2 Musa 35
35
Hatoren tersèngèt ari Sabat
1Ipepulung si Musa mo karina bangsa Israel, nai idokken mo taba kalak i, “Bagèen ngo perèntah Jahowa bai ndènè: 2#2 Ms. 20:8-11, 23:12, 31:14-15, 34:21; 3 Ms. 23:3; 5 Ms. 5:12-14 Lot ngo ennem ari lako mahan bahaen, tapi ukum ari pepituken, imo ari pentadien, ari raya simerkedekoen bai Jahowa. Barang isè mengula tikan ari Sabat kennah ihukum matè. 3Tupung ari i, oda ndorok kènè mengelakati api i bages ndènè.”
Pèlèen mi Undung-undung Jahowa
(2 Ms. 25:1-9)
4Mengerana mo si Musa taba karina bangsa Israel, “Bagèn ngo pendokken Jahowa: 5Embah mo pèlèen bai Jahowa. Barang isè lot tergerrek ukurna, kennah memèlèken emmas, pirak, deket tembaga. 6Kaèn linen halus, kaèn wol meratah, kelabu dekket mbara; kaèn ipas buk kambing nai; 7bebak biri-biri tonggal iubar mbara rupana, bebak menipis, kayu sempènur, 8minak lampu, rempah-rempah mahan minak merkerja dekket mahan dahupa si baungkus; 9intan delima dekket intan sidèban lako itiktikken ipas baju efod dekket tutup tenten Imam Huntuen.”
Haliu mi Undung-undung Jahowa
(2 Ms. 39:32-43)
10“Karina tukkang sipandè bai ndènè nai kennah roh lako memahan karina sienggo idokken Jahowa, imo: 11Undung-undung, saong dekket tutupna, kait dekket rangkana, kayu perhabang, tihang pèntu dekket henjellenna; 12Pèti perpadanen dekket osong-osongna, uluna dekket kaèn sangkemna 13mèja dekket kayu osong-osongna, karina haliu dekket roti hantarenken; 14nèhè lampu maing asa nterrang dekket haliuna, lampu dekket minakna. 15langgaten bekkas menutung dahupa dekket kayu osong-osongna, minak merkerja, dahupa baungkus; kirè-kirè mahan pèntu Undung-undung, 16langgaten bekkas pèlèen situtungen dekket kandang-kandang tembaga, kayu osong-osong dekket karina haliuna, kancah bekkas memorih dekket henjellenna, 17kaèn bellat-bellat mi kasèana, pandak-pandak dekket henjellenna, kirè-kirè pèntu pengkeruhen kasèan, 18patok-patok dekket rakut-rakut Undung-undung, bagi dekket kasèana, 19pakkèen imam tikan mengula kalak i Bilik Simbadia dekket pakèen merkedekoen bai Imam Aron, dekket dukak-dukakna.”
Bangsa Israel merembah pèlèen kalak i
20Nai merlausen mo karina kalak Israel simerpulung i, 21janah barang isè tergerrek ibas ukurna, merembah pèlèen bai Jahowa lako mencukupi Undung-undung Jahowa. Iembah kalak i ma ngo karina siniperluken tupung pemojien bai Jahowa dekket keperluen mi pakèen imam. 22Barang isè sambing uè, daholi barang daberru, roh merembah kancing emmas, sobeng, cincin, bura dekket nasa matcam bagè pakèen emmas mahan pèlènken bai Jahowa. 23Gennep kalak simerkaèn linen halus, kaèn wol meratah, meharbu barang mbara, kaèn ipas buk kambing nai, bebak biri-biri tonggal sienggo iubar mbara, barang bebak menipis, memèlèken barangna idi. 24Gennep jelma sindorok memerèken pirak barang tembaga, iembah mo bai Jahowa. Bagi ma ngo ibakin kalak si lot kayu sempènurna mi bahaen idi. 25Daberru-daberru sipandè menali bennang merembah bennang linen halus dekket bennang wol meratah, meharbu dekket mbara sienggo ibahan kalak i. 26Itali kalak i ma ngo bennang ipas buk kambing nai. 27Pengulu-pengulu merembah intan delima dekket intan-intan sidèban lako itiktikken mi efod dekket tutup tenten. 28Iembah kalak i ma ngo rempah-rempah dekket minak lampu, minak merkerja dekket dahupa sibaungkus. 29Karina kalak Israel merkitè gerrek ukurna sendiri merembah pèlèen kalak i bai Jahowa mi bahaen siniperèntahken Jahowa merkitè si Musa.
Tukkang sinisuruh mahan Undung-undung Jahowa
(2 Ms. 31:1-11)
30Enggo kessa i, idokken si Musa mo taba kalak Israel, “Enggo ipilih Jahowa si Bezaleel anak si Uri, kempu si Hur, i marga Juda nai 31janah memasu-masusa merkitè kuasaNa. Iberrèken Jahowa ngo bana pengantusien, kepantasen dekket kepandèen ibas matcam bagè ketukkangen, 32lako memahan gambaren simemerluken kepandèen, bagi dekket menukkangisa ibas emmas, pirak deket suasah nai, 33lako meningtingi batu intan sinaing itiktik lako mengokir kayu dekket mahan karina matcam bagè ketukkangen. 34Bai si Bezaleel dekket si Aholiab, anak si Ahisamakh i marga Dan nai, iberrèken Jahowa ngo kepandèen lako mengajarken kepandèen kalak i bai sidèban. 35Iberrèken ngo bai kalak idi kepandèen ibas karina matcam bagè ulaen sinibahan sipandè mengokir, penggorga dekket sipandè mertenun linen halus, wol meratah, meharbu dekket mbara, dekket kaèn sidèban. Penggorga pandè ngo kalak i janah ndorok mengulaken mermatcam bagè ulaen.
Currently Selected:
2 Musa 35: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
