2 Musa 37
37
Memahan Pèti Perpadanen
(2 Ms. 25:10-22)
1Ibahan si Bezaleel mo Pèti Perpadanen ipas kayu akasia nai, geddangna 110 sèntimèter, bekkangna dekket datesna 66 sèntimèter. 2Kettan bagessen dekket kettan darat ilampisi dekket emmas tulèn, nai ibahan bingkèna emmas kuliling. 3Nai ibahan mo empat gellang emmas i bekkas kayu osong-osongna janah ibaing ipas nèhè pèti siempat i, dua gellang i gennep biding pèti i. 4Ibahan ma mo osong-osongna ipas kayu sempènur nai, janah ilampisi dekket emmas. 5Nai ipemasuk mo kayu osong-osong idi mi bagasen gellang silot ipas gennep biding pèti i. 6Nai ibahan mo sada tutup ipas emmas tulèn nai, geddangna 110 sèntimèter janah bekkangna 66 sèntimèter. 7Ibahan ma mo dua kerub ipas emmas teppaen nai, 8sada i gennep punca tutup i. Sidua kerub i ibakin mersada dekket tutupna, 9janah ibakin pedempak-dempak, dekket kabengna ngkerbang menangkemmi tutup pèti i.
Memahan mèja bekkas roti hantaren
(2 Ms. 25:23-30)
10Ibahan si Bezaleel mo mèja ipas kayu sempènur nai, geddangna 88 sèntimèter, bekkangna 44 sèntimèter janah datesna 66 sèntimèter. 11Ilampisi ngo mèja idi dekket emmas tulèn janah ibakin merbingkè emmas kuliling. 12Nai ibakin mo biding mèja i 7,5 sèntimèter. Biding mèja i ibakin merbingkè emmas kuliling. 13Ibahan mo empat gellang mahan bekkas kayu osong-osongna janah ileketken ipas empatna soki mèja i. 14Ileketken ma mo gellang penahan kayu osong-osongna i igembar biding mèja i. 15Osong-osong i ibahan ipas kayu sempènur nai janah ilampis dekket emmas. 16Ibahan ma ngo pinggan-pinggan, mangkuk-mangkuk, goci-goci dekket bokkor-bokkor mahan bekkas pemèlèen laè anggur. Karina haliu mèja idi ibakin ipas emmas tulèn nai.
Memahan nèhè lampu
(2 Ms. 25:31-40)
17Ibahan si Bezaleel ma ngo nèhè lampu ipas emmas tulèn nai. Henjellen dekket cèkèpenna ibahan ipas emmas teppaen nai. Bunga-bunga hiasen, termasuk motik dekket kelopakna mersada ngo ibaing dekket cèkèpenna.
18Ipas cèkèpenna idi ibahan ennem dangkah, tellu dangkah kacimbang mbellah. 19Ipas gennep dangkah ibakin hiasen merumangken tellu bunga badem mermotik dekket merkelopak. 20Ipas cèkèpenna i ibahan hiasen merumangken empat bunga badem mermotik dekket merkelopak. 21I terruh gennep dangkah ibakin ma mo sa- da motik. 22Karina nèhè lampu i dekket motik-motik bak dangkah-dangkahna, ibahan ipas sada gumul emmas teppaen tulèn nai. 23Ipas nèhè lampu i ibahan mo pitu lampu merdengan alat lako membersihken sumbu lampu janah batilna ipas emmas tulèn nai. 24Lako memahan nèhè lampu dekket perlengkapenna iperluken 35 kilo emmas tulèn.
Memahan langgaten bekkas menutung dahupa
(2 Ms. 30:1-5)
25Ibahan si Bezaleel mo sada langgaten ipas kayu sempènur nai mahan bekkas menutung dahupa. Empat soki ngo langgaten i, geddangna dekket bekkangna gennep 45 sèntimèter janah datesna 90 sèntimèter. Ipas sokina siempat i kettan dates ibahan tanduk mersada dekket langgaten i. 26Kettan datès empat lumpakna dekket tanduk-tandukna idi ilampisi dekket emmas tulèn janah kuliling ibakin emmas bingkèna. 27Ibahan ma mo dua gellang i terruh bingkè emmas i ipas lumpakna duana lako memahan kayu osong-osong langgaten i. 28Osong-osong i ibahan ipas kayu sempènur nai janah ilampisi dekket emmas.
Memahan minak Kerja dekket dahupa
(2 Ms. 30:22-38)
29 #
2 Ms. 30:22-38
Ibahan si Bezaleel ma ngo minak kerja dekket dahupa tulèn baungkus, isakkor tosè bagè minak baungkus.
Currently Selected:
2 Musa 37: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
