idi, geddangna dekket bekkangna gennep 2,2 mèter, janah datèsna 1,3 mèter. 2Ipas gennep soki kettan dates ibakin tandukna mersada dekket langgaten. Karina ilampis dekket tembaga. 3Ibahan ma ngo saruam-saruam, penaok, mangkuk-mangkuk, garpu-garpu dekket bekkas api. Karina haliu i ibahan ipas tembaga nai. 4Ibayu ma mo kawat ipas tembaga nai, ililitken mi langgaten kettan terruh, datesna sitengah daripada dates langgaten i. 5Nai ibahan ma mo empat gellang bekkas kayu osong-osong ipas siempat soki kettan terruhna. 6Kayu osong-osong i ibahan ipas kayu sempènur nai ilampis dekket tembaga. 7Nai icucukken mo duana kayu osong-osong i mi bagessen gellang-gellang mi dua lumpakna langgaten i. Ibakin ngo langgaten i ipapan nai, janah kettan bagasen merruang ibaing.
Memahan kancah tembaga
(2 Ms. 30:18)
8 #
2 Ms. 30:18
Ibahan si Bezaleel ma ngo kancah tembaga merhatapken tembaga. Tembaga i imo bai cermin-cermin daberru nai si merkebbas i pèntu Undung-undung Jahowa.
Empèr Undung-undung Jahowa
(2 Ms. 27:9-19)
9Ipagari si Bezaleel mo èmpèr Undung-undung Jahowa i dekket layar ipas kaèn linen halus nai. Kettan selatan, geddangna 44 mèter, 10isangketken ipas duapuluh tihang tembaga, karina merhenjellen ipas tembaga bak kait dekket sangketenna ipas pirak nai. 11Kettan utara pè bagi ma ngo ibakin. 12Kettan kesunduten ibaing ma mo layar geddangna 22 mèter, dekket sipuluh tihang janah sipuluh henjellenna; kait dekket perdemuenna ibahan ipas pirak nai. 13Kettan kebincaren, si lot pèntuna, bekkang layarna tong ma 22 mèter. 14-15I kambirang kamuhun pèntu i, ileketken layar, geddangna gennep 6,6 mèter, dekket tellu tihang janah tellu henjellen. 16Karina layar kuliling kasèan idi ibakin ipas kaèn linen halus nai. 17Henjellen tihang-tihangna, ibahan ipas tembaga nai, tapi ukum pengkait, pengudun dekket punca tihangna ibahan ipas pirak nai. Karina tihang i sikuliling kasèan i ipedemmu dekket kait-kait pirak. 18Kirè-kirè pèntu pengkeruhen kasèan idi ibahan ipas linen halus nai sinitennun dekket wol meratah, meharbu dekket mbara janah i hias dekket sulamen. Geddangna sibah mèter janah datesna dua mèter, dos dekket layar sinikasèan i. 19Kaèn pèntu i isangketken ipas empat tihang dekket empat henjellen tembaga. Karina pengkait, tutup puncana dekket sangkettenna ibahan ipas pirak nai, 20tapi ukum patok-patok Undung-undung i dekket pagarna ibahan ipas tembaga nai.
Logam sinipakè ibas Undung-undung Jahowa
21En mo gerar-gerar logam sinipakè mi Undung-undung Jahowa, bekkas sidua batu dekket Sipuluh Patiin Dèbata ipennep. Ibakin gerar-gerar i merkitè perèntah si Musa janah isusun kalak Lewi simengula siniuluken si Itamar, anak Imam Aron.
22Si Bezaleel anak si Usi, kempu si Hur i marga Juda nai, memahan karina siniperèntahken Jahowa. 23Pengurupina, si Aholiab anak si Ahisamakh i marga Dan nai, sada kalak pandè mengokir, penggorga dekket pandè mertennun kaèn linen halus, bak wol meratah, meharbu dekket mbara.
24Emmas sinipèlèken bai Jahowa mahan Undung-undung Simbadia, karina buèna seribu kilo, itimbang mengèkutken timbangen simerlakku i Undung-undung Jahowa. 25#2 Ms. 30:11-16 Pirak si dapet tikan memilang bangsa Israel buèna 3.430 kilo i timbang mengèkutken timbangen simerlakku ibas Undung-undung Jahowa. 26#Mat. 17:24 Buèna i dos dekket sinigarar karina kalak sitersurat ibas sènsus i. Gennep jelma menggarar nasa harga sienggo itentuken, itimbang mengèkutken timbangen simerlakku. Ipas pemilangen i tersurat 603.550 kalak anak laki simerumur duapuluh tahun mi dates. 27Ipas pirak i nai, 3.400 kilo mo ipakkè mahan siratus henjellen tihang Undung-undung Jahowa dekket kaèn pèntuna. Gennep henjellen botongna 34 kilo. 28Ipas pirak sitadingna i nai, buèna 30 kilo, ibahan si Bezaleel mo persambungen-persambungen dekket pengkait-pengkait mi tihang-tihangna, bak tutup kettan dates tihang-tihang i. 29Tembaga sinipèlèken bai Jahowa, buèna karina 2.425 kilo. 30Ipakkè ngo tembaga i mahan alas pèntu Undung-undung Jahowa, langgaten dekket kawat sinibayu ipas tembaga nai, karina haliu langgaten. 31Henjellen layar i sikuliling kasèan dekket pèntu pengkeruhen, karina patok Undung-undung dekket sikuliling kasèan.
Currently Selected:
2 Musa 38: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
