2 Musa 36
36
1Si Bezaleel, si Aholiab, dekket karina tukkang sienggo menjalo helmu dekket kepandèen bai Jahowa nai, memettoh bakunè cara memahan karina siniperluken lako memahan Undung-undung Jahowa. Kennah ibahan kalak i ngo karina bagè sienggo iperèntahken Jahowa.”
Iberrèken bangsa Israel mbuè pemerèken
2Idiloi si Musa mo si Bezaleel, si Aholiab dekket karina kalak sienggo terolih kepandèen bai Jahowa nai dekket si uè mengurupi, nai idokken mo kalak i lako mentebenai. 3Iberrèken si Musa mo taba kalak i karina sienggo iberrèken kalak Israel mi bahaen memajek Undung-undung Jahowa. Tapi dak tong dèng ngo bangsa Israel merembah pèlèen taba si Musa gennep ceggen. 4Nai karina tukkang simengulaken bahaen i, 5memagahken taba si Musa, “Haliu sinipemberèken jelma nterrem i enggo lebih daripada siniperluken mahan ulaen sinidokken Jahowa.”
6Nai imongmongken si Musa mo mi karina perundung-undungen i memagahken enggo mo bias pemerrèken i lako mahan Undung-undung Jahowa; nai oda nèngè mo kadè iembah jelma nterrem i. 7Asa gabè lebbih nola mo sinipemberèken kalak idi lako pepulken ulaen idi.
Tukkang memahan Undung-undung Jahowa
(2 Ms. 26:1-37)
8Nai itukkangi sipandèna kalohon ipas nasa tukkang idi nai mo Undung-undung Jahowa. Ibahan kalak idi mo Undung-undung idi ipas sipuluh rambar kaèn linen halus nai itennun dekket kaèn wol meratah, meharbu dekket mbara, janah isulamken mo gombaren kerub. 9Gennep rambar dos sibarenna; geddangna sipuluh dua mèter, janah bekkangna dua mèter. 10Lima rambar kaèn i ipedemmu gabè sada layar, janah silima rambar nai i pè bagi ma mo tong ibakin. 11Ipas biding layar sidua idi ibakin mo sangketten ipas kaèn meratah nai, 12limapuluh sangketten i gennep layar, gabè merumangken sada mpasang. 13Nai ibahan mo limapuluh kait emmas lako pesadaken layar sidua idi.
14Enggo kessa bagi, ibahan kalak i mo saong Undung-undung i ipas sipuluh sada rambar kaèn ibas buk kambing nai. 15Gennep rambar dos sibarenna, geddangna sipuluh tellu mèter janah bekkangna dua mèter. 16Lima rambar ipedemmu gabè sada layar, janah siennem rambar nai pè bagi ma mo ibakin. 17Ibakin mo limapuluh sangketten i biding layar perlebbè janah limapuluh sangketten i biding layar sipeduaken. 18Nai ibahan mo limapuluh kait ipas tembaga nai lako pedemuken duana layar i gabè saong Undung-undung i. 19Kessa i ibahan mo dua tutup mi sidua lumpak i, sada ipas bebak biri-biri tonggal nai siniubar mbara, janah sidèbanna i ipas bebak menipis nai.
20Nai ibahan kalak i mo rangka-rangka Undung-undung i pajek mi dates ipas kayu sempènur nai. 21Gennep rangka empat mèter datesna janah bekkangna ennempuluh ennem sèntimèter. 22I gennep rangka ibahan mo dua patok simpasang, asa ndorok i pedemmu rangka sisada mi si sada nai. 23I kettan selatan ibakin mo duapuluh rangka, 24dekket empatpuluh henjellenna i pirak nai, dua mo iterruh gennep rangka mi sidua patokna. 25I kettan utara ibahan mo duapuluh rangka, 26dekket empatpuluh henjellenna ipas pirak nai, dua i terruh gennep rangka. 27Kan podi Undung-undung i kettan kesunduten, ibahan mo ennem rangka, 28janah dua rangka mo i sokina. 29Rangka kettan soki ipedemmu mi pandak nai soh mi kettan dates. Rangka-rangka persoki i ipedemmu i nèhèna nai soh mi babona. Rangka sidua sinaing persokina ibaing ma bagidi. 30Jadi karinana lot ualuh rangka dekket sipuluh ennem henjellen pirak, dua i terruh gennep rangka.
31Nai ibahan kalak i mo sipuluh lima kayu pengabin i kayu sempènur nai, lima i gennep rangka-rangka i sada biding Undung-undung, 32lima nai i sisina sisada, janah lima nai i podi Undung-undung kan kesunduten. 33Kayu pengabin sikan tengah, ibaing sitengah dates rangka, i punca nai mi punca Undung-undung i. 34Rangka Undung-undung dekket kayu pengabin-pengabin i ilampisi dekket emmas, nai ibaing ma mo gellang-gellang emmas mahan pencèkèpi kayu i.
35Ibahan kalak i ma ngo kaèn pèntu i linen halus nai, sinitenun dekket wol meratah, meharbu dekket mbara, nai isulamken mo gombaren kerub. 36Bekkas penggantungen kaèn i, ibahan mo empat tihang i kayu sempènur nai simerlampis emmas dekket kait emmas janah ibaing i babo empat henjellen pirak. 37Nai ibahan mo kirè-kirè pèntu Undung-undung i linen halus nai sinitennun dekket wol meratah, meharbu bak mbara janah isulam. 38Mi kaèn pèntu i ibahan lima tihang ipedemmu merkitè kait-kait. Punca bak pengudun tihang silima i ilampisi dekket emmas, janah henjellenna silima i ibahan ipas tembaga nai.
Currently Selected:
2 Musa 36: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
